افغانستان

بلخ: د جنبش ګوند تر ټولو مخکښ غړی وژل شوی

نن ټکی اسیا (یکشنبه،چنګاښ۲۱، ۱۳۹۴ل) : د هېواد په شمال بلخ ولایت کې د جنرال دوستم په مشرۍ د جنبش ګوند تر ټولو لوپوړی مشر وژل شوی دی.

قوماندان شیر محمد عرب، چې په شیر عرب مشهور و، پرون مازیګر په مزار شریف ښار کې د یوه غلچکي برید په ترڅ کې وژل شوی او دوه تنه ساتونکي يې ټپيان شوي. ویل کېږي بریدکوونکي په تېښته بریالي شوي دي.

د بلخ امنیه قوماندان جنرال عبدالرزاق قادري د نوموړي وژنه تایید کړه او زیاته یې کړه، چې قوماندان شیر عرب تېره ورځ مازیګر د مزارشریف ښار د اتمې حوزې په مربوطاتو کې د ناڅرګندو وسله والو تر برید لاندې راغی او ووژل شو.

د دوستم دغه جګړه ماری داسې مهال وژل کېږي چې جنبش په شمال کې د طالبانو پر ضد خپل نوی ایتلاف اعلان کړی دی.

امنیه قوماندان که څه هم بي بي سي ته ویلي، چې د قوماندان شیر عرب د وژنې په اړه یې پلټنې پيل کړي، خو د نورو جزییاتو له ورکولو یې ډډه کړې.

۵۷ کلن قوماندان شیر عرب، چې د جوزجان د فیض اباد ولسوالۍ اوسېدونکی و، د ولسمشر د لومړي مرستیال جنرال عبدالرشید دوستم په مشرۍ د جنبش ګوند لوړپوړی مشر او مخکښه څېره وه، چې په ۱۳۷۱هـ ل کې د اردو د ۱۲ غونډ مشر پاته شوی او په ۱۳۷۷هـ ل کې کله چې طالبانو مزارشریف ونیو؛ نو د جنرال دوستم په ملتیا له هېواده بهر تیښتې ته اړ شو.

ویل کېږي، چې نوموړي په دې وروستیو کې د خپلو قومیانو لپاره «د عربانو شورا» تاسیس کړې وه او له جنرال دوستم سره یې د امتیازاتو پر سر د را ولاړ شویو اختلافاتو له کبله له هغه نه لاره بېله کړې وه.

تر اوسه جنبش ګوند د نوموړي د وژنې په اړه غبرګون نه دی ښوولی .

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x