نظــر

څو نوي انکشافات او لنډې تبصرې

police-killed-a-demonstratorشړۍ مې نه پریږدي  !!

په افغانستان کې دامریکا سفیر راین کراکر پرون له سي این این تیلویزوني چینل سره په مرکه کې ، په افغانستان کې  امریکایي بوختیا دپخوا هرکله په نسبت  په بل ډول توجیه کړې ده ، نوموړي داسې ښوولې لکه امریکاچې بې له شکه دسریښو په ډنډ کې غوپه وي ، چې نه پرشا اونه دپرمخ تلو مجال لري .

کراکر ویلي  ، که په افغانستان کې اوس موږ جګړه بس  کوو  ، طالبان یې نه بس کوي ، دیوه مطرح امریکایي چارواکي په توګه که دکراکر دا خبره  له لس کاله وړاندې امریکایي دریځ سره پرتله کړو ، نو سړي ته  هغه یوه  ولسي کیسه وریادوي .

وایي یوځای سیلاب راغلی وو څو تنه  یې په غاړه روان  وو دیوه نظر داوبو په منځ کې په یوه تور شي ولګېده ، نورو ته یې وویل چې هغه ده سیلاب شړۍ را اخیستې غواړم چې راویې نیسم ، اوبو ته یې ورټوپ کړل ، کله چې خواته ورغی ګوري چې هغه شړۍ نه بلکې  اوبوراخیستی دغره زمری دی ، کله چې ورنږدې شو، نو زمري پرې حمله کړه او ټینګ یې راګیر کړ ، سړی له زمري سره په  جنجال ډیر ځنډمن شو ، خو ځان یې ترې نه شو خلاصولی ، ملګري یې چې داوبو په غاړه ورسره روان دي ، ورته وایي  راځه پریږده چې شړۍ را کښلی  نه شې تېر له دې ګټې ، خو لامبوزن ځوان  ځواب  ورکوي ، په ماکې ګرمه نه شته  ، زه خو یې پریږدم خو  شړۍ مې نه پریږدي  !!

ما چه میګیم دمبوره ای اوباما چه میګه

باید ووایو چې  د اوباما له دمبورې  نه  مراد دلته  دامریکا دخارجه چارو هرکاره  هیلري کلنټن ده ، چې پرون دکراکر په چم دې هم یوه نادره توغولې ده .
په افغانستان  کې دافغانانو د ( مؤمن به ) کتاب  قرانکریم دبي حرمتۍ په خلاف سختې مظاهرې رواني دي ، چې تقریبا  یوه سرتاسري اولسي پاڅون ته پاته کیږي  ، عام اولس ، طالبان  او حتی دکابل پارلمانیان ټول د هیجان ترپولې په احساساتو کې دي ، او په خپل حق کې دشوي تیري حساب غواړي ، خو هیلري کلنټن   له مراکش څخه  فرمان صادروي ، چې  ( په افغانستان کې مظاهرې  (( باید )) پای ته ورسول شي )

نه پوهیږو ، امریکایان د ( باید ) په معنی نه پوهیږي  اوکه  داستعمال مورد یې  ترې ورک دی ، چې ځای بې ځایه یې له خولې راوباسي  ، آبله ورځ چې په داخله وزارت کې  څو امریکایان  ضربه شول ، هم دامریکا دفاع وزیر  وویل ( داراته دمنلو نه دي او  نباید(!) داسې  وشي )

کلنټن  ته به ووایو ، چې آغلې  افغانستان  ( افغانستان ) دی ، مراکش نه دی   چې دومره یې سرنوشت ستاسو په (  باید او نباید )کې را ایسار وي  ، اوسني حالات ایجابوي ،چې نور افغانان  لږ  له سره وپیژنئ ، له باطني دوک او درد نه یې خبر شئ ، او احساساتو ته یې درناوی وکړئ  ، داسې کبرجن او لیوني اظهارات پرته له دې چې ستاسو لودګي په اثبات ورسوي ، دافغانانو په خپلواک دریځ  او پاڅو ن هیڅ اغیز هم نه شي ښندلی ، دمظاهرو دپای  ته رسولو په اړه ستاسو په  ( باید ) دمزین  فرمان په غبرګون کې  ښایي افغانان ووایي چې  :  آغلې !  زه درنه پوزه پریکوم او ته رانه پیزوان غواړې !!!

خپله  او پردۍ  یا سپکه او درنه وینه

استاد شپون  چې اکثره وخت یې لیکنې ګپ شپ وي ، مګر کله بیا  ډیر فلسفیانه غږیږي ، یو وخت یې ویلي وو ( وینه که دهرچا وي  سره او درنه ده )  ښایي شپون به دا قضاوت د ( هیومن رایټس واچ ) له دریځه کړی وي ، خو په حقیقت کې په وینه کې هم خپله او پردۍ  شته ، چې له همدې ځایه دپردیو تجاوزګرو وینه  دخپلو هیوادوالو په نسبت سپکه تلل کیدای شي .
 خو نن سبا چې له ځمکې او اسمان پرته هرڅه سرچپه شوي دي ، دغه معادله هم معکوسه بریښي  ، په تیرو څو ورځو کې دافغانستان په بیلابیلو سیمو کې دافغانانو په مظاهرو کې دکابل رژیم دپولیسو په ډزو نږدې ۵۰  تنه  افغانان شهیدان شوی او سلګونه نور ټپیان شوي دي ، ددې افغانانو دوینو په تویېدلو باندې چې  عاملین یې دکابل چارواکي دي ، تراوسه  هیڅ یوه چارواکي هم نه بښنه غوښتې او نه یې پرې عادي تبصره کړې ده .
خوڅو ورځې وړاندې چې په  داخله وزارت کې امریکایي سلاکاران ووژل شول ، دکرزي ددفاع وزیر عبدالرحیم وردګ سمدستي واشنګټن ته تیلفون وکړ ، ددې امریکایانو دوینې په تویدلو یې ژوره خواشني څرګنده کړه ، دهغوی وینې یې  د افغانستان لپاره ډیرې  ( درنې او قیمتي ) وبللې او له امریکایانو بښنه وغوښته چې دا وینې تویې شوې .
له دې دوګانه  برخورد څخه افغانان په اسانه فهمولی شي ، چې د ارګ  دوکدارانو په تله کې دچاوینې درنې او دچا سپکې دي !!!

زخمي افغان
 

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
ستاسو نظر مونږ ته دقدر وړ دی، راسره شریک یې کړئx
()
x