افغانستان

طالبانو د غزني مرکزي زندان څرنګه مات کړ؟

نن ټکی اسیا (دوشنبه، وږي ۲۳مه ۱۳۹۴ل): د طالبانو د ویاند ذبیح الله مجاهد له لوري نن ټکی آسیا ته په یوه را لیږل شوي لیک کې د غزني ولایت د مرکزي زندان د ماتولو د پلان څخه پرده پورته شوې.

تیره شپه طالبانو د غزني ولایت په مرکزي زندان برید کړی وو، چې په ترڅ کې د ۴۰۰ بندیانو د خوشي کولو په شمول خپل زیات شمېر بندي جنګیالي خلاص کړي وه.

ذبیح الله مجاهد په خپل وروستي لیک کې وویل چې په دغه برید کې «ټول ټال ۴۵۰ تنه بندیان چې اکثره په کې مجاهدین او ځينې يې مهم قومندانان وو را خلاص شول، له ۴۰ ډير پولیس او عسکر ووژل شول».

نوموړي د پلان طرحه په لاندي ډول بیان کړې:

«د پلان طرحه:

د غزني ولایت جهادي قطعې، او د ټولو ولسوالیو څخه سلګونو مجاهدینو چې په سپکو او درنو وسلو سمبال وو، ځانونه د شپې په نيمايي کې د غزني ولایت مرکزي محبس دروازې او هلته د دښمن ساتونکي کنډک ته چې تر ۱۵۰ تنه عسکر په کې میشت وو، ورسول.

ــ دغو مجاهدینو دنده لرله چې د څو تنو فدایانو په توسط د محبس دروازه او امنيتي کمربند دړې وړې کړي، په عین وخت کې په کنډک باندې برید ترسره کړي او د ټول زندان کنترول په لاس کې واخلي.

ــ پلان نيول شوی وو چې له یادو مجاهدینوڅخه به یو کاري ګروپ، بندیان په امن او آرام سره له خپلو خونو راباسي او هغو وسائلو او لاروته به يې رسوي چې د بندیانو د راوتلو او په خوندي توګه د انتقال لپاره په پام کې نیول شوي.

ــ د محبس کنډک به ترهغو د برید لاندې نیول کیږي، ترڅو چې د ټولو بندیانو د انتقال اطمنان ورکړل شي.

ــ د دې لپاره چې په غزني ولایت کې ددښمن دقوماندې مرکزونه له وارخطايي او لار ورکۍ سره مخ شي او له خپلو افرادو سره يې تماس پرې شي، په ولایت کې به د ولایت مقام، امنیه قومندانۍ، مهم استخباراتي مراکزاو ټول نظامي مرکزونه تر بریدونو لاندې نیول کيږي.

ــ په هغو ټولو لارو به له پلان سره سم، دښمن ته کمیونونه نیول کيږي چې زندان ته راغلې دي او ددښمن د کومکي قوې د راتګ احتمال پرې وي.

دبرید پيل:

د شپې په مینځ کې برید پيل شو، د زندان دروازه او امنتي کمربند دړې وړې شو، د زندان په ساتونکي کنډک تعرضي عملیات پیل شول، د ولایت او امني قومندانۍ مرکزونه، دنظامي قطعو مراکز او داستخباراتو مرکز په پرلپسې ډول تر برید لاندې راغلل او په هغو لارو کې په دښمن د کمین غافلګیرانه او درانه بریدونه وشول چې غوښتل يې د زندان د ساتونکو مرستې ته ځانونه ورسوي.

د دښمن تلفات:

تر دې دمه د معلوماتو په اساس تر څلویښتو ډير عسکر اوپولیس وژل شوي، لسګونه تنه ټپيان دي، نظامي وسائط يې له منځه تلي او دښمن سخت وارخطا شوی دی.

له زندان څخه راوتلي مجاهدین:

د معلوماتو له مخې په زندان کې ټول ۴۵۰ تنه اوسیدل چې اکثره په کې جهادي قومندانان اومجاهدین، د مجاهدینو خپلوان، خواخوږي او لږ شمیر په نورو وجهو بندیان هم په کې وو.

دښمن د خپل عادت له مخې د مجاهدینو بندیان له نورو جلا ساتي، په دې اساس دغزني په محبس کې هم بندیان اکثره یا مجاهدین او دهغو خپلوان وو او یا په نظري لحاظ د مجاهدینو حمایت کونکي وو.

په عملیاتو کې ټول بندیان په خورا سالم ډول او په امن سره د مجاهدینو ساحوته راورسیدل، او بیاټول له خپلو خپلوانو سره یوځای شول.

د مجاهدینو تلفات:

په دغو لویو عملیاتو کې د توقع پرخلاف مجاهدینو ډير لږ تلفات درلودل، هغه هم ۳ تنه هغه مجاهدین شهیدان شول چې د شهادت غوښتنې په نیت يې په یادو عملیاتو کې برخه اخيستې وه او دزندان دروازه او امنيتي کمربند يې دړې وړې کړل، نور ټول مجاهدین په سالم ډول خپلو سنګرونوته را رسیدلي دي او هيچاته هم زیان ندی اوښتي.

په دښمن باندې ددغو عملیاتو بداثر:

د غزني په ولایت کې ددغو عملیاتو له امله دښمن له سختې وارخطايي او سرسامۍ سره مخ دي، عسکر او پولیسو يې روحیه بایللی، هک پک او حیران پاتې دي، چې دا څه پرې ترسره شول، دښمن دومره زبون شوی او مورال يې له لاسه ورکړی چې د زندان دروازې يې لا بیرته ندي تړلي، دا خو پریږده چې د مجاهدینو پسې پل ووهي او لا يې تعقیب کړي.

د دښمن د وارخطايي بله علامه داده چې همدا تیره شپه د غزني په دیک ولسوالۍ سلیمانزو سیمه کې ددښمن یوه مهمه قرارګاه هم د بریدونو په نتیجه کې فتحه شوه، دښمن بې له دې چې مقاومت وکړي او یا له مرکز څخه ورسره د مرستې کوم اقدام وشي، ټول عسکر يې له یادې قرارګاه څخه وتښتيدل او قرارګاه يې په ټولیزه توګه د وسلو او مهماتو سره مجاهدینو ته په لاس ورغله. »

طالبانو په دې اړه د خپل ویاند ذبیح الله مجاهد سره مرکه هم کړې، چې په خپل پاڼه یې نشر کړې، مونږ یې هم کټ مټ د کتونکو د لا زیاتو معلوماتو لپاره نشروو:

ورته لیکنې

ګډون وکړئ
خبرتیا غوښتل د
guest
5 Comments
زړو
نویو ډیرو خوښو شویو
Inline Feedbacks
ټولې تبصرې کتل
اونخیوال وردګ

الحمد الله کثیرا

دا دالله ج یو ځنګړی نصرت دی له مجاهیدینو سره

حامد

سياف ته احوال وكي جي د لوي مجاهد ! !!!دوستم سره زان غزني ته ورسوي . ….يوازي به فتواوو كار نه كيزي بل مجاهد ! !!!علومي هم هير نكري..

کندهار

الحمد الله ما شاالله

الحاج استاذ بیانزی

حامد صاحب ، د سیاف نماینده ( د تش په نامه مشرانو جرګی مشر ) تسلیم یار صاحب له دوستم خډل نه د همدغه خبری غوښتنه کړی چه جلال اباد ته ولاړ شی لمړی د دوی د کورنیو چاره وکړی او بیا نور مجاهدین له ننګرهار وشړی هماغه وخت ته خبره ستنه شوی چه روسان ووتل او خپل منځی جنګونه رامنځته شول ، د همدی د پاره ییی د ( ع او غ ) یعنی شمال او جنوب پابیان په ارګ کی جمهور ریسان کینول چه دا جنګ له ارګه پیل کړی او له هماغه اولی ورځی پیل شوی .… نور لوستل »

Back to top button
5
0
Would love your thoughts, please comment.x
()
x