حامد کرزي ناویل شوي حقایق وسپړل

نن ټکي اسیا (جمعه، وږي ۱۳مه، ۱۳۹۴ل): تېره اوونۍ پخوانی ولسمشر، حامد کرزی له طلوع نیوز ټلویزیون سره په یوې ځانګړې مرکه کې چې په سیرینا هوټل کې ترسره شوې وه، پر افغانستان د خپلې دیارلس کلنې واکمنۍ او په هېواد کې د امریکایانو له ځینو کړنو څخه پرده پورته کړه. کرزی که څه هم کله ناکله په افغانستان کې د امریکا له پټو کړنو پرده پورته کوي؛ خو دا لومړی ځل دی چې په دومره تفصیل او جزیاتو سره پر ځینو تېرو پېښو غږېږي.

تر ټولو سخته پرېکړه

کرزی وايي د حکومت په دیارلس کلنه دوره کې يې تر ټولو سخته پرېکړه له امریکا سره د امنیتي تړون په اړه وه چې حامد کرزي رد کړه. دی وايي: «له دوه کاله دقیقې او کلمه په کلمه مطالعې څخه وروسته دې نتیجې ته ورسېدو چې دا تړون د افغانستان په ګټه نه دی. دا یوه سخته پرېکړه وه. له یوې خوا د امریکا ګواښ و چې که مو تړون لاسلیک نه کړ، خپلې مرستې بندوو، ستاسو د عسکرو معاشونه نه ورکوو، بودیجې ته مو پیسې نه ورکوو او داسې نور… او له بلې خوا د افغانستان اړتیا سولې او امنیت ته وه. د دې دواړو تلل یوه سخته پرېکړه وه».

کرزی زیاتوي «بلاخره موږ وویل چې تر هغې امریکا له پاکستان سره په خپل چلن کې بدلون رانه ولي، تړون د افغانستان په خیر نه دی او پر همدې پرېکړې مو عمل هم وکړ». حامد کرزي د خپلو خبرو په اوږدو کې وویل، چې امریکا د افغانستان په پرتله پاکستان ته ډېر ارزښت ورکاوه.

پاکستان په کورني سیاست کې حق غوښت

کرزی د پاکستان په اړه وايي: «د پاکستان له ولس سره مو داسې دوستي ده لکه دوه غبرګوني وروڼه؛ خو څومره چې د پاکستان ولس له موږ سره دوستي کړې ده په هماغه کچه یې استخباراتو موږ سره ظلم کړی».

کرزی وايي د پاکستان له څارګرې ادارې سره هم دښمني نه کوي، اصلاح یې غواړي؛ خو زیاتوي چې پاکستان له ده څخه غوښتل: «د ډیورنډ کرښه د رسمي پولې په توګه منل، موږ ورته ویلي چې دا ممکن نه ده، د افغانستان ولس کله هم دا نه مني. دوی غوښتل چې لږ تر لږه د هند په اړه زموږ بهرنی سیاست کنټرول کړي، موږ کله هم دې کار سره موافق نه و او نه یو. پاکستان زموږ په کورنیو چارو کې د لاسوهنې حق غوښت چې موږ کله هم نه دی منلی».

حامد کرزی وايي باید له پاکستان سره دوستي وکړو خو د یوه «مستقل، باعزته او د پاکستان سیال افغانستان له ادرس څخه له دغه هېواد سره خبرې وشي».

پر امریکا شکونه

حامد کرزی وايي افغانستان یو کمزوری هېواد دی، نه شي کولای د امریکا د سترو موخو پر وړاندې ودرېږي، خو امریکا باید د افغانستان ګټې د خپلو سترو موخو لپاره قرباني نه کړي. کرزی وايي تل یې له امریکا سره په مخالفت کې خپل غږ پورته کړی او لا به یې هم پورته کوي.

پخوانی ولسمشر وايي لکه څنګه یې چې د پاکستان له سیاستونو سره مخالفت دی همداسې د امریکا له کړنو سره هم مخالف دی. کرزی له امریکا سره خپل مخالفتونه داسې بیانوي: «پر افغانستان د امریکا له بمباردونو شدیداً ناراضه یو او انتقاد پرې کوو، د ترهګرۍ پر ضد یې له دوه ګوني سیاست څخه شدیداً ناراضه یو او انتقاد لرو، له دې چې یو ورځ یې افغانستان دوست وباله او بله ورځ یې پاکستان له افغانستانه نژدې وباله، موږ شدیداً انتقاد لرو، موږ له امریکا یو صریح او مستقیم چلن غواړو، چې د افغانستان په کې تضمین شوې وي».

