نیو سټیټس مین: د طالبانو چاودنو نړۍ ماته کړه

نن ټکی اسیا (شنبه، غبرګولی، ۱۳۹۴ل): د طالبانو د یوې لسیزې زورورو چاودنو په افغانستان کې د ناټو غړي هېوادونه له ماتې سره مخ کړل.

د لويديځ مشهور ورځپاڼه نیو سټیټس مين د « ولې لویديځ په افغانستان کې ناکام شو؟» تر عنوان لاندې په یوه مقاله کې وايي چې د طالبانو د یوې لسیزې چاودنو نړۍ په افغانستان کې له ماتې سره مخ کړه.

د ورځپاڼې په قول د طالبانو بمي بريدونو د ناټو غړي هېوادونه دې ته اړ کړل چې په دې هېواد کې د خپلو موخو له تر لاسه کولو پرته پښې سپکې کړې.

نیوسټیټس مين د خپلې ادعا د ثبوت لپاره د هغو پوځي کارکوونکو دوه کتابونه د نمونې او اعتراف په توګه ياد کړي، چې په افغانستان کې يې په پوځي برخه کې ماموریتونه ترسره کړي دي او د طالبانو د چاودنو پر زور يې اعتراف کړی دی.

ورځپاڼې د طالبانو د بمي بريدونو له امله د بهرنيانو په منځ کې د وېرې د اثبات لپاره د « کابله خدای پامان، له افغانستانه د څه خطرناکې نړۍ په لور» او « ولې موږ د افغانستان په جګړه او سوله کې بريالي نه شو؟» کتابونه ياد کړي چې د لیکوالو د نومونو له يادولو پرته يې ويلي چې که څوک غواړي په افغانستان کې د بهرنیانو د ماتې پر اعترافاتو او سببونو ځان پوی کړي دغه کتابونه دي ولولي.

طالبانو پخپله څوارلس کلنه مبارزه کې د سړک د غاړي پر بمونو سربېره د موټر بم سرتيري بريدونه هغه جنګي تکتيک دی، چې بهرني او داخلي لوړ پوړي پوځي چارواکي يې پر وړاندې په بې وسۍ اعتراف کوي.