کویت: جومات دننه چاودنې ۱۳ کسان وژلي

نن ټکی اسیا (جمعه، چنګاښ ۵مه ۱۳۹۴ل): د کویت په صوابر سیمه کې د یوه جومات دننه چاودنې ۱۳ کسان وژلي او لسګونه نور يې ټپيان کړي دي.

الجزیره تلویزون د خپل خبریال له قوله لیکلي چې پېښې ځای ته نېږدې روغتون ته ۸ مړي او یو شمېر ټپیان ور وړل شوي چې له منځه يې د پنځو حالت نازک دی.

د راپورونو له مخې د چاودنې له کبله لسګونه کسان ټپيان شوي هم دي.

اناضول خبري اژانس وايي چې دغه چاودنه یوه سرتیري بریدګر د لمونځ پر مهال کړې خو تر دې دمه دغه ادعا کویتي چارواکو نه ده تایید کړې.

ویل کیږي چې دغه جومات د شیعه مذهب ډلې و.

څه موده وړاندې د داعش ډلې په سعودي کې په یوه جومات دننه سرتیری برید کړی و چې له کبله یې لسګونه لمونځ کوونکي مړه او ژوبل شوي وو.

داعش ددغه برید مسوولیت پر غاړه اخېستی و.