ما ولي اسلام قبول کړ؟ (۴)

ژباړه او غورچاڼ: عبد الغفار جُبیر

د عربی نړۍ يو نړيوال (آ[1]رچ بيشپ) يسوع البشير مسلمان شو!!!

اوسنی نوم يې محمد البشیر دی، هغه وايي اوسنی بایبل دحضرت محمدصلی الله علیه وسلم پرنبوت اوختم نبوت باندي ګواه دی!!!

یسوع البشیر یو ډېرمتعصب عیسایي مذهبي مشر وو، د ده ټول ژوند د مسلمانانو په وینو سره وو، مطلب دا چي دده دنده دا وه چي د مسلمان امت پر ضد يې د هرې لارې څخه کاراخیستی، کله به يې د مسلمانانو پر ضد داسی سخت بیانونه پر رسنیو ورکول چي د هټلر ظلم د سړی هیرېدی، د اسلام د مبارک دین پر ضد يې ډېر کتابونه لیکلی دي، خو د حقیقت په درک کولو سره ورته اسلام دومره محبوب شو چي اوس دی کومې مرکې پر انټرنیټ باندی ورکوي، د ده هیڅ ځواب بې ژړا نه دی، او د ملغلرو په شان اوښکې يې پر سپین مخ باندی روانی دي، او پخپلو هغو ټولو کړونو باندی چي ده د اسلام پر ضد کړیدي د یوه لوی الله جل جلاله څخه په ډېره عاجزۍ سره بخښنه غواړی، د ده د مسلمانېدو لیکنه په لومړی ځل په یوه عربی ویب پاڼه باندی په عربی ژبه خپره شوه، چي بیا پر ډېرو ویب پاڼو باندی په انګلیسې ژبه او په دې ورستیو کي په اردو ژبه هم خپره شوه؛ ټوله عیسایي نړۍ او په ځانګړې ډول واتکان ورته په دې حیران دی چي د ده په شان سخت  عیسايي مذهبي سړی څنګه مسلمان شو؟؟؟

ایا یسوع البشیر د روپو د طمع له کبله مسلمان شو؟؟؟

ایا د رتبې د لاسته را وړولو په صورت کي مسلمان شو؟؟؟

د څه ګواښ، ګوت څنډنې او یا هم د مرګ اختار ورکول شویدی؟؟؟

د حیثیت، د نوم او نښان د لوړېدو په طمع مسلمان شو او که بل څه يې شا ته دی؟؟؟

د ده په هکله داسی په سلهاوو پوښتنې کيږي، خو محمد البشیر داسی پوښتنو ته پخپله ځواب ورکوي او هغه وایی: ((هغه سړی دی ړوند شي چي واقعیت او حقیقت وینی او خپله لاره ورڅخه چپوی، تر اسلام په عیسائیت کي روپۍ ډېرې دي، حیثیت ډېر دی، ارزښت ډېر دی، رتبه نوم او نښان ډېر دي، خو د اسلام په را وړولو سره زما او د یوه عادي مسلمان هیڅ توپیر نشته او کېدای شی چي یو عادي مسلمان لا هم تر ما ډېره ښه رتبه د لوی الله جل جلاله په وړاندی ولري، او زه هیڅ د دې احساس نه کوم چي زه دي تر ادنی مسلمان هم ښه یم؛ او دا یو کوټلی او منلی نړېوال حقیقت دی چي د اسلام مبارک دین به پر مخ ځی، دا ځکه چي کوم عقل، فکر او دماغ چي یوه خبره ومنله او د زړۀ تل ته ولوېده هغه بیا نه ایستل کيږي، لاسونه به غوڅ کړل شی، پښې به پرېکړل شی، سترګې به ویستل شی او یا هم به ړندې کړل شی، غوږونه به پرې او یا هم کاڼه شی، خو!!! د زړۀ د تل ملغلرې  چي اسلام را وړل دي وبه نه ووځی او قسم په هغه رب چي زه يې پیدا کړی یم، خاتم الانبیاء صلی الله علیه وسلم يې پیدا کړی او بیا يې ټول بشریت ته د خپل استازی په ډول سره را لیږلی ، او عیسی علیه سلام يې په (کن فیکون) سره پیدا کړی، او بیا يې یهودو ته را لیږلی دی، چي اسلام یو حق دین دی، او که هر څوک د اسلام د حقانیت په هکله کوم معلومات ایا هم معقول تفصیل غواړی زه په شپه او ورځ کي (۲۴) ساعته ورته حاضر یم او دا زما لپاره یو نه هېرېدونکي ویاړ دی۔))

محمد البشیر د ډېرو پوښتنو ځوابونه لیکلی دي، او هیڅ داسی پوښتنه نشته چي بې ځوابه وي، او د ده د شخصي ژوند په هکله هم زښته ډېر معلومات خپاره شول، د ده کړنې او لیکنې ټولې پکښې دي، چي د دې د را غونډولو څخه یو کتاب جوړېږي، دا ځکه چي دی یو محقق وو او دی یوه نړېواله پېژندل شوې څهره ده، یو منلی شخصیت دی، خو زه تر هر څه را تېرېږم او د ده مهمې لیکنی ته راځم او دا درته په لنډه توګه سره راوړم، دا چي دی ولي مسلمان شویدی؟ دی يې پخپله ځوابوي۔

د محمد البشير ليکنه:

زه هغه خدای جل جلاله ته ثناء وایم چي د اسلام زړی يې زما په زړۀ کي شین کي، او د ده پر رالېږل شوي استازی او خوږ پېغمبر خاتم الانبیاء صلی الله علیه وسلم باندی درود شریف وایم او ټول امت محمدي ته سلامونه ډالۍ کوم، زه خپل تاريخ، کړنو، ژوند پیښو ته نه راځم د مطلب خبرو ته راځم ، دا چي زه څوک یم؟ څه مي کړی دی؟ او څنګه شخصیت یم؟ دا ټولې خبرې یوې خوا ته ایږدم او په اصلي لیکنه باندی پیل کوم ۔ ما په عیسائیت کي پر عیسائیت باندی ډېر کتابونه لیکلی دي، د کلیسا او صلیب لپاره مي ډېر زحمتونه ګاللی دي، پلټنې مي کړی دي، دا ځکه چي تحقیق زما د ژوند یوه برخه وه، او ده، نو ځکه ما ته د محقق المذهب لقب هم راکړل شوی وو، په برطانیه کي د انګلیکن کلیسا لخوا څخه همېشه کانفرانسونه غونډې او جرګې جوړېدلې، چي کله به د عیسائیت پر خپرېدو بحث وو، کله به پر قرآنکریم، کله هم د مذاهبو مقایسه، خو دا ځل یو علمي سمینار جوړ شو، او ما ته په پټه سره د ګډون خبر راکړل شو، دا ځکه چي زما ګډون پکښې اړین وو، او ما د تل په شان د قضيې پر میکانیزم باندی تر داسی اندازې پوری کار کاوه چي څیړنه به سل په سلو کي کامیابه برېښېدل  کله به په ځینو فیصلو کي کاتولیکا نو راسره د بحث رېښې اوږدې کړې، او دوی به د تل په شان دا کوښښ کاوه چي زموږ مخ ته خنډ شی، او ډېر کوښښ يې داوو چي زموږ ملګري او مذهبي مشران تر فشار لاندی راولی، او خپلې لارې ته يې واړوي، چي د دوی دا ارمان به پوره نشی، خو دا منو چي د دوی اغیزې په نړېواله توګه سره ډېرې دي، او د برطانیې وزیراعظم توني بلیر يې هم زموږ د کلیسا څخه کاتولیک ته واړوی، او په بلېر دوی د ډېره وخته پسې وه، او د څو مختلفو مرحلو د فشار د حس کولو په صورت کي تونی بلیر واوښتی۔

زموږ ټولې پریکړې به همېشه پر تحقیق ولاړې وې، نو ځکه زموږ هره فیصله او پرېکړه بیا نه ده رد شوې او ښه نتیجه يې هم هر وخت ورکړېده، د عیسایانو د عمومی مُنشی له خوا څخه یو علمي سمینار په پټه توګه سره را وغوښتل شو، چي په دې سمینار کي د کاتولیک، انګلیکن کلیسا، پروتستانو اوارترودوکسو ته بلنې پکښې ورکول شولې، چي د سمینار اجنډا دا وه چي ایا د بایبل په مقدسو نسخو کي د اخری نبی حضرت محمد صلی الله علیه وسلم وړاندوینی راغلی دي؟، چي ورته د (فارقلیط) لفظ په یونانی او په هره ژبه که ورته یو نوم  ورته استعمال شویدی، او ډېر نور ایاتونه شته چي په ښکاره ډول سره د محمد صلی الله علیه وسلم پر نبوت او ختم نبوت باندی ګواهې ورکوي، نو موږ ته په کار ده چي په راتلونکو ورژنو[2] کي د دې لپاره یوه چاره ولټوو، دا ځکه چي ډېر مسلمانان زموږ سره د بایبل په دې ایاتو باندی حجت کوي، او موږ بې ځوابه کيږو، کانفرانس درې ورځې دوام درلودی، خو هیڅ ونشول، دا ځکه چي موږ پخپلو کي سره وران او ډېر اختلافات مو درلودل نو ځکه مستقیما ما پر دې موضوع باندی تحقیق پیل کړی چي دا موضوع تر یوه ځایه پوری ورسوم؛ چي په پایله کي د همدې پلټنې له کبله می اسلام ته هم لاره پیدا کړل، په عربی انجیل کي دا نویشته دی:
لکنی اقول لکم الحق انه خير لکم ان انطلق لانه ان لم انطلق لا تاتيکم المُعزی ولکن ان ذهبتُ ارسله اليکم (انجیل یوحنا ۱۶: ۷)
ژباړه: لاکن زه تاسو ته روښتیا خبره کوم او دا ستاسو لپاره خیر ده، چي زه ځم او تر څو چي زه نه یم تللی هغه (المعزی) یعنی مرسته کونکي، او تسلې ورکونکي تاسو ته نه راځی، او کله چي زه ولاړ شم هغه درته رالېږم .
په یوناني بایبل کي د (المعزی) پر ځای فارقلیط استعمال شویدی، او په انګرېزې بایبل کي ورته  (Comforter) یعنی تسلې ورکونکي، او د سبب د رحمت په معنی دی، چي د افریقایي په زولو ژبه کي ورته (uMthokozisi), (Trooster),  راغلی دی، چي د دې ټولو معنا د علم اللغت د علم پر بنسټ (احمد او محمد) دی، او یا دې ته ورته معناوې لري، او زما د تحقیق مطابق په ځینو زړو عربې نسخو کي د دې لفظ پر ځای (محمد) او (احمد) هم راغلی دی، لکه پر برناباس بایبل کي، د المعزی پر ځای باندی، نو که دلته د مشفق او یا مهربانه په معنی سره راشی نو قرآنکریم د دې تصدیق کوی:
لَقَدْ جَاءَكُمْ رَسُولٌ مِنْ أَنْفُسِكُمْ عَزِيزٌ عَلَيْهِ مَا عَنِتُّمْ حَرِيصٌ عَلَيْكُمْ بِالْمُؤْمِنِينَ رَءُوفٌ رَحِيمٌ ﴿ التوبة ١٢٨﴾
ژباړه: خامخا په تحقیق راغلی دی تاسی ته یو رسول له جنسه ستاسی چي ډېر سخت دروند دی پر ده باندی هغه کار چي تاسی تکلیف مومئ، ډېر حرصناکه دی په تاسی خاص پر مؤمنانو باندی نهایت شفیق ډېر مهربانه دي.

وَمَا أَرْسَلْنَاكَ إِلَّا رَحْمَةً لِلْعَالَمِينَ  (سورت الانبیآء: ۱۰۷)

او نه يې لېږلې موږ ته (ای محمده) مګر رحمت لپاره د ټولو عالمیانو لپاره۔

نور بیا…

— لمن ليك —
[1]  آرچ بیشپ Arch Bishop یعنی لوی بیشپ، داهغه عیسایی راهب دی چي دیوې علاقې دټولوکلیساؤسرپرستی په واک کي لري، لکه دانګلنډ دکلیساؤارچ بیشپ، (آرچ) دستراولوی په معنا سره دی.
[2] (ورژن  یعنی بيل متن، چي مطلب ورڅخه دادی چي اوسنی بایبل څوورژنونه لری، چي هرورژن دبل څخه بيل دی، په  یوه متن کي، یوورژن ۶۶ کتابه دی، بل ورژن ۷۳ کتابه دی، په یوه ورژن کي یوایات شته خوپه بل کي نشته چي ورژن دژباړې څخه ډېرتوپیرلری)

د نن ټکی اسیا موبایل اپلیکیشن
avatar
2 د تبصرو شمېر
0 د ځوابونو شمېر
0 ار ایس ایس کې ګډونوال - څارونکي
 
ډېر غبرګون شوې تبصره
تر ټولو ګرمه موضوع
  ګډون وکړئ  
نویو زړو ډیرو خوښو شویو
خبرتیا غوښتل د
rehmat jan
میلمه
rehmat jan

پدالیکنی سی متصیلی سی دیری به مفیدی وی

الحاج استاذ بیانزی
میلمه
الحاج استاذ بیانزی

هو ، په رښتیا الله ج دی زبیر ورور ته اجرونه ورکړی ، چه مونږ یی د اسلام د داسی اوله کی ستر دښمن او بیا وروسته د اسلام د ستر دوست او معتقد د مسلمانیدو څخه خبر کړو ، هره ورځ ، هره اونی او هره میاشت او کال په زرونو خلک په اسلام مشرف کیږی مګر څینی ډیر همیت لری لکه دا چه عیسوی عالم او په څنګ کی یی اسلام او مسلمانانو سره ډیره کرکه لرله او د هغه کرکو په اړه یی لیکنی او کتابونه لیکل او بلاخره مسلمانیږی ، که زما دا تبصره ورته ژباړلی… نور لوستل »