د یمن په جګړه کې پاکستان د سعودي د مرستي څخه انکار وکړ

نن ټکی اسیا (جمعه، وري ۲۱مه، ۱۳۹۴ل): د پاکستان پارلمان پریکړه وکړه چې د یمن په جګړه کې به د حوثیانو په خلاف د سعودي سره مرسته نه کوي، او هلته به خپل پوځونه او الوتکي نه لیږدوي.

سعودي د پاکستان څخه غوښتي وه چې د یمن په جګړه کې دي پاکستان خپله ونډه پراخه کړي، او د حوثیانو په خلاف دي د سعودي ایتلاف غړیتوب تر څنګ یمن ته دي خپل الوتکي او جنګې سمندري بیړۍ ولیږدوي.

د پاکستان پارلمان خپل په ننۍ پریکړه کې وویل چې پاکستان باید د یمن په شخړه کې د یوه جهت پلوي هم ونه کړي، تر څو په راتلونکي کې وتوانیږي چې منځګړي رول ولوبوي، او زیاته کړې چې د جګړې ټول اړخونه باید د خبرو اترو له لاري شخړي حل کړي.

باید وویل شي چې په اوس وخت کې همدا موقف د ایران دی، او درې ورځي وړاندي د ایران د بهرنیو چارو وزیر جواد ظریف سفر وکړ، تر څو د پاکستاني چارواکو او پارلماني غړو سره د یمن په اړه خپل نظر او موقف شریک کړي.

د سعودي په اړه د پاکستان دپارلمان په پریکړه کې راغلي چې دوی د سعودي د امنیت ساتنه خپل فرض بولي، که چیري د سعودي ځمکني حریم او یا حرمینو شریفینو ته څه تهدید مخ شي، نو پاکستان به د سعودي ولس سره څنګ په څنګ ودریږي.

د پاکستان حکومت د پارلمان ددې پریکړي په اړه ډیر څه نه دي ویلي ، بس همدومره یې ویلي چې دوی د پارلمان دغه پریکړي ته ځان ملزم بولي.

سعودي د تیري میاشتي مارچ په ۲۶ باندي په یمن کې د حوثي شیعه ملیشو په خلاف د لسو هیوادونو په پوځي ملاتړ بمبار پيل کړ،  چې اوس یې دریمه اونۍ پيل شوي، او پر ځمکه باندي حوثیانو نور هم پرمختګ کړی، او د یمن تر دوهم لوی ښار عدن پوري رسیدلي دي او د ښار دننه د ولسي ملیشو سره په جګړه بوخت دي.

سعودي په عدن کې ولسي ملیشو ته سپکې او متوسطي وسلې ور غورځولي، او هڅه کوي چې د هغوی په واسطه عدن ښار د حوثیانو او د پخواني ولسمشر علي عبد الله صالح پوځي ملګرو څخه خالي کړي.

سعودي فکر کوي چې ایران او روسیا په یمن کې د حوثي شیعه ملیشو ملاتړ کوي، او غواړي چې د یمن له لاري د خلیج امن ته ګواښ جوړ کړي.