د غزني امنیه قومندان: زه اسناد لرم، چې اربکیان د خلکو پر ناموس تجاوز کوي

نن ټکی اسیا (سه شنبه، لړم ۲۶مه، ۱۳۹۴ل): د غزني امنیه قومندان وايي چې دی کره شواهد په لاس کې لري چې په اندړو ولسوالۍ کې مېشت اربکيان د خلکو پر ناموس تجاوز کوي.

جنرال امین الله امرخېل وايي چې نوموړي داسې فلمونه او ويديو کليپونه ترلاسه کړي چې د اندړو اربکيان د خلکو پر نامس ډله ییز تېری کوي.

نوموړي د اندړو د خلکو د هغو څرګندونو په غبرګون کې چې په دې سیمه کې مېشت اربکيان د دوی پېغلې او مېرمنې پوستو ته بیايي وویل، چې دی پخپله د دې پېښو پخلی کوي او له ده سره شواهد او اسناد هم شته.

امرخېل د اندړو د دوو تنو د اربکيانو رحمت او نورمحمد نومونه اخلي او وايي چې له دوی سره نور ملګري يې هم ورته کړنې ترسره کوي.

هغه ژمنه وکړه چې دا خلک به یا وژل کېږي یا هم زنداني کېږي، خو ويې نه ویل چې دوی به کله دا اقدام کوي.

د غزني امنیه قومندان دا هم وویل چې د اندړو اربکيان د دې ولسوالۍ تر خپل لاس لاندې سیمو کې هره میاشت له هر کور نه ۲۷۰۰۰ کلدارې په زور اخلي.

دا په داسې حال کې دی چې د اندړو ولسوالۍ اