خوږياڼو کې اوه پوليس مسموم شوي

نن ټکی اسیا (يکشنبه، وري۲۳مه، ۱۳۹۴ل): د ننګرهار ولايت خوږياڼو ولسوالۍ وزيرو سيمه کې د يوې پوستې اوه پوليس مسموم شوي دي.

جلال اباد څخه د نن ټکی اسيا همکار وايي، چې تېره ورځ د وزيرو سيمې يوې امنيتي پوسته کې اوه پوليس مسموم شوي او اوه واړه پوليس د جلال اباد صحت عامې روغتون ته لېږدول شوي دي.

د خوږياڼو چارواکي تر اوسه دا خبر نه مني، مګر د نن ټکی اسيا همکار د يوې امنيتي سرچينې له قوله وايي، چې د خوګياڼو وزيرو سيمه کې جهادي ليسې ته څېرمه د خاکسار پاچا پوسته کې اشپز په خوراک کې مسمومونکي توکي اچولي او اوه پوليس يې مسموم کړي دي.

د سرچينې په وينا اشپز د لوخۍ اوسيدونکی دی يوه کلاشينکوف او يوه پيکا له ځانه سره وړي دي.

د مسموم شوو عسکرو د روغتيايي حالت په اړه تر اوسه څه نه دي ويل شوي.