ټق چپه کو!

سیف الله مینه وال

سړی چې احساساتي شي، نو خبرې يې تر عقل پر احساساتو ډېرې ولاړې وي. بیا د دې خبرې پروا نه لري چې لږ وروسته به څه کېږي. نن په ولسي جرګه کې د طالبانو له بريد وروسته یو عسکر بې درېغه خوله پرانیسته او بې مبالغې يې د پېړۍ ټوکه وکړه. وزګار فیسبوکیان ورته کونج ته شول او له سړي ببو جوړ کړ، د هغه له شاندارې فارسي ښکارېدله چې سړی مکمل باسواده(!) دي.

د دولت دا اوس یو تکراري عادت ګرځېدلی چې یو عمل په بل پټوي، دوی غوښتل په ولسي جرګه هغه هم د دفاع وزیر د معرفۍ په غونډه دغه بريد چې د دولت ټول واک، ځواک، صلاحیت او مشروعیت يې په صفر کې ضرب کړ، په یوه بله نادره پټه کړې، نو يې د لغماني عیسی خان باټې نږدې پلمه وبلله او دا سړی رسنیو باټ باټ کړ. هغه دعوه کوي چې شپږ فدایان يې په پنځو دقیقو کې له منځه وړي دي.

په لومړیو کې مې زړه ومنله، چې ممکن جګړه همداسې یو کیفیت دی چې وړاندوینه پکې سخته ده او ډېر وخت پایلې سرچپه راوځي، نو دې عسکر به هم شپږ سرتېري په څو ضربو ووژل؛ خو چې د ده څو دقیقه يي ويډيو کليپ مې بیا بیا ولید، ورته حیران شوم، چې هلکه که دروغ وايې هم، نو لږ يې په طریقه وايه چې حد اقل یو مخالف خو يې درسره ومني، ستا موافق او استعمالوونکي خو دې هره ډنډوره بې ځوابه درسره مني په خبره کې که دې لږ استدلال وای، طالبانو به هم درسره منلې وای.

دا عسکر وايي چې په لومړۍ چاودنه کې دی په کانتینر کې ناست و، چې له چاودنې سره يې په سر خاورې خځلې را ولوېدې او منډه يې کړه، ګونډه يې ورته ووهله او فدایان هم بې له کوم جنګي پلانه د ده په لور همداسې کتار را روان دي او دی وايي چې بس ورته کېنستم: ټق چپه کو! ټق چپه کو! په پنځو دقیقو کې مې وايي شپږ تنه ووژل. د فیسبوک هغه ډنډوره چیان چې په بشپړې سپین سترګۍ ځانونه د جګړې مخالفين هم بولي خو د دې عسکر يې دغه باټې رښتيا وګڼلې او په يوه شېبه کې يې سړی اتلولۍ ته ورساوه، د دوی عادت دی چې که يې یوڅوک پوره لسیزه له خپل هېواد سره په بل وپلوري، خو چې بله ورځ یوه خبره ورته کړي سړی اتل شي، توریالی شي او ان په پروفایلو يې عکسونه ولګېږي.

دغه عسکر وايي چې ده له لومړۍ چاودنې سره په پنځو دقیقو کې ټول سرتېري ختم کړل، په داسې حال کې چې د رسنیو ژونديو راپورونو تر دوو ساعتو پورې د جګړې تاييد کاوه، د کورنیو چارو وزارت ویاند خو بیا دا نه منله چې بريدګر دې د پارلمان ودانۍ ته په لس مترۍ کې هم وي هغه ویل چې بریدګرو په یوه تعمیر کې ځای نیولی او له هماغه ځایه جګړه کوي، د کورنیو چارو د وزارت د ویاند مرستیال نجیب دانش بیا د جګړې له پیله یو ساعت وروسته هم د جګړې تاييد کاوه، څو چې یو نیم ساعت وروسته د امنیه قومندان د جګړې د پای خبر ورکړ، خو لا هم خال خال ډزې کېدلې، ښه نو د عیسی خان هوايي ملاتړو، عیسی خان به یا نشه و، یا يې له وېرې اپلاتې وویشتې خو تاسې چې په دفترونو کې ناست او د دې بې سواده ځوان باټو ته افرینونه وایاست دا ووايئ چې:

که دې عسکر له لومړۍ چاودنې وروسته سرتېري په پنځو دقیقو کې ختم کړي وي، نو دا دوه ساعته جګړه له چا سره روانه وه؟
ایا رښتیا هم سرتېري دومره بې پلانه او ړانده وو، چې پرلپسې یې ملګري وېشتل کېدل او دوی لا هم په هماغه لار د عیسی خان د ټوپک په خوا ور روان وو؟
فدایان پارلمان ودانۍ کې وو، که په کوم نیم کاره تعمیر کې؟

هر څوک پوهېږي چې غوا توره او شيدې سپینې دي، د څو سګریټ وهلو ستونو چيغې هغو حنجرو ته نه رسېږي، چې په فرض روژه کې د تکبیر په ملکوتي غږونو د فرعون په کور ورننوتل.