رنګينه پاڼه – نظام کندهاری

شاعر: نظام کندهاری

لږ احساس خو دې پيدا کړه په سينه کې
ځان ته ګوره د وجــــدان په آئينــه کې

دا دنيــا خو د عُقبٰی بــام ته زینه ده
خـلک نکـوي خـوبـونـه په زینه کــې

ته ويده يې ستا د ننګ شمـله پردي وړي
لکه نه چي لـــرې تريخَی په اِينـــه کې

ځان قربان کړه د ملالـې ” يا قربـان ” ته
د نــر خوی به وي ضرور په نارينــه کې

تلخګۍ ترې مسلــسلـــې را بهيــــږي
شيرني نشتــــه د ژوند په سرچينـه کې

د تاريـــــخ پاڼه په وينـــو ليکل کيـږي
نوم دې وليکـــه دې پاڼه رنګينـــه کې

د نظام دا اخيـــري جملـــــه هـم واوره
غافـــــل نشې مساعـــده زمينـــه کې