پخپلو کورونو کې کښېنئ

لیکوال: حامد افغان

یو وخت رسول الله صلی الله علیه وسلم د اخیري زماني سختي فتنې یادولې صحابه کرامو ورته وویل: موږ ته لاره راوښیه په هغو فتنو کې به څه کوو؟ رسول الله صلی الله علیه وسلم ورته وفرمایل: ځانونه د خپلو کورونو ” حلس ” وګرځوئ یعني په خپلو کورونو کې کښېنئ له کورونو مه وځئ. كونوا أحلاس بيوتكم. رواه أبو داود. ” حلس ” په عربي کې د اوښ یا آس د ملا هغې نرۍ ټوکړې ته وايي چې له کتي لاندې یې پرې اچوي، دا راز د کور توشکو او فرشونو ته هم ” حلس ” ویل کیدلی شي. پوره حدیث او ژباړه یې لاندې ده:

رسول الله صلی الله علیه وسلم فرمايي: ستاسو مخته داسې فتنې رارواني دي لکه تکه توره شپه، سهار به سړی مومن وي بیګا ته به کافر وي، بیګا به مومن او سهار به کافر شوی وي، په دې فتنو کې له ولاړ سړي نه ناست ښه دی، او ولاړ له روان نه ښه دی، روان له منډي وهونکي نه ښه دی، صحابه و وویل: په دې فتنو کې موږ څه وکړو ته موږ راته ووایه؟ رسول الله ورته وویل: له خپلو کورونو مه وځئ.
عن أبي موسى رضي الله عنه قال : قال رسول الله صلى الله عليه وسلم : إن بين أيديكم فتنا كقطع الليل المظلم ، يصبح الرجل فيها مؤمنا ، ويمسي كافرا ، ويمسي مؤمنا ، ويصبح كافرا ، القاعد فيها خير من القائم ، والقائم فيها خير من الماشي ، والماشي فيها خير من الساعي . قالوا : فما تأمرنا ؟ قال :كونوا أحلاس بيوتكم. رواه أبو داود.

نن سبا کټمټ هماغه د سختو او تورو فتنو زمانه ده او ګام په ګام فتنې ویړي او خپرې دي، دا فتنې دومره زیاتي دي چې د دې حدیث له لارښووني سره سم له ولاړ سړي نه ناست هغه ښه دی، ځکه فتنې زیاتي دي ولاړ ژر په کې اخته کیدلی شي نسیت ناست سړي ته، او ولاړ سړی بیا له روان هغه نه ښه دی ځکه روان نسبتا ولاړ ته ژر په کې راګیر کیدلی شي او روان له منډي وهونکي ښه دی.

موږ په سترګو وینو چې هره ورځ په سیمه، ښآر او ولایت کې یوه نه څو څو فتنې راپورته کیږي، بې ګناه خلک په کې قرباني کیږي، او معصومي ویني بهیږي، نو عامو خلکو ته د دې مبارک حدیث په رڼا کې دا توصیه لازمي ده چې هغوی باید له ضرورت پرته له خپلو کورونو ونه وځي، ورک دي دا زموږ او ستاسو حقوق او د حقوقو له پاره نارې سورې شي، وه خلکو سرونه وژغورئ ایمانونه وژغورئ، او او د الله په خاطر لیږ مو عقلونه بیدار او د کار وګرځوې او خپل قاتلان او ستاسو د جیبونو غله وپیژنئ او د هغوی په مداریتوب او مردار سیاست نور ځانونه مه دوکه کوئ، که نور نه پوهیږئ دې ته خو پام وکړئ چې دا په سیاست کې اخته ګنده مخلوق کې کوم یو هم غریب او بې وسه شته، فکر کوم یو هم نشته، هغوی دا شتمنۍ ستاسو له جیبونو تروړلې او ستاسو په وینو یې ساتي، نو ښه خبره دا ده چې دا نبوي توصیه خپله کړئ او پخپلو کورونو کې کښېنئ.