د افغانو ډاکټرانو پنځول شوې اله امریکايي ډاکټرانو هم وکاروله

نن ټکی اسیا (پنجشنبه، وږی ۵مه ۱۳۹۴ل): په لومړی ځل امریکايي ډاکټرانو خپل جراحي عملیاتو کې د دوه افغان ډاکټرانو پنځول شوې اله وکاروله او دغه اله يي د هډوکو درملنې په برخه کې د یوې سترې لاسته راوړنې په توګه ومنله.

امریکايي ډاکټرانو د امریکا د اوریګان ایالت په پورټلینډ ښار کې د یوې ۸۳ کلنې میرمنې د مات شوی زنګون د جراحي او درملنې لپاره کارولی.

د هډوکو د درملنې لپاره کاریدوونکی دغه اله دوه افغان ډاکټران چې محمد اسماعیل وردک او عبدالرزاق سیاوش نومیږي پنځولی چې له دې وړاندې د هند، پاکستان او بنګله دیش هیوادونو ډاکټرانو خپل جراحي عملیاتو او ناروغانو درملنې لپاره کارولی و خو دا لومړی ځل دی چې امریکايي ډاکټرانو هم له دغې الې ګټه پورته کړه.

دغه اله لیندۍ ته ورته شکل لري او د زنګون او څنګل د ماتو هډوکو لپاره د درملنې تر ټولو غوره او ارزانه اله ده. تر دې دمه دغه اله توانیدلی د نړۍ د مختلفو هیوادونو د ډاکټرانو توجه جلب کړي او ځینو ډاکټرانو ویلي چې دغه اله د هډوکو د درملنې په برخه کې یوه ډیره ستره او د پام وړ لاسته راوړنه ده.

که څه هم دغه اله تر دې دمه په پوره ډول نه دی تکمیل شوی خو بیا هم د ډیرو هیوادونو په روغتونونو کې ترې ګټه پورته کیږي او یو شمیر کمپنیو د دغې الې د تولید حق ترلاسه کړی.

ډاکټرانو ویلي چې دغه اله ډیر ژر اثر کوي او د ناروغ درد په کمولو کې هم ځانګړی اثر او ارزښت لري. د دغې الې پنځوونکو او نورو هغو ډاکټرانو چې دغه اله يي استعماله کړې وايي چې دغه اله د درملنې موده له شپږو میاشتو څخه شپږو اونیو ته راټیټوي.

امریکايي ډاکټرانو هم له استعمال وروسته ومنله چې دغه اله د هډوکو درملنې لپاره یوه غوره او ګټوره اله کوم چې ډیر چټک اثر کوي. له همدې امله د امریکا متحده ایالاتو دغه افغانۍ اله ثبت او د استعمالولو اجازه يي ورکړه.

ډاکټر محمد اسماعیل وردک وویل چې د دوي پنځول شوې الې ته په کتلو سره د کوچنیو هډوکو درملنه د کوم لپاره چې دوه ځلي د جراحي عمل ترسره کیږي یوه ناقصه طریقه ده. زمونږ د نوې طریقې او الې په مرسته د کوچني هډوکو درملنه یوازې یو جراحي عمل سره پرته له دې چې د ناروغ پوټکي پرې شي ممکنه ده.

avatar
  ګډون وکړئ  
خبرتیا غوښتل د