ولسمشر په کندز کې طالبانو ته د تلفاتو اړولو ادعا وکړه

نن ټکی اسیا (سه شنبه، تلې ۷مه، ۱۳۹۴ل): ولسمشر اشرف غني نن په ارګ کې رابلل شوو خبریالانو ته وینا وکړه. دغه ناسته د راغلیو خبریالانو پوښتنو ته له ځواب ویلو پرته پای ته ورسېده.

اشرف غني د کندز په اړه څرګندونې وکړې. د دغه ولایت مرکز پرون په بشپړ ډول د طالبانو لاس ته ولوېد. تر دې دمه حکومت د پرمختګونو ادعاوې کوي؛ خو د طالبانو ویاند د خپلو ځواکونو د پرمختګونو خبر ورکوي.

ولسمشر په نننۍ ناسته کې رسماً ومنله چې پر کندز «غدار دښمن» برید کړی. اشرف غني د کومې ځانګړې ډلې نوم یاد نه کړ؛ خو څرګنده اشاره یې وسله والو طالبانو ته وه. ولسمشر د طالبانو پر ضد د پراخې جګړې نه کولو دلیل د ملکي تلفاتو وېره وبلله: «د افغانستان دولت وطنوالو باندې د ښار په منځ کې بمباري نه کوي؛ نو ځکه زما هدایت ټولو چارواکو ته دا دی چې لومړی به د ملکي وګړو ژوند ته توجه کوي».

غني بې له دې چې کره شمېره وښيي، ادعا وکړه چې طالبانو ته یې درانه تلفات اړولي دي: «دښمن ته درانه تلفات اوښتي، په څو هوايي او ځمکنیو بریدونو کې يې تلفات لیدلي». طالب ویاند، ذبیح الله مجاهد بیا له امریکايي الوتکو څخه د دوو انداختونو خبره مني؛ خو زیاتوي چې د دوی ملګرو ته تلفات نه دي اوښتي.

ولسمشر وویل، چې نه غواړي د کندز د عملیاتو پر جزییاتو خبرې وکړي او د کورنیو او دفاع پر وزیرانو پوره باور لري.

اشرف غني په خپلو څرګندونو کې په ډاګه کړه چې حکومتي ځواکونه توانېدلي چې سږ کال د حکومت د سقوط مخنیوی وکړي: «امنیتي او دفاعي ځواکونو د کال له پیله په ډېره مدبرانه توګه د دولت د سقوط هڅې شنډې کړي دي».

ولسمشر اشرف غني وویل، چې د طالبانو د دغو پرمختګونو په باب د دوی وړاندوینه «بدبختانه» کره وختله؛ خو زیاتوي چې د دوی ځواکونو یې په ښه ډول مقابله وکړه.

له خبریالانو سره د ولسمشر اشرف غني نننۍ ناسته د هغه قراني ایت له ترجمې سره پای ته ورسېده چې له «هرې سختۍ وروسته اساني راځي».