اشرف غني په سخت او وژونکي مرض مبتلا دی

نور ريښتياپال

له څه مودې راپديخوا د تلويزونونو په مخ اشرف غني په داسې حال کې ليدل کيږي چې يوه پښه يې پلستر وي او په دوه امساوو ګرځي ، رنګ يې پيکه او له صحت نه ډير کمزوری ښکاري ، د څه وخت لپاره جرمني ته هم د تداوی لپاره تللی ؤ .

سره لدې چې حکومتي سرچينې جرمني ته د اشرف غني د تګ موخه د پښې تداوي بولي ، خو د اشرف غني صحي حالت ته په کتو داسې معلوميږي چې نوموړی په کومه سخته مريضي اخته دی. ځکه د پښې تداوي خو يې دلته هم کيدای شوای ، افغاني ډاکټران په شکسته بندۍ کې ډيره تجربه لري.

د يوې باوري سرچينې د معلوماتو له مخې اشرف غني د ځيګر په مرض اخته دی ، کلسيوم يې په بدن کې کم دي او په بدن کې يې وينه نه توليديږي. او جرمني ته هم د همدې مريضۍ د تداوي په موخه تللی ؤ .

د يادونې وړ ده چې نوموړي پخوا هم د معدې د سرطان مريضي تيره کړي خو هغه مهال يې علاج په امريکا کې کړی ؤ او علاج يې تر ډيره بريده بريالی ؤ . داسې شک هم کيږي چې شايد اوس د وينې په سرطان اخته وي.

خو په هر صورت څرنګه چې نوموړی له بدن څخه کمزوری او عمر يې هم زيات دی ، د ځيګر ناروغي او په بدن کې د وينې نه توليديدل شايد ډير خطرناک ورته تمام شي.

ويل کيږي د نوموړي د مريضۍ په سختيدو په حکومت کې دننه څو مهمو کړيو پټ تحرکات پيل کړي .

حنيف اتمر د ده له مرګ وروسته ځان د نوموړي ځايناستی ګڼي او په دې هڅه کې دی چې د اشرف غني ټول پلويان په ځان راټول کړي ، او د فوځي او امنيتي لوړپوړو چارواکو د باور د خپلولو په لټه کې هم دی ، او له پخوانيو ګوندي اړيکو څخه په استفادې له کمونستو جنرالانو سره اړيکې ټينګوي او کوشش کوي چې ملاتړ يې تر لاسه کړي.

له بله پلوه جنرال دوستم هم د اشرف غني کمزوري صحت او مريضي په خوځښت راوستلی او له خپلو سلاکارانو او نيږدې ملګرو سره په مشورو بوخت دی او دې ته چمتووالی نيسي چې د اشرف غني د مرګ په صورت کې واک په لاس کې ونيسي.

خو تر ټولو ډير فعال بيا حامد کرزی او ډاکټر عبدالله دي او دواړه ډيره هيله لري چې د اشرف غني د مرګ په صورت کې واک په خپل لاس کې واخلي.

ډاکټر عبدالله خو يې بیخي د ځان حق بولي چې واک تر لاسه کړي.

سرچينه زياتوي چې امريکايان دغه تحرکات له نيږدې څاري او ډير په انديښنه کې دي ، له څو ورځو راپديخوا د کابل په فضا کې يې جيټ الوتکې هم ګزمې کوي.

د شنونکو له آنده که په ګډ حکومت کې دننه او له حکومت نه بيرون کړۍ تر خپل منځ واټن رانيږدې نکړي او د قدرت په سر له سيالۍ څخه لاس وانخلي د اشرف غني د مرګ په صورت کې به سخته ګډوډي رامنځته او کيدای شي د قدرت په سر شخړې په خپلمنځې جنګونو بدلې شي. او يو داسې پيچلی حالت رامنځته شي چې سمول او قابو کول به يې بيا د چا د وس خبره نه وي.