انضباط – نظام کندهاری

مرور بخت مي په شور او نشاط راغلی
ښکاري بيا په پخواني ارتباط راغلی

وسوسو هم لاس له چور چپاول واخيست
د زړه ښار ته د سکون اِنضباط راغلی

اِهتداء پر اِقتداء وي مُرتبه
خو اول يې د بيعت اشتراط راغلی

مايوسي به يې آخيره نتيجه وي
که څوک دام کې د تفريط يا اِفراط راغلی

قضا شوي نصرتونه به معاد شي
که جبران يې د سرو په اِسقاط راغلی

د فراق شپه مي په اوښکو کړله تېره
د وصال قاصد سحر په احتياط راغلی

زړه مي ماته د اِياس محاصره کړه
حوادثو کې که هر څو مُحاط راغلی

سعادت به يې قسمت شي د دارينو
که نظامه مستقيم پر صراط راغلی