دازادۍ لمانځل

ابوبلال انوري –

په اصل او معنی راته معلومه ازادي ده –
دا تاسو یئ چې لمانځۍ دا نو کومه ازادي ده –

وطن مو اشغال شوی او فکرونه تړل شوي –
حاکمه غلامي ده او محکومه ازادي  ده –

محراب شو لوټې لوټې او ممبرخالي خالي دی –
امام مو تروریست شو دا مذمومه ازادي ده –

هفه چې مو نیکونو ازادي وه ترې ګټلې –
هغوی چې دلته ګرځي بې مفهومه ازادي ده –

پښتو د خاورو لاندې شوه غرور مو راته وژني –
له ننګ حیاء غیرت ځنې محرومه ازادي ده –

د پیغلو عفتونه عصمتونه پکې لوټ شوه –
ځوان پکې ګمراه شوه دا معدومه ازادي ده –

په لاس د دښمنانو ازادي نه شي راتللی –
په مونږ را تپل شوې دا څه شومه ازادي ده –

په نوم د ازادۍ دلته قومونه غلامان شوه –
اوس دلته بې اساسه او بې نومه ازادي ده –

که خدای کوي له غرونو به ښارونو ته هم راشي –
تر اوسه لا محدوده او  ماشومه ازادي  ده –

یو ورځ به انوري دا سپین بیرغ دلته رپاندشي –
نو بیا به درته وایم  چې را درومه ازادي ده  –

18 /8 /2015