امنیتي تړون ولې رد شو؟

حامد کرزی وايي، له امریکايي چارواکیو څخه یې شخصاً په دوه اړخیزو خبرو اترو کې داسې څه اورېدلي چې په باور یې ده باید امنیتي تړون تر هغې نه وای لاسلیک کړی چې د امریکا چلن د افغانستان او د «ترهګرۍ د بانیانو» په اړه څرګند شوی نه وي. کرزی وايي: «مثلاً په ۲۰۱۳م کال کې د امریکا لوړپوړیو چارواکیو ورته ویلي و چې موږ باید خپل بهرنی سیاست لږ تر لږه د هند په اړه د پاکستان تر اغېز لاندې وساتو. دا موږ یادداشت کړي دي».

کرزي ویل، د امنیتي تړون له لارې امریکایانو غوښتل چې پاکستان ته امتیاز ورکړي.

ترهګري یوازې د امریکا د ګټو پر ضد ده!

حامد کرزی وايي چې له امریکایانو څخه یې پوښتنه وکړه که چېرې د افغانستان په کلیو او بانډو کې د بم چاودنه رامنځ ته کېږي، ایا دا ترهګري ده؟ امریکايي چارواکیو ورته منفي ځواب ورکړی و.

حامد کرزی وايي، په عراق او سوریه کې د داعش راپورته کېدل شاید د هغو سیمو د شرایطو پایله وي، خو د دغو ملتونو د بدبختیو عمده دلیل د بهرنیو هېوادونو لاسوهنې وې. خو کرزی زیاتوي چې داعش په افغانستان کې په مطلق ډول بهرنۍ پدیده ده او په افغانستان کې يې پراختیا او وده د بهرنیو هېوادونو د مرستو له امله ده.

په تالار کې د ناستو له ډلې، د اجراییه رييس د دویم مرستیال، محمد محقق د ټیم غړي، محمد ناطقي له کرزي څخه پوښته وکړه چې ولې یې بهرنیانو سره خپلې اړیکې ورانې کړې او مخالفین یې وروڼه وبلل، کرزي وویل: «محترم ناطقي صاحب، امریکایانو بمباردونه وکړل، ملکي تلفات رامنځ ته شول، ایا مهم نه و چې ما ورسره مخالفت کړی وای؟! د افغانانو د کلیو او بانډو بمبار مهم نه و؟! تاسو هغوی د افغانستان خلک نه ګڼئ؟! ایا زموږ د خلکو قتل مهم نه دی؟! د ولسمشر په توګه زما دنده څه وه؟! د امریکا خوشاله ساتنه که د افغانانو له حقونو څخه دفاع؟! که زما دنده د امریکا خوشالي وه، بیا تاسو پر حقه یاست».

«درواغ وايي»

د دې پوښتنې په ځواب کې چې تل لوېدیزو بنسټونو د حامد کرزي د حکومت پر مهال افغانستان د نړۍ تر ټولو فاسد هېواد باله، کرزي وویل: «درواغ یې ویل، هو، درواغ یې ویل». کرزي وړاندې وویل: «حامد کرزی وايي ماته بهرنیانو د بډو وړاندیز کړی و. هغوی چې دلته د بډو ادعا کوي، همغوی راته وړاندیز کړی و».

حامد کرزي په دغې نوي دقیقه يي مرکه کې وویل، چې په کابل کې د امریکا سفارت د سیګار د مشر او د ده ترمنځ د لیدو مخنیوی کاوه. کرزي وویل: «د سیګار مشر راته وژړل، چې هغه څه چې موږ له افغانستان سره د مرستو په نامه اعلان کړل، دغه هېواد ته مو ورنه کړل».

د دې پوښتنې په ځواب کې چې امریکایانو د حامد کرزي حکومت په خپله رامنځ ته کړ، ولې يې د ورانولو هڅه کوله کرزي وویل: «نړاوه یې نه، غوښتل یې استفاده وکړي، له موږ استفاده وکړي، امریکایانو غوښتل داسې حکومت وي چې د دوی په خدمت کې وي. زه د افغانستان د هغو خلکو له ډلې وم چې د امریکا سخت پلوی وم، اوس یې هم مخالف نه یم، د افغانستان په اړه دې خپل چلن سم کړي، دوست یې یم».

تړون لاسلیک کړه، حکومت وکړه!

حامد کرزی په دې مرکه کې له دې هم پرده پورته کوي چې امریکایانو ورته ویلي و چې که امنیتي تړون لاسلیک کړي، نو کولای شي خپل حکومت ته دوام ورکړي: «کله چې د رایو صندقونه شمېرل کېدل، راته راغلل چې موږ غواړو لنډمهاله حکومت جوړ شي، ته به په کې مشر یې، ما ورته وویل، نه، تاسې باید زما د حکومت هیله ونه کړئ، ځکه که زه حکومت پاتې شم، ناټو او امریکا له افغانستانه شړم. کله چې ډاډه شول، چې زه د واک شوقي نه یم، بیا ولاړل».

کرزی وايي امریکایانو ځکه ټینګار کاوه چې دی باید تړون لاسلیک کړي چې هم یې ځواک زیات و او هم مشروعیت.