ملالۍ شينوارې: د «پګواش» سيمينار مې د طالبانو په اړه تصور بدل کړ

نن ټکی اسیا (سه شنبه، غويي ۱۴مه، ۱۳۹۴ل): په قطر کې د پګواش مؤسسې له لوري د «افغان ډیالوګ» تر سرلیک لاندې د دوه ورځني سیمينار ښځينه ګډونواله ملالۍ شينوارې وايي چې دې سيمينار يې د طالبانو په اړه پخوانی تصور چورلټ بدل کړ.

ملالۍ شينوارې چې د دوو نورو افغان مېرمنو لېنا او وږمې سره یوځای په دې سیمينار کې برخه اخيستې وه، پژواک خبري اژانس ته ويلي چې تر دې وړاندې يې د طالبانو په اړه بل تصور درلود.

هغه وايي چې دې له طالبانو سره مخامخ په پوره جرئت خبرې کړې دي، وايي: «دغه راز مې ورته وويل چې زه له تاسو ډارېدلم چې تاسو به له ماسره خبرې وکړئ او که نه، خو هغوى وخندل او راته يې وويل چې اوس دې نظر بدل شو او که نه ؟»

ملالۍ شينوارې وايي چې طالبانو پخپله وينا کې هم د ښځو په هغو حقونو ټينګار وکړ، چې اسلام ورکړي دي او په خبره يې د دې له وينا وروسته او له افغان ښځو سره په ځانګړې ناسته کې دویم ځل طالبانو پر دې ټینګار وکړ، چې دوی به د ښځو هغه حقونه نه تلف کوي چې اسلام ورکړي دي.

دغه افغان مېرمن چې د سمون خوځښت په نامه د ډلې غړې، د بې بې سې پخوانۍ خبرياله او د ولسي جرګې وکیله پاتې شوې ده وايي چې طالبانو د ګډ حکومت او د پخواني ولسمشر حامد کرزي په واکمنۍ نيوکې وکړي، چې د ښځو د حقونو په برخه کې پاتې راغلي دي.

د نوموړې په خبره طالبانو د شکريې بارکزۍ مثال ورکړ، چې د دولت یو مشر يې ټاکي خو بل يې له واکه بېرته لري کوي، پر دې سربېره يې د فرخندې موضوع څو ځله تکرار کړه.

دا وايي چې طالبانو د افغان ښځو اړوند وویل چې دوی پر دې ټینګار کوي چې ګواکې دیارلس کلنې لاسته راوړنې دې وساتل شي، د ملالۍ شينوارې په وینا طالبانو د پوښتنې په شکل وویل چې کومې لاسته راوړنې، دا چې یوه بېچاره ښځه «فرخنده» د ښار په منځ کې د اوباشانو له لوري ووژل شوه؟

ملالۍ شينوارې د طالبانو له چلنده خوښه برېښېده او پر دې يې اعتراف وکړ چې تر دې وړاندې ورته بل ډول تصور ورکړل شوی و، خو دې سیمينار يې تصور بدل کړ.

دا وايي چې د سیمينار طالب شریکوال عباس ستانکزي ورته وویل چې ښځه د زده کړو خپل حق لري، خو دا چې دوی د خپلې واکمنۍ په وخت ورسره مخالفت کاوه د ښځو د عزت ساتنې او اقتصادي کمزورۍ فکتورونه و.

دغه سیمينار چې د غويي په «۱۳-۱۴» ورځو کې دایر شوی و، نن ټکی اسیا ته باوري سرچینو په ډاګه کړې چې د نوموړي سیمینار عمومي فضا د افغان چارواکو د توقع برعکس د طالبانو په ګټه راوڅرخیده او د طالب پلاوي د وینا اغیز د کنفرانس په ټولو ګډونوالو ښکاره وه.

ياده دې وي نږدې څوارلس کاله د طالبانو اړوند دولتي رسنيز تبلیغات د ځینو عامو وګړو په شمول د سیاسیونو نظر هم بدل کړی دی، خو د ملالۍ شينوارې په څېر ښايي له طالبانو سره مخامخ ناسته د ډېرو هغو نظرونه بدل کړي چې د یو طرفه تبلیغاتو ښکار او فکري محاصره دي.