که طالبان راغلل!؟

خوشال درانی

له ډېرو افغانانو په ځانګړې ډول ځوانانو سره دا اندېښنه ده، که چېرې طالبان راشي، نو له عامو افغانانو او ځوانانو سره به څه کوي؟

غواړم په دې لیکنه کې خپل نظر ووایم، زما نظر چې دی، طبعاً د کوم لوري نمایندګي نه شي کولای. روانو حالاتو ته په کتو او د طالبانو د مخکنیو اعلامیو اړوند خپل نظر وایم.

طالبان به په دوو حالاتو کې هېواد ته راځي او په هېواد به واکمن کېږي. داچې له اوسني حکومت سره به سوله کوي او یا خو به اوسنی حکومت سقوط کوي. که چېرې یې سوله وکړه، له ځینو په اصطلاح سرو کرښو به طالبان هم تېرېږي او حکومت هم. په دې غوښتنو کې به هغه غوښتنې نه وي شاملې، چې د اسلام مبارک دین سره په ټکر کې وي.

که چېرې اوسني حکومت سقوط وکړ او طالبان په بشپړ ډول واک ته ورسېدل، نو بیا به هم ځینې شیان مني او ځینو نه به تېریږي. طالبان غواړي دا ځل له نړیوالې ټولنې سره اړیکې ولري تر دې چې د امریکا په ګډون د اسیايي، اروپايي او افریقايي هېوادونو سره ښې ډيپلوماټيکې اړیکې ولري. د طالبانو وروستي دريځونه او په تېره دیپلوماتیک خوځښتونه یې دا خبره کره ثابتوي.

ښکاري چې طالبان د ښځو زده کړې، بشر حقوق، رسنیو ازادي او ځینې نور مدني حرکتونه هم مني او د ټولنې له پاره يې ضرورت ګڼي.

که طالبان راغلل!

اوسني حکومتي چارواکي: زموږ زیاتو خلکو سره دا اندېښنه ده، که چېرې طالبان راشي، نو له اوسنیو حکومتي چارواکو سره به څه ډول معامله کوي؟ دوی به ټول وژني؟ له هېواده به یې بهر وتلو ته اړ کوي او که ټول به په کور کینوي؟

د نړۍ په تاریخ کې به داسې نه وي شوي، چې د یوه نظام له منځه تلو او د بل نظام په راتګ دې د هغه پخواني نظام ټول چارواکي وژل شوي وي. د اوسني نظام زیات لوړ پوړي چارواکي بهر دي او له دندو د پای ته رسېدو سره سم له هېواده تللي او هغه هېواد کې بېرته مېشت شوي، چې د کوم هېواد تابعیت یې درلود. که چېرې طالبان راشي، نو د اوسني نظام زیات او ټولو چارواکو ته به عفوه کوي او په نظام کې به یې ځان سره شریکوي.

ملي اردو: د ملي اردو عسکرو سره دا اندېښنه زیاته ده، که چېرې طالبان راغلل، موږ سره به څه ډول معامله کوي؟ ځينې د کښته کچې ځوان طالبان په اصطلاح دوی ټول مرتد او له دین څخه وتلي بولي، خو مشران طالبان بیا پوهیږي چې هیواد اردو ته اړتیا لري.

که چېرې طالبان راغلل، نو هغوی هم ملي اردو او پوځ ته اړتیا لري او د هېواد ساتلو له پاره نه له اسمانه څوک راکوزلی شي، هغوی به مجبور وي، چې د همدي روزل شویو ځوانانو څخه ګټه واخلي او د هېواد دفاع له پاره په ګډه کاروکړي.

ملي پولیس: ملي پولیس هم د هېواد د کورني امنیت ساتلو له پاره ډېر مهم دي او طالبان مجبور دي، چې د ښارونو او ولسوالیو امنیت له پاره ملي پولیس ولري. زموږ د هېواد هغه ځوانانو سره دا اندېښنه ډېره وي، چې هغوی په نظامي برخه کې دندې ترسره کوي. هغوی تل دا وايي، که چېرې طالبان راشي، نو موږ به ټول ووژني.
نوربیا…

تبصرې (4)

  • طالبان دې له دې خاطر جمع اوسی چې به هیواد کې د شریعت نفاذ سره به نړبوال (کفار او د هغوۍ چاپړوسان) ورسره ښه روابط ولري ځکه دغه نړیوال د یهودو له خوا کله دې ته پریښودل کیږي چې په یو هیواد کې دې اسلامي شریعي قانون نافذ وي او دوۍ دې ورسره ښه روابط ولري ؟؟داسې ښه روابط کله یهودو ته د زغملو دي؟؟؟ هو مونږ افغانانو د وخت سترو فرعونیانو (۴۸ دجالي هیوادونو) ته د الله عزوجل په نصرت ماته ورکړه او په دې لار کې مو یو ځل بیا په زرګونو تنکی ځوانان نر او ښځې شهیدان ورکړل ، د اسلامي امارت له مشرانو څخه دا طمع لرو چې د سعودي ، ایران او نورو اسلامی هیوادونو په شان نیمچه شریعت ته به لاس نه اچوي ، اقتصادی بندیزونو ته تیار یو ، رزاق ذات الله رب العزت دی نه دا کفار او د هغوۍ لاسپوڅی ګوډاګیان ، مونږ هر رنګ ولږې تندې او سختیو ته تیار یو خو دې ته تیار نه یو چې د نړیوالې ټولنې سره داسې څه ومنو چې هغه دې شریعی قانون په مادو کې څه کمی راولي او مونږ دې ورته د شریعت له ځینو مادو څخه تیر شو.....

  • په زړه پوری لیکنه وه الله ج دی لیکونکی ته اجرونه ورکړی ، او مطیع الله خان ورور چه پری بورتنی تبصره لیکلی هغه هم ښکلی وه ، زه ورسره تر ډیره توافق لرم مګر یو ټکی ورسره اضافه کول غواړم ، چه حالات سمدلاسه سمول اسانه خبره نه ده ، یعنی د اسلامی پوره شریعت عملی کولو د پاره هم د خلکو ذهنیتونه مساعد نه دی او دشمنان هم په کمین کی ناست دی ، زه وایم د وخت د حالاتو سره په کتنه او څارنه د اسلامی شریعت یا کامل اسلام نظام د حاکمولو د پاره له اسلامی اخلاقو او اسلامی حکمت څخه کار اخستل به هدف لږ ورو مګر حتمی انشالله ورسوی ، که مونږ تیز رفتاری وکړو هر څه په راڅخه خداناخواسته ګډ وډ پاتی او د دمکر اسی شیطانی نظام به په نړی کی د نړیوال حکومت د تاسیسولو بیرغ علنی پورته کړی .
    زه دا هم نه وایم چه د اسلام په عملی کولو کی د ی سازش وشی ، اسلام د الله ج دین او نظام دی انسان نه شی کولی چه د هغه په شریعت او نظام کی څه کم یا زیات کړی ، صرف د ژر تیز رفتاری سره باید له پوره احتیاط کار واخستل شی ، دوی زمونږ سره دشمنی نه لری زمونږ د سولی د نظام سره دشمنی لری او هغه په دی چه دوی د خلکو د غلامولو او استثمارولو د پاره جنګ ته اړه لری کوم چه د بی عدالتیو په واسطه رامنځته کیږی او اسلامی نظام د پوره سولی او هوساینی ضمانت کوی ، نو دغه الهی او شیطانی نظام کله هم سره شریکیدلی او یا یوځای اوسیدلی نه شی چه یو وی بل به نه وی

  • دراني صیب ! ډېره دلچسپه موضوع ته دې پام شوی او په ډېر ښه انداز دې واقعیتونه ویلی او الله پاک دې نور هم توفیق درکړی ، الله تعالی دې موږ ټول افغانان له بدبختیو وساتي او د زغم او ریښتینولي توفیق دې را نصیب کړي .

  • بیانزی صیب ډیره ښکلی تبصره دی کړیده پردغی موضوع باندی له تاسونه ډیره مننه