ټولنیزه برخه

ښه ښځه د مېړه ډېره ښه خزانه ده

ژباړونکی او اوډونکی: عبدالمالک همت

ترهرڅه دمخه د دې خبري یادول اړین دي چي مېړه او مېرمن باید خپل کورنی ژوند په ډېر احتیاط او هوښیاري سره پر مخ بوزی او پرې نه ږدي چي په کور کي پر نه څه او ساده خبروباندي ناندرۍ او کړکېچونه رامنځ ته سي. دا ځکه چي نن مهال که دا مازي د کور دننه یوه ډېره کوچنۍ خبره هم له کوره دباندي ووزي نه به دي امه وي نه به دي تمه وي چي ډېر داسي شیطانان به د دوستانو په جامو کي پیدا سي چي په کور کي به داسي لوی ویر او کړکېچ درته پیدا کړي چي بیا به يې مېړه او ماینه په هیڅ ګون تر وده نه سي وتلای. دې خبري ته په ساده کتو مه ګورئ. د خاوند او مېرمني کورنی آرام او نېکمرغه ژوند تل او پرله پسې د شیطان او د هغه
د ملګرو تر جدي څار او هدف لاندي وي. په تېره خو نن مهال تر بل هروخت زیات انسي او جني شیطانان په دې اړه فعال او ورانۍ ته چمتو دي. زموږ درانه پیغمبر صلی الله علیه وسلم په دې اړه واقعیت داسي بیان کړی دی:

«إِنَّ إِبْلِيسَ يَضَعُ عَرْشَهُ عَلَى الْمَاءِ ثُمَّ يَبْعَثُ سَرَايَاهُ فَأَدْنَاهُمْ مِنْهُ مَنْزِلَةً أَعْظَمُهُمْ فِتْنَةً يَجِيءُ أَحَدُهُمْ فَيَقُولُ فَعَلْتُ كَذَا وَكَذَا فَيَقُولُ مَا صَنَعْتَ شَيْئًا قَالَ ثُمَّ يَجِيءُ أَحَدُهُمْ فَيَقُولُ مَا تَرَكْتُهُ حَتَّى فَرَّقْتُ بَيْنَهُ وَبَيْنَ امْرَأَتِهِ قَالَ فَيُدْنِيهِ مِنْهُ وَيَقُولُ نِعْمَ أَنْتَ».

ژباړه: ابلیس خپل د خپلی شیطاني واکمنۍ تخت(مرکز) په اوبو کي ږدي او خپلی ډلي هره خوا استوي، نو د ده له انسي او جني ملګرو څخه چي هر څوک لویه فتنه واچوي، هغه د رتبې او منزلت له مخي ده ته ډېر نژدې وي. له هغو څخه یو ورسي او ورته ووايي چي ما داسي وکړه او داسي مي وکړه.ابلیس لعین ورته ووايي چی تا هیڅ هم نه دي کړي. بیا بل یو ورسي او ورته ووايي: ما پلانی سړی تر هغه وخته نه دی پرې ایښی چي د هغه او د هغه د مېرمني ترمنځ مي بېلوالی نه دی راوستلی. نو ابلیس دغه شیطان ځان ته نژدې کړي او ورته ووايي : ته ډېر ښه شیطان يې. (مسلم، کتاب صفة القیامة والجنة والنار، باب تحريش الشيطان وبعثه سراياه لفتنة الناس وأن مع كل إنسان قرينا، ۷۰۰۰ / ۲۸۱۳ شمېره حدیث).

که ښځه نېکه، صالحه او پوهه وي او د خپل کور چی د دې د پت او عزت پلازمېنه باله سی او دا يې بي بي او کالخوایه ده په سمه توګه سمبال کړي او د خپل کور رازونه د باندي ونه باسی او نورو ته په خپلو چارو کي د بې ځایه مداخلو لار ورنه کړي، نو دا د مېړه لپاره یوه داسي ډېره ښه زېرمه (خزانه) باله سي چي قدر وقیمت يې هیڅ نه ټاکل کيږي. ځکه په دې صورت کي يې ارزښت بېخي ډېر او تر حد تېر وي. دا له دې امله چي دا د خپل خاوند، کورنۍ او ټولني په ژوندانه کي ډېر ستر رول لوبوي. خو که ښځه نېکه او صالحه نه وي، نو خطر او ضرر يې هم دغونه ډېر وي. ځکه دغسي ښځه بیا پر خپل کور او کهول باندي دغونه بد او ناوړه اغېز اچوي.

په دې کي څه د شک خبره نسته چي د ښځی اطاعت د مېړه او کورنۍ د غړو سره د میني او محبت او لوروني او پېرزویني مزي پیاوړي کوي. نو څنګه چي مېرمن د خپل خاوند سره مینه او محبت څرګندوي، په مقابل کي یې خاوند هم د خپلي مېرمني سره مینه کوي او ډېره پر ګرانيږي او په دې صورت کي يې ټول حقوق لکه څنګه چي ښايي هغسي ادا کوي. له دې امله دی چي رسول الله صلی الله علیه وسلم فرمایلي دي:

«الدُّنْيَا مَتَاعٌ وَخَيْرُ مَتَاعِ الدُّنْيَا الْمَرْأَةُ الصَّالِحَةُ». 

ژباړه: دنیا داسی شی،اسباب او سامان باله سي چي ګټه ځني اخیستل کيږي، لکه چي مسافر
د لاري له توښې څخه ګټه اخلي او بیا پای ته ورسیږي. او د دنیا ډېره ښه متاع نېکه او ښه ښځه ده. (مسلم، کتاب الرضاع، باب خير متاع الدنيا المرأة الصالحة، ۳۵۳۳/۱۴۶۷ شمېره حدیث).

د دغه حدیث په تشریح کي یو دیني عالم زیاتوي چي که کوم انسان د داسي ښځي په کولو سره موفق سي چي په دین او عقل پوره وي، نو دا په دنیا کي تر ټولو ښه او غوره متاع ده، ځکه دغسي ښځه يې پټ رازونه، شته او اولادونه ټول ساتي، په عقل او پوهه سره يې کور ښه ور اوډي او اولادونه يې ډېر ښه ور روزي. ځکه نو نبی صلی الله علیه وسلم فرمایلی دی:

« تُنْكَحُ الْمَرْأَةُ لأَرْبَعٍ لِمَالِهَا وَلِحَسَبِهَا وَجَمَالِهَا وَلِدِينِهَا ، فَاظْفَرْ بِذَاتِ الدِّينِ تَرِبَتْ يَدَاكَ ».

ژباړه: د ښځي سره نکاح د څلورو شیانو پر بنسټ کيږي: د هغې د شتو لپاره، د هغې د کورني پت او شرف لپاره، د هغې د ښایست لپاره او د هغې د دین لپاره. نو د دینداري ښځي سره په واده کولو سره کامیابي ترلاسه کړه، خو که داسي ونه کړې په لاسونو به دي خاوری ونښلي(یعني په پای کي به پښېمانه سې). (بخاري، کتاب النکاح، باب الأكفاء فى الدين، ۵۰۹۰ شمېره حدیث).

یعني : انسان باید د ښځي دیدارۍ ته وګوري، نه جمال او ښکلا ته، دینداره او هوښیاره ښځه که څه هم په صورت ښایسته نه وي، د هغې اخلاق، دین او پوهه او هوښیاري يې ښایسته کوي.
د ازدواج په مسئله کي بنسټیز شرط دین دی. نو ګټور او نېکمرغه به هغه څوک وي چي تر هر څه دمخه د ښځي دین په پام کي ونيسي او بیا يې نور څه.

ښه، راځو بېرته خپلي خبري ته. که مېرمن د مېړه د اطاعت او درناوي په واقعي معنا پوه سی او د هغه په وړاندي دا اطاعت او درناوی لکه څنګه چي ښايي هغسي وکړي، نو به خامخا د مېړه زړه په لاس راوړي او پر دې به باور او اعتماد کوي، تل به په مینه او محبت کي ژوند ورسره تېروي او پر له پسې به په دې مینه او درناوي کي زیاتوب راځي او د مېرمني ټولي هیلي او غوښتني به مني. خو له بده مرغه ډېري لږ ښځي دي چي په دې خبره پوهيږي او ډېري لږ په دې خبرو عمل کوي.

مېرمن چي ترڅو د خپل خاوند حق ادا نه کړي، د لوی څښتن جل جلاله حق هم نه سي ادا کولای. پوهان وايي چي تر ټولو لوی حق د مېړه اطاعت دی.

د ښځي کړه وړه د دې په خپل ژوند او کور کي ستر ارزښت لري. د دې د کړو وړو او چلند  اغېز که د مېړه تر چلند او د رزق او روزۍ او شتو د پیدا کولو لپاره د هغه تر کوښښونو زیات نه وي کم هم نه دی. ښځه د مېړه لپاره سکون او آرام باله سی، د کوچنیانو لپاره توده غېږ ده او د خپل کور د چارو د سمون لپاره د اقتصاد وزیره ده. داده چي د مېړه د ژوند چاري سمبالوي، د لوی څښتن طاعت او عبادت ته يې چمتو کوي، د هغه په حضور او غیاب کي يې د هر څه ساتنه کوي او نیک نصیحتونه ورته کوي. نو کله چي خاوند دغسی مېرمني ته وګوري خوشاله يې کړي او چي ځه بلنه ورته وکړي په قول يې وکړي او چي کومي خواته ځنیو لاړ سی پت عزت او نورهرڅه يې په ډېره ښه توګه ورخوندي کړي.

لکه چي څرګنده ده مېړه په کور کي ډېر لږ وخت اوسي، خو مېرمن خپل ډېر وخت په خپل کور کي تېروي. نو که ښځه نېکه او صالحه وي، ټول کور سم، سمبال او صالح کړي او که بده او فاسده ښځه وي، نو ټول کور او کهول ګډوډ او روان او فاسد کړي. داباید هرومرو داسي وي ځکه چي ښځه انسان ته داسي ده لکه د هغه زړه، نو که زړه سم او سالم وي، بدن هم سم او روغ رمټ وي. خوکه زړه ناروغ وي، ټول بدن به ناروغ وي او خاوند به یې له منځه ځي. او دا کومه نادره خبره نه ده. نن مهال چي موږ هره ورځ په لوېدیزو هیوادونو کي د افرادو د ضایع کېدو او ټولنیز انحطاط کومي تراژیدۍ وینو دا هرڅه د ښځي له حقیقی او رښتیاني نقش څخه او د هغې له رشتیني انساني اصالت او هویت او کرامت څخه د هغې د لیري کېدو طبیعي پایله ده.

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x