
هلمند: طالبانو د ۱۷ عسکرو له وژلو وروسته پوسته نیولې
نن ټکی اسیا (شنبه، غبرګولي ۲مه، ۱۳۹۴ل): تېره شپه د هلمند په نوزاد ولسوالي کې د امنيتي ځواکونو په یوه پوسته د طالبانو په بريد کې ۱۷ عسکر ووژل شول او پوسته د طالبانو لاس ته ولوېده.
د نوزاد ولسوالي ودانۍ او د دې ولسوالي ځينې دفاعي پوستې د شپې په نهه بجې د طالبانو تر بريد لاندې راغلې، چې له درې ساعته وروسته طالبانو د سرکاڼو پوسته له منځه یووړه.
طالبانو په خپره کړې خبرپاڼه کې ويلي چې د دوی ملګرو د عزم عملياتو په لړ کې تېره شپه په دې بريد کې د سرکاڼو پوسته له منځه وړي او پکې يې ۱۲ عسکر وژلي او یو بل يې ژوندی نیولی.
د دوی د خبرپاڼې له مخې په دې پوسته کې يې د ۳۵ پیره راکټي مرمو او ۸۰ پیره هاوان په ګډون ګڼ شمېر سپکې او درنې وسلې هم تر لاسه کړې دي.
طالبانو دې پوستې پر ر روان مرستندوی کاروان هم بريډ کړی، چې د دوی په خبره ۵ تنه يې پکې وژلي او ماتې يې ورکړې.
طالبانو په دې جګړه کې د خپلو دوو ملګرو د وژل کېدو او دوو نورو ټپي کېدل منلي دي، خو د هلمند سیمه ییزې ادارې د دې جګړې اړوند تر اوسه څه نه دي ويلي.
یاده دې وي هلمند یو له هغو ولایتونو نه ګڼل کېږي، چې په ګڼو ولسوالیو کې يې طالبان پراخ نفوذ لري.