پاتې کابینه سبا ولسي جرګې ته معرفي کېږي

نن ټکی اسیا (سه شنبه، وري ۱۱مه، ۱۳۹۴ل): د ولسي جرګې د نړیوالو اړیکو د کمېټې مشر عبدالقادرځاځی وايي چې له دفاع وزارت پرته به پاتې کابینه سبا ولسي جرګې ته معرفي شي.

که څه هم د روانې لمریزې میاشتې په درېیمه هم دولتي سرچینو د کابینې د معرفي خبر ورکړ، خو د دوی په خبره د ځینو ستونزو له امله د کابینې دغه لیست چې امریکا ته د ګډ حکومت د مشرانو تر سفر وړاندې برابر شوی و، په یاده نېټه ولسي جرګې ته ور ونه پېژندل شو.

د عبدالقادر ځاځي په وینا د ۱۶ نوماند وزیرانو د تابعیت او د زده کړو د اسنادو له کتلو وروسته به ولسي جرګه هغوی ته د تاييد یا رد رايې ورکړي.

د ولسي جرګې غړي د جمهوري ریاست او اجرایوي ریاست له لوري د ۱۶ نوماند وزیرانو له اعلان وروسته له هغو سره د اړیکو په هڅه کې دي، چې پخپله نوماند وزیران هم د ولسي جرګې له غړو سره د بېلابېلو ژمنو په کولو سره ناستې کوي، چې ځان ته د باور رايې خپلې کړي.

د عبدالقادر ځاځي په وينا ولسي جرګې ته به دغه لیست وسپارل شي:

۱- همایون رسا – سوداګرۍ او صنایعو وزارت

۲- عبدالباري جهاني – اطلاعاتو او فرهنګ وزارت

۳- اسدالله ضمیر – کرنې، اوبو لګونې او مالدارۍ وزارت

۴- محمد ګلاب منګل – سرحدونو او قبایلو چارو وزارت

۵- انجنیر محمود بلیغ – فواید عامې وزارت

۶- عبدالستار مراد – اقتصاد وزارت

۷- ډاکټر محمد الله بتاش – ترانسپورت او هوایي چلند وزارت

۸- اسدالله حنیف بلخي – پوهنې وزارت

۹- سید سعادت منصور نادري – ښار جوړونې چارو وزارت

۱۰ ډاکټر عبدالبصیر انور – عدلیې وزارت

۱۱- پوهنیار عبدالرزاق وحیدي – مخابراتو او معلوماتي ټکنالوژۍ وزارت

۱۲- مېرمن دلبر نظري – ښځو چارو وزارت

۱۳- پوهندوی مېرمن سلامت عظیمي – نشه یي توکو سره د مبارزې وزارت

۱۴- ډاکټره فریده مومند – لوړو زده کړو وزارت

۱۵- ډاکټره مېرمن نسرین اوریاخیل – کار، ټولنیزو، شهیدانو او معلولینو چارو وزارت

۱۶- علي احمد عثماني – اوبو او انرژۍ وزارت

د ګډ حکومت شاوخوا ۸ میاشتې تیریږي خو لا هم کابېنه بشپړ نه ده. په وروستي ځل د ۸ وزیرانو د باور رایې اخېستو وروسته شاوخوا ۲ میاشتې تیریږي چې ګډحکومت خپل پاتې ۱۶ وزیرانو ولسي جرګې ته معرفي کوي.

اوسمهال له ۸ وزارتونو او ۲ ولایتونو پرته نور ټول ولایتونه او وزارتونه د سرپرستو وزیرانو او والیانو لخوا اداره کیږي.