افغانستانخبرونه

سږکال يونان ته له افغانستان، سوريې او عراق نه ۵ لکه کډوال ورغلي

نن ټکی اسیا (چهارشنبه، تلې ۲۹مه ۱۳۹۴ل): د ملګرو ملتونو دکډوالو ادارې ويلي چې اروپا ته د پناه وړونکو په شمېر کې په بې سارې توګه زياتوالی راغلی.

د غې ادارې ويلي چې د روان زيږديز کال په تېرو نږدې لسو مياشتو کې له افغانستان، سوريې او عراق څخه يونان ته له ۵ لکو څخه زيات کډوال ورغلي دي.

د ملګرو ملتونو د کډوالو د ادارې په يوه تازه راپور کې ويل شوي چې که څه هم په دې وروستيو کې د يونان د ساموس، ليسبوس او چييسوس په سواحلو کې هوا ډېره يخه شوې ده خو بيا هم د پناه غوښتونکو د راتګ لړۍ د پخوا په څېر روانه ده.

په راپور کې دا هم راغلي چې په ډېر بد او ستونزمن حالت کې لاهم د ورځې د ۱۰ زرو په شاوخوا کې پناه غوښتونکي دغو ټاپوګانو ته ځان رسوي، چې په تېرو ۴ ورځو کې دغو ټاپوګانو ته شاوخوا ۳۵ زره پناه غوښتونکي ورغلي چې له دې لارې د اروپا نورو هېوادونو ته لاره پيدا کوي.

په دغو کډوالو کې د عراق سوريې او نورو هېوادونو تر څنګ د افغاني پناه غوښتونکې شمېر هم د پام وړ دی او هره ورځ په لسګونو زره ځوانان په هېواد کې د بې کارۍ او خراب اقتصاد له امله دغو هېوادونو ته مخه کوي.

له افغانستان څخه له شاوخوا يوه کال راهيسې اروپا ته د افغان پناه غوښتونکو شمېره په بې سارې توګه زياته شوې ده.

له سوريې څخه وروسته افغانستان دوهم هېواد دی چې په زيات شمېر وګړي يې اروپا ته د پناه غوښتلو په موخه سفر کوي.

د ملګرو ملتونو د کډوالو ادارې د روان کال د مئ د مياشتې په يوه راپور کې ويلي وو چې په پنځو مياشتو کې (۱۸۱۷) افغان پناه غوښتوتکې اروپا ته د تګ پر مهال په بېلابېلو پېښو کې وژل شوي دي.

که څه هم د افغانستان پخواني ولسمشر حامد کرزي او نورو چارواکو ډېر ځله له افغانستان څخه د خلکو د وتلو او اروپا ته د نه تګ غږ کړی خو په هېواد کې بې کاري او غربت هغه څه دي چې له امله يې افغانان دغو له ستونزو ډک سفر ته مخه کوي.

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x