کنسرت ته لګښت دوی ورکوي؛ خو د نبوي سیرت سیالي نه پرېږدي

دادمحمد ناوک
د کندهار سرپرست والي توريالي ویسا د ګډ حکومت له امنيتي سلاکار حنیف اتمر او د افغانستان له لومړ مېرمنې رولا غني نه په تقلید د اسلامي مقدساتو پر وړاندې بل زړور ګام پورته کړ.

توريالی ویسا چې د ده د ادارې په اړه د بېنوا انځوریز د شراب کباب راپور بسنه کوي، په کندهار کې د جمعیت اصلاح افغانستان له لوري د نبوي سیرت سیالۍ ته اجازه نه ورکوي، تر دې وړاندې مې یو ځای لوستي و، چې د کندهار والي د کندهار ټول کتابپلورونکي ور غوښتي و او ګواښ يې ورته کړی و، چې که چا داسې کتابونه خرڅ کړل، چې «افراط» پکې و، دوکان يې په هماغه شېبه ور تړو، هغه مهال دوکاندارانو انګېرل چې د والي مقصد نبوي سيرت او د جهاد اړوند کتابونه دي؛ خو دا خبره پوره یقيني کېدلی نه شوای، مګر نن کاناډايي ریبوټ پخپله ثابته کړه چې له نبوي سیرت نه وېره لري.

د جمعیت اصلاح افغانستان؛ فعالانو چې تل يې د دیني او فرهنګي خدمت شمله لوړه ساتلې، تر اوسه هیڅ داسې کوم اقدام نه دی کړی، چې والي ته د دوی – خدای مه کړه بد توب – پلمه په لاس ورکړي، خو بیا هم توریالی ویسا بې له کوم منطقه په کندهار کې د جمعیت اصلاح فعالان نه پرېږدي، چې د سیرت ستوري سیالي ترسره کړي. ښايي دا د اسلامي مقدساتو د توهين او له اسلامي فرهنګ سره د خلکو د اړیکو د شلولو هغه لړۍ وي، چې پیل يې حنیف اتمر د مدرسو د بندېدو په غوښتنه کېښود، رولا غني د حجاب د بندیز ملاتړ وکړ او ایکسپریس تر دوی هم وړاندې ګامونه واخیستل.

حضرت محمد صلی الله علیه وسلم نه یوازې د مسلمانانو بلکې د ټول عالم رحمت دی، که پخپله همدا توریالی ویسا په غړولو سترګو او د کاناډا له مغز مینځنې نه پرته دغه نبوي سیرت مطالعه کړي، بیا فکر نه کوم چې لور دې يې له ده نه زرګونه کیلو متره لرې نیمه بربنډه د نورو غېږې ګرمې کړي.

توریالي ویسا که نبوي سیرت سره د کرکې لپاره هر دلیل لري، خو افغان ولس ته دا په ډاګه کوي چې – غني افغانستان ـ د اسلامي فرهنګه له هستۍ تش، خالي او پوچ افغانستان، د دوی تمه ده، چې د ولسي باورونو په ازمويېلو به ورو – ورو مخ پر وړاندې ځي؛ که د اسلامي مقدساتو پر وړاندې افغان ولس ويښ پاتې شوی وای، ښايي یو کاناډايي د غازیانو په ټاټوبي – کندهار ـ کې دا جرئت نه وای کړی، خو له پیله ګډ حکومت ولس پخپل ځان اخته کړ، لوږه، فقر، بې کاري او ګڼې نورې ستونزې يې ورته وزېږولي چې ان ولس د خپلو باورونو د غچ لپاره هم شېمه نه لري.

توریالی ویسا او د هغه همفکره په يو داسې هېواد کې چې اوسېدونکو يې د نبوي تګلارې د پلي کېدو په تمه زرګونه ککرۍ له لاسه ورکړې، داسې غږ په دومره جرئت پورته کوي، چې ممکن دوی زموږ په رګو کې د نبوي مينې جذبې مړې لیدلې وي. د ویسا دغه زړورتیا سړي ته دا اندېښنه ور اچوي چې په مسلمان افغانستان کې د اسلامي ارزښتونو ساتنه هم د یو قشر دنده ګڼل کېږي؛ خو ويسا دې یو څه موده له خولې بوتل لري کړي ښايي خپله پرېکړه بېرته واخلي، کنه ستاسو ډيموکراسي ولس ته د خپلو ارزښتونو د دفاع حق ورکړي.