دیني، سیرت او تاریخ

له خدای سره د میني اړیکي او د هغې پایلي

salatعَن أَبِي هُرَيْرَةَ قَالَ قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ إِنَّ اللَّهَ قَالَ مَنْ عَادَى لِي وَلِيًّا فَقَدْ آذَنْتُهُ بِالْحَرْبِ وَمَا تَقَرَّبَ إِلَيَّ عَبْدِي بِشَيْءٍ أَحَبَّ إِلَيَّ مِمَّا افْتَرَضْتُ عَلَيْهِ وَمَا يَزَالُ عَبْدِي يَتَقَرَّبُ إِلَيَّ بِالنَّوَافِلِ حَتَّى أُحِبَّهُ فَإِذَا أَحْبَبْتُهُ كُنْتُ سَمْعَهُ الَّذِي يَسْمَعُ بِهِ وَبَصَرَهُ الَّذِي يُبْصِرُ بِهِ وَيَدَهُ الَّتِي يَبْطِشُ بِهَا وَرِجْلَهُ الَّتِي يَمْشِي بِهَا وَإِنْ سَأَلَنِي لَأُعْطِيَنَّهُ وَلَئِنْ اسْتَعَاذَنِي لَأُعِيذَنَّهُ وَمَا تَرَدَّدْتُ عَن شَيْءٍ أَنَا فَاعِلُهُ تَرَدُّدِي عَن نَفْسِ الْمُؤْمِنِ يَكْرَهُ الْمَوْتَ وَأَنَا أَكْرَهُ مَسَاءَتَهُ . رواه البخاري .وصححه الامام البغوي فی شرح السنة، ووايضًا صححه شيخ الالباني في جميع كتبه

ژباړه : حضرت  ابو هریره رضی الله عنه  وویل : رسول الله صلی الله  علیه  وسلم ،  وفرمایل : الله  جل جلاله  وفرمایل : څوک  چې  ځما د دوست  په  وسېله  ( دیني  عالم  ، ذاکر ، مجاهد ، او داسي  نور  چې  تل  د الله  اطاعت کوي  او په  اخلاص  عبادت  کوي )   له  ما  سره  دښمني  پیل  کړي ، زه هغه  ته  د هغه  د هلاکت  خبر دارﺉ  ورکوم  ، ځما کوم  بنده چې  ماته  دکوم  عبادت  په  وسېله  نژدې کیدل  غواړي  ، نو تر ټولو فرضي  عبادات   ځما ډېر  خوښ دي ، ځما بنده  په  دوامداره توګه  هڅه  کوي  چې  د نفلي  عباداتو په  اداء  کولو ، له  ما سره  د دوستي  اړیکي  ټینګي کړي  ، کله  چې  زه  له  هغه  سره  دوستي  پیل  کړم  ، نو  زه  ، دده  هغه  غوږونه  چې  دﺉ  دهغو په  وسېله  اوري ، دده  هغه  سترګي  چې  دهغو په  وسېله  ویني ، دده  هغه  لاسونه  چې  دهغو په  وسېله  یو شی  ټینګوي ، دده  هغه  پښې  چې  دهغو په  وسېله  تګ  راتګ  کوي  ، ټول  کنټرول  کړم  ( په دې توګه  چې الله  به  لارښوونه  ورته  وکړي ، توفیق  به  ورکړي ، نصرت  به  یې  وکړي ، مرسته  به  یې  وکړي ، د بدن  ټول  غړي  به  یې  یوازي  د خیر  په کارونوکې  وکاروي )  له دې  وروسته  چې  هرڅه  وغواړي  هرو  مرو به  هغه  ورکړم ، که  د یوشي  له  شر  څخه  پناه  راوړي  هرو  مرو به  یې  وژغورم  ، دکوم  کار د سرته  رسولو په  مهال  ځما استازي  هغومره هیچا ته  ورغلي  اوراغلي  نه  دي  لکه  دمؤمن  د روح  اخیستلو لپاره  چې  په  وارو  وارو  ور ځي  او  راځي ، دا  له دې  امله ده  چې  مؤمن  له  مرګ  څخه  کرکه  کوي  ، زه  دته   د تکلیف  له  ورکولو څخه  نفرت  کوم  .

(  یعني  چې  مؤمن  تر څو په  خپله  خوښه  روح  ونه  سپاري  دده  له  خوښي  پرته  د هغه  روح  نه  ترې  اخلي ،  لکه  په ګڼشمیر  احادیثو کې  چې  ددې  خبري  پخلی  شوی دی  چې  حضرت موسی  علیه  السلام ، نبي  علیه  السلام  او داسي  دخدای  نور  دوستانو ته  په  څوڅو کرته  ملک الموت  د روح  اخیستو  دپاره  ور غلی  او  راغلی دی  چې  څو هغوی  پخپله  د روح  سپارلو لپاره  چمتو شول ، دخدای  دوستان  هغه  مهال  روح  سپارلوته  چمتوکیږي کله  چې  الله  جل جلاله   هغوی  ته  په  جنت  کې  درجې ، نعمتونه  ، مقامات  او د قدس  مجلس  وښیې  نو هغه  په  ډېر شوق  د الله  ملاقات  وغواړي  او روح  سپارلوته  په  دې  توګه  اماده  شي ، لکه  په  دنیوي  ژوند کې  چې  څوک  د یو مشفیق  او ګران  دوست  کورته  په  ډېره مینه  د روانېدو په  حال  کې  وي  په  همغه  شان  مرګ  د یو  ګران  دوست  د کور دروازه  ورته محسوسه  شي  نو په  خپله  خوښه  د الله  استازي ته روح  وسپاري ، له دې  حدیث  څخه  د الله   لخوا  له  مؤمن  سره  له  اټکل  څخه  د وتلي  کچي  لطف ، مهرباني ، شفقت ، وصیله  معلومیږي )  

له دې  حدیث  قدسي  څخه  جوتي  شوې  فائدې  :

٭  لومړی  فایده  :  له دې  حدیث  څخه  ددې  خبري  ثبوت  تر لاسه  شو چې  په  زمکه کې  الله  دوستان  او  ولیان  لري  ، او  ددې  خبري  تایید دقرآن  کریم  له  دې  ایت  شریف  څخه  هم  شوی دی ،

قال الله تعالي { أَلَا إِنَّ أَوْلِيَاءَ اللَّهِ لَا خَوْفٌ عَلَيْهِمْ وَلَا هُمْ يَحْزَنُونَ (۶۲) الَّذِينَ آَمَنُوا وَكَانُوا يَتَّقُونَ (۶۳) لَهُمُ الْبُشْرَى فِي الْحَيَاةِ الدُّنْيَا وَفِي الْآَخِرَةِ لَا تَبْدِيلَ لِكَلِمَاتِ اللَّهِ ذَلِكَ هُوَ الْفَوْزُ الْعَظِيمُ (۶۴) } يونس

ژباړه  : واورﺉ  ، څوک  چې  الله  دوستان دي  ، ایمان  یې  راوړی دی ، د تقوی  کړنلاره یې  غوره  کړې ده ، په  هغو باندي  کومه  وېره  او کړاو  نشته  ، ددنیا  او  آخرت  دواړو  په  ژوندانه کې  دهغو  لپاره  زېرﺉ  زېرﺉ  دی ، د الله  خبري  نشي  بدلېدلای ، همدا  لوی  بریالي توب  دی  چې  هغوی  ته  ور په  برخه  شو .

* دویمه  فایده  :  له  دې  حدیث  څخه  جوته  شوه ، چې  اولیآء  دخدای  دوستان  دالله  په  وړاندي  د ستر  اعزاز او کرامت  څښتنان دي ، څوک  چې  ددوی  خلاف  دښمني  پیل  کړي  الله  هغو ته  د تباهی  او هلاکت  خبر دارﺉ  ورکوي  .

* درېیمه  فایده  :  له  دې  حدیث  څخه  جوته  شوه ، چې  له  اولیآء  الله  سره  دښمني  ګناه  کبیره  ده  ، ځکه  الله  جل جلاله  داسي  ګام  اخیستونکي  ته  دجنګ  اعلان  کړی دی  .

* څلورمه  فایده  :  له  دې  حدیث  څخه  جوته  شوه ، چې  فرضي  عبادات  د الله  په  وړاندي ، ډېر خوښ  دي  تر نفلي  عبادا تو ، ددې  دلیل  دادی  :  ځما  بنده  چې  ماته  دکوم  عبادت  په  وسېله  نژدیکت  وغواړي  ، نو تر ټولو فرضي  عبادات   ځما  ډېر  خوښ دي  .  

* پنځمه  فایده  : له  دې  حدیث  څخه  جوته  شوه ، چې  د الله  اوامر  دوه  ډوله دي ، یو فرایض دي  ، او  دویم  نوافل دي  .

*  شپږمه  فایده  :  له  دې  حدیث  څخه  جوته  شوه ، چې  الله  ته   د محبت  صفت  ثابت  دی ، ځکه  الله  جل جلاله  وفرمایل  :  ما ته   فرضي  عبادات   ډېر  محبوب  دي  ، محبت  یو صفت  دی  چې  د الله  تر ذات  پوري  تړاو  لري  ، د هغه  ثمرې  دا دي ، چې  څوک  ورته  محبوب  شو نو هغه  ته  لارښوونه  کوي  ،  له  هغه  سره  احسانات  کوي ، ثوابونه ورکوي  ، مرسته یې  کوي  ،  له  ستونزو  سره  د  مخکېدو  په  مهال  یې  نصرت  کوي  ، د چا لخوا که   له  کوم  شر  او خوف  سره  مخکیږي  پناه  ورکوي  .

* اوومه  فایده  :  له  دې  حدیث  څخه  جوته  شوه ، چې  اعمال  په  خپل  منځ  کې  یو په  بل  باندي  فضیلت  او غوره  والی  لري  .

* اتمه  فایده  :  له  دې  حدیث  څخه  جوته  شوه ، چې  ایمان  قوت  او ضعف  قبلوي  ، که  څوک  په  اعمالو کې  جیادت  او سپېڅلتیا ولري  ، د هغو ایمان  ډېر قوي  وي  ، په  نسبت  هغه  چا ته  چې  هغه  د هغه  په شان  نه وي ، خلاصه داده چې  دایمان قوت  او ضعف  د اعمالو په کچه  دی  .  

* نهمه  فایده  :  له  دې  حدیث  څخه  جوته  شوه ، چې   د خدای  محبت  کوم  بنده  ته  حاصل شي  ، نو  دهغه  غوږونه  ، سترګي ، لاسونه ، او پښې  ټول   په  خیر او صالحو اعمالو کې  بوختیږي ، ځکه  د الله  له لوري  هغه  ته  د توفیق  سوغات  ورکول  کیږي  .     

* لسمه  فایده  :  له  دې  حدیث  څخه  جوته  شوه ،  څوک  چې  د کاملو عباداتو په  وسېله  څومره  خدای  ته  نژدې  کیږي  ، په  همغه  کچه  یې  دعاوي  ژرقبلیږي ، د آفتونو له  شر څخه همغومره  ژر  پناه  ورکول  کیږي  .

مولوي  محمدیار  ( وردګ)

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x