طالبانو «طلوع» او «یک» تلویزوني شبکې نظامي اهداف وګڼل

نن ټکی اسیا (دوشنبه، تلې ۲۰مه، ۱۳۹۴ل): وسله والو طالبانو پخپله رسمي اعلاميه کې په پلازمېنه کابل کې «طلوع» او «یک» خصوصي تلویزوني شبکې نظامي اهداف ګڼلي او په وينا يې نور يې د رسنیو په توګه نه پېژني.

وروسته له هغه چې په کندوز ولایت کې د روانې جګړې په اړه طلوع تلویزون د ناسمو معلوماتو د خپراوي له امله توند ولسي غبرګونونه راوپارول، وسله والو طالبانو په نشر کړې اعلاميه کې د طلوع او یک تلویزونونو ټول کارکوونکي، کاري ډلې او دفترونه ناخوندي وګڼل.

نن ټکی اسیا ته هم د دې اعلاميې يوه کاپي رارسېدلې ده، چې د ارزښت له مخې يې کټ مټ ستاسې مخ ته ږدو:

د طلوع او یک استخباراتي تیلویزيوني شبکو په اړه د اسلامي امارت د نظامي کمیسیون اعلامیه

څرګنده ده چې د امریکايي اشغال سره جوخت د نظامي یرغل ترڅنګ په افغانستان باندې د امریکايي استخباراتو لخوا تبلیغاتي یرغل هم پيل شو چې په ترڅ کې يې د ځينو آزادو رسنیو په نامه چینلونه رامنځته شول او تر اوسه د امریکايي سفارت لخوا پنډ ورکول کيږي، خپرونې يې هم د امریکايي اشغالګرو او دهغو د مزدوروانو په ملاتړ، دافغان میړني ولس د جهاد او مبارزې په ضد، د اسلامي ارزښتونو د ځپلو لپاره، د هیواد دملي وحدت او یو والي د له منځه وړلو په منظور ترتیب او د پروپاګند په ډول وړاندې کيږي.

له دې جملې د طلوع او یک په نوم ټیلویزيوني چینلونه هغه تبلیغاتي شبکې دي، چې په افغانستان د کفارو د فکري ، کلتوري او تبلیغاتي یرغل د پرمخ وړلو مسؤلیت لري، دغه شبکې د امریکایانو د پراخ ملاتړ په مټ زموږ په دیني او کلتوري اقدارو ملنډې وهي، فحشاء او بي حجابي خپروي، د ځوان نسل اذهانو ته د بي دینۍ، بداخلاقۍ، خشونت، قمار، اختلاط او بې حجابۍ غوندې مضر افکار پیچکاري کوي او په ځانګړي ډول د جهاد او مجاهدینو په اړه له کرکې او بربنډې دښمنۍ څخه ډک تبلیغات کوي.

د دغو شیطاني شبکو د دروغجنو تبلیغاتو او هیواد شرموونکو نشراتو یونغد مثال هغه راپور دی چې وایي د تیر لوی اختر په څلورمه نیټه چې کله د اسلامي امارت مجاهدینو د کندز ولایت مرکز ونیو، نو دلته یي خدای مکړه د نجونو په لیلیه برید کړی او نجونو ته یي بې پتي اړولې ده.

دغه ټیلویزيوني شبکې دا دروغجن راپور په داسې حال کې مکرر نشروي، چې د کندز ښاریان او عام اولس دا خبره په ټینګه ردوي او د الله تعالی په حاضر ګڼلو سره شاهدي ورکوي چې د اختر په شپو کې دټول افغانستان تعلیمي اداري اود کندز دنجونو لیلیه رخصت وه او هلته هیچا شتون نه درلود.

د کندز او درست افغانستان متدین اولس په دې نظر دی، چې د اسلامي امارت مجاهدین د اولس د ابرو او ناموس ساتونکي دي اما دا د طلوع او یک غوندې استخباراتي او فحشا خپرونکې تبلیغاتي شبکې دي چې د اولس سپکولو، بې عزته کولو او بې پته معرفي کولو ته یې مټې رابډوهلې او په داسې ښکاره دروغو د اولس پت او درنښت رژوي چې هرڅوک ورباندې په آسانۍ پوهیږي.

د افغان مجاهد ولس په وړاندې د طلوع او یک ټلویزیون د دا ډول ګستاخانه او معاندانه چلند له امله د افغانستان اسلامي امارت نور دغه رسنۍ د رسنیو په حیث نه پيژني بلکې په خپلو نظامي اهدافو کې داخلوي.

له دې وروسته د دغو تیلویزيونونو هیڅ کارمند، نطاق، دفتر، خبري ټیم یا راپور ورکونکی مصؤنیت نلري، د اسلامي امارت نظامي کميسیون خپلو ټولو مجاهدینو ته امر کوي چې د یادو دواړو شیطاني چینلونو په وړاندې پريکنده اقدام وکړي، نور د دغو تلويزیونونو ټول خبریالان او همکاران د دښمنو افرادو په توګه پيژندل کيږي او د دغو تلويزیونونو مراکز، دفترونه او هرځای استولي شوي ګروپونه نظامي اهداف دي چې مخامخ به له منځه وړل کيږي، زموږ غوښتنه ددې رسنیو له متعلقینو داده چې دیادو شبکو له دفاترو او خبریالانو ځان لري وساتي او ټول روابط دې ورسره قطع کړي، خلک دې ددغو رسنیو مرکزي دفتر او څانګو ته له ورتلو، په پروګرامونو کې له شرکت او کورونو ته ددغو رسنیو د خبریالانو له وربللو ځان وساتي، د نظرخاوندان دې په خپرونو کې ګډون نه کوي او مسلمان هیواد وال دې يې له کتلونه ډډه وکړي او په کلکه دې تحریم کړي .

د اسلامي امارت نظامي کمیسیون هیوادپاله او بې پرې رسنیو ته درناوی لري او د بې پرې خبریالانو د کار لپاره پرامنه کاري فضا برابروي، اما هغه رسنۍ چې ددین او وطن دښمنۍ ته یی ملاتړلي وي، د اطلاعاتو د خپراوي پرځای یوازې زهرجن دروغ خپروي او هیواد او اولس ته یې د ګټې په نسبت زیان ډیر وي مجاهدین به یې په اړه بې تفاوته پاته نه شي .

د افغانستان داسلامي امارت

د نظامي چارو کمیسیون

۱۴۳۶/۱۲/۲۸هـ ق
۱۳۹۴/۷/۲۰هـ ش ــ 2015/10/12م

طلوع تلویزون چې د طلوع نیوز په نوم بل ښاخ هم لري، د « موبي ګروپ » له لوري يې په ۲۰۰۳ میلادي کال کې خپرونې پیل کړې، چې په ۲۰۰۶ میلادي کال يې د پښتو برخې لپاره لمر تلویزون هم خپرونې پيل کړې.

په غږیزه برخه کې ارمان اف م راډیو او اراکوزیا راډیو هم د « موبي ګروپ » تر چتر لاندې نشرات کوي، چې څلورویشت ساعته په ټول هېواد کې خپرونې لري.

یک تلویزوني شبکې په ۱۳۸۸ لمریز کال خپلې خپرونې پیل کړي او د دوی په وینا د «یک ګروپ » په نوم یوې کمپنۍ پورې اړه لري.