که غواړئ ماشومان مو له ناروغیو وژغورئ؛ ډیره مالګه مه استعمالوئ

نن ټکی اسیا (سه شنبه، غويي ۲۸مه ۱۳۹۴ل): مالګه د روغتیايي کارپوهانو له نظره سپین زهر ګڼل کیږي خو وروستیو څیړنو ثابته کړه چې دغه خواړه نه یوازې مشران بلکه ماشومان هم په مختلفو او مهلکو ناروغیو اخته کولی شي.

د نوې څیړنې پر بنسټ د مالګې زیات استعمال نه یوازې دا چې د ماشومانو د بلوغ مرحله له ځنډ سره مخامخ کوي بلکه په راتلونکي کې د هغوي تولیدي نظام هم زیانمنولی شي.

د دغې څیړنې پر بنسټ په ماشومانو کې د ټاکل شوي اندازې څخه درې یا څلور چنده زیاته مالګه استعمالول په ماشومانو کې د څو مهلکو ناروغیو لامل ګرځي او ماشومان په ژور خپګان هم اخته کولی شي.

د ایرلینډ په ډبلن ښار کې یورپین کانګریس اف اینډوکراینالوجي برخې ته وړاندې کیدوونکی دغه څیړنه چې د لومړۍ ځل لپاره ترسره شوې پر بنسټ موږکانو ته د مالګې مختلفې اندازې ورکړل شوې او کله چې د مالګې اندازه درې یا څلور چنده زیاته شوه نو تر څیړنې لاندې موږکانو کې د بلوغ د مرحلې د ځنډیدو لامل شو.

په دغه څیړنه کې د څیړونکو په وینا تر ټولو جالبه خبره دا ده چې هغو موږکانو ته چې مالګه بیخي نه وه ورکړل شوې هم په ځنډ سره د بلوغ مرحلې ته ورسیدل.

روغتیايي کارپوهانو په وینا د مالګې زیاته اندازه استعمال له یاد شوی زیان پرته د انسان تولیدي نظام هم زیانمنوي او د اولاد پیدا کولو پر وړتیا منفي اغیز لري.

د روغتیا د نړیوالې ادارې په وینا هر انسان باید د ورځې یوازې پنځه ګرامه مالګه استعمال کړي چې له دې زیاته اندازه نه یوازې مشران بلکه ماشومان هم په مهلکو ناروغیو اخته کولی شي.

د نن ټکی اسیا یوټیوب چېنل
avatar
  ګډون وکړئ  
خبرتیا غوښتل د