غزنی: عسکرو د کرکټ لوبې په مهال ۵ ماشومان شهیدان او ۷ نور ټپیان کړل

نن ټکی اسیا (دوشنبه، وري۳مه، ۱۳۹۴ل): د غزني مرکز ته څېرمه په قلعه قاضي کلي کې نن مازیګر شاوخوا څلور بجې پولیسو ۵ ماشومان شهیدان او ۷ نورو ژوبل کړل.

عیني شاهدان وايي چې ماشومانو د کرکټ لوبه کوله، چې څېرمه پوستې ورباندې د هوان ډز وکړ، چې پنځه ماشومان يې ځای پر ځای ووژل او اوه نور يې مرګوني ټپیان کړل.

د دوی پر قول په سیمه کې ارامه ارامي وه چې یو نا څاپه له نږدې پوستې ډز وشو او د هاوان مرمۍ د ماشوم لوبغاړو په منځ کې ولګېده.

په غزني کې د نن ټکی اسیا خبریال وايي چې د سیمې خلک ځینې پر شهیدانو او ځينې پر ټپیانو بوخت شول، پولیس له پوستې راووتل او شاوخوا يې پوسته محاصره کړه، لکه د خلکو د هجوم وېرې چې اخیستي وي.

د سرچینې په قول د سیمې مخورو د شهیدانو جسدونه، د ولایت مقام مخې ته یووړل او له چارواکو يې د پېښې د څېړلو او د عاملینو د نیولو غوښتنه وکړه؛ دوی تر نږدې ماښامه د ولایت مخې ته جسدونه ايښي و، چې څو شېبې وړاندې يې خاورو ته وسپارل.

د سید ولي پر نوم یو تن زموږ خبریال ته ویلي، چې دی له لرې د لوبي نندارچي و، چې نا څاپه له پوستې ډز وشو او په کرکټ میدان کې د ماشومانو چیغې پورته شوې، چې نږدې ورغلل پنځه تنه ځای پر ځای شهیدان شوي وو او اوه نور يې روغتون ته رسولي، چې د دریو يې روغتیا له ډاډه وتې وه.

د غزني د امنیت امر اسدالله انصافي بیا دا نه مني چې ګواکې پولیسو پر ماشومانو ډزې کړې، دوی وايي چې ماشومان د لوبې په میدان کې د چاودنې له امله وژل شوي، چې په خبره يې چاودېدونکي توکي په یوه بایسکل کې ځای پر ځای شوي وو.

خو سید ولي د امنیت د امر دا خبرې نه مني او وايي چې که د دوی ماشومان په چاودنه کې شهیدان شوي وای، دوی به د ولایت مخې ته د هغوی جسدونه نه ور وړل. هغه وايي: «موږ مخامخ ورته کتل، چې له پوستې ډز راوشو، هسې دولت د ځان د خلاصولو لپاره پلمې لټوي.»

دا لومړی ځل نه دی چې په غزني کې دولتي عسکر دا ګام اخلي، تر دې وړاندې هم د غزني ښار په موی مبارک کوڅه کې یو ځوان د پولیسو له لوري ځکه په شهادت ورسول شو، چې د پیسو له ورکړې يې انکار کاوه.

د روان میلادي کال په لومړۍ شپه په ورته یوې پیښه کې چې د هلمند په سنګین ولسوالۍ کې رامینځته شوه، د ملي اردو له یوې پوستې څخه د واده په مراسمو د هوان فیرونه وشول، چې په ترڅ کې يې تر ۵۰ زیات کسان ووژل شول او نږدې ۷۰ تنه یې ټپیان کړل.

ولسمشر اشرف غني د پیښې د بر رسۍ په موخه د کورنیو او دفاع وزارتونو څخه متشکل د یو تحقیقاتي هیئت د ګومارلو اعلان کړی وه چې تر اوسه یې نتیجه نه ده په ډاګه شوې.