په سوریه کې د ایران نوی وژل شوی جنرال همداني څوک وو

نن ټکی اسیا (شنبه، تلې ۱۸مه، ۱۳۹۴ل): تیره ورځ رسنیو خبر ورکړ چې د سوریا په حلب ښار کې د پنجشنبې په شپه د ایران د انقلابي ځواکونو لوی جنرال حسین همداني وژل شوی.

حسین همداني چې د ایران دهمدان د سیمي اوسیدونکی وو، نوموړی په خپل سیمه همدان کې لومړی کس وو چې هلته یې پوځي ځواک جوړ کړی وو.

نوموړی د ایران او عراق په جګړه کې د پاسداراني انقلاب ځواک د مخکښو مشرانو څخه وو.

همداني څه موده د ایراني پوځ د ۲۷ فرقې مشر هم پاته شوی، ددغي فرقي نوم محمد رسول الله وو، دغه فرقه وروسته په لښکر بدله شوه، او بیا هم دی یې مشر پاته شو.

تیره ورځ د ایران د پارلمان یوه غړي وویل چې په سوریه کې د جنرال همداني غوندي مشر جنرال وژنه د ایران لپاره یو لوی تاوان دی.

د پاسداراني انقلاب پخواني جنرال اسماعیل کوثري چې اوس د پارلمان غړی دی، تیره ورځ وویل چې جنرال همداني په سوریه کې ډیر ستر کارونه کړي وه، هغه په سوریه کې د بشار الاسد د نظام په ګټه ملیشې جوړي کړي، او د داعش سره د جګړې لپاره یې د پوځیانو روحیه او مورال ور پورته کړی وو.

نوموړي زیاته کړه چې د القدس په نامه شیعه ملیشو او حزب الله ملیشو تر منځ د هم آهنګۍ لپاره نوموړي کار کوی، او نوموړی په سوریه کې د جنرال قاسم سلیماني د رسته لاس غوندي وو.

کوثري وویل چې د ایران قیادت پر جنرال همداني باندي د سوریه په جګړه کې ډیر اعتماد درلود، او د جګړې د پرمخ بیولو پوره واک او صلاحیت یې ورکړی وو.

نوموړي زیاته کړه چې جنرال همداني څه موده مخکي ایران ته را ستون شوی وو، او د ایران د پلازمیني څخه ددفاع په خاطر یې ځانګړې قوه جوړه کړې وه، خو د اعلی قیادت له خوا یو ځل بیا سوریه ته ولیږل شو، ځکه چې هلته یې اړتیا او اغیز زیات وو.

باید وویل شي چې د ایران د پاسداران انقلاب پوځ له لوري په یوه خپور شوي بیان کې تیره ورځ وویل شوه چې همداني د داعش په لاس د حلب ښار په شاوخوا کې ووژل شو.

ایران د بشار الاسد د نظام په خلاف ټولو جنګېدونکو ډلو ته داعش وايي.

په دغه بیان کې راغلي وه چې همداني په سوریه کې د تروریستانو په خلاف په جګړه کې ډیري لاسته راوړني لرلې، هغه د سیده زینب رضي الله عنها د قبر څخه په کلکه دفاع کړې وه.

همداني چې د ایراني جنرال قاسم سلیمان رسته لاس بلل کیدی ، د ډیرو عسکري او استراتیژي چارو کارپوهانو په وینا د سوري نظام د ژغورونکي حیثیت یې درلود، او ویل کیږي چې د سوریې د نظامي پوځ تر څنګ د شیعه ملیشو جوړوني پروګرام هم د جنرال همداني ابتکار وو.

پر نوموړي امریکا او نړیوالو قوتونو د کال ۲۰۱۱ څخه اقتصادي بندیزونه هم لګولي وه.

همداني په اړه ویل کیږي چې په کال ۲۰۱۲ کې د سوریې پلازمینه له سقوط څخه ژغورلې وه، د سوریې پخوانی ولسمشر بشار الاسد ته نوموړی تر بل هر ایراني جنرال زیات نیژدې وو.

د رویټرز خبري اژانس په وینا نوموړي په کال ۲۰۱۴ کې ویلي وه چې بشار الاسد په سوریه کې د ایران په نیابتي جګړه کې جنګیږي، ایران د بشار الاسد څخه دفاع

کې جنګیږي، مونږ تیار یو چې سوریې ته ۱۳۰ زره عسکر ولیږو، تر څو په سوریه کې د حزب الله په نوم پوځي ځواک جوړ کړو.

نوموړي ویلي وه چې د لبنان او سوریې وروسته به په عراق کې هم د حزب الله غوندي وسلواله ډله جوړوي.

نوموړي په خپلو څرګندونو کې ویلي وه چې د حزب الله السوري تر شعار لاندي اوس په سوریه کې ۴۲ لواګاني او ۱۳۸ ډلګۍ جنګیږي.