«پیشو بیرته راکړئ کنه له داعش سره یو ځای کیږم»

نن ټکی اسیا (چهارشنبه، چنګاښ ۱۷مه، ۱۳۹۴ل): که څه هم د غربي هیوادونو مشران د داعش ډله خپلو هیوادونو ته ګواښ بولي خو د همدغو هیوادونو اوسیدوونکي بیا په زیاته کچه له داعش سره یو ځای کیږي. امریکا، انګلستان او ځینې نور اروپايي هیوادونه هڅه کوي خپل د هیوادو اوسیدوونکي له دغې ډلې څخه لرې وساتي خو بیا هم هره ورځ د دغو هیوادونو اوسیدوونکي په شام او عراق کې د داعش له ډلې سره یو ځای کیږي.

د امریکايي او اروپايي هیوادونو اوسیدوونکي اوس دولتي ادارو ته ګواښ کوي چې که چیرې دولتي ادارې د دوي کار پر وخت او یا هم د دوي د خوښې کار عملي نه کړي نو دوي به د داعش له ډلې سره یو ځای شي.

په دې وروستیو کې د امریکا نبراسکا ایالت د اوماها نومې ښار یو اوسیدوونکی هم سیمه ییزې ادارې ته ګواښ کړی چې که چیرې دغه اداره د نوموړی پیشو بیرته ورنکړي نو نوموړی به د داعش له ډلې سره یو ځای شي او خپل د سیمې له دولتي چارواکو به غچ واخلي.

ایرک نومې دغه ۴۵ کلن سړی یو پیشو ساتلی و خو دغې پیشو ته يي ځانګړی پاملرنه نه کوله. د نبراسکا بشري ټولنې دوه ځلي ایرک ته ګواښ کړی و چې خپل پیشو ته ځانګړی پاملرنه وکړي خو ایرک د بشري ټولنې ګواښ ته هم کوم ارزښت نه و ورکړی.

دوه میاشتې وړاندې ایرک خپل پیشو په خپل اپارتمان کې بندي کړی و او خپله په څو ورځو سفر له ښاره بهر تلی و. د پیشو غږ د ګاونډیانو توجه جلب کړ او د ایرک ګانډیانو هم اړوندې برخې ته په دې اړه معلومات ورکړی و.

د بشري ټولنې کارکووونکي له پولیسو سره د ایرک د کور دروازه ماته کړه او د نوموړی پیشو يي له ځان سره د بشري ټولنې دفتر ته انتقال کړ.

له درې ورځو سفر او چکر وروسته چې ایرک بیرته خپل کور ته ستون شو نو د بشري حقونو ادارې له دغې کړنې څخه خبر شو او په ډیره غوصه يي ادارې مشر ته ټیلیفون وکړ او د پیشو بیرته استولو غوښتنه يي وکړه.

د بشري ټولنې مشر د ایرک په ځواب کې وویل چې پیشو به نوموړي ته بیرته نه سپارل کیږي او پر ځای به يي د نوموړی په خلاف پیشو ته ځانګړې پاملرنه نه کولو له امله به قانوني چلند کیږي. دغې ځواب له اوریدو سره ایرک غوصه شوه او د ادارې مشر ته يي اخطار ورکړ چې که چیرې د نوموړی پیشو بیرته ونه سپارل شي نو نوموړی به د داعش له ډلې سره یو ځای او د دولتي چارواکو څخه به خپل غچ واخلي.

د دغې ګوټڅنډنې په نتیجه کې ایرک د پولیسو لخوا زنداندي شو. پولیسو نوموړی د بشري ټولنې مشر ته د ګوټڅنډنې او له پیشو سره ناوړه چلند په تور بندي کړ. د قانون برخې کارپوهانو په وینا ایرک په پنځه کاله بند محکوم کیدی شي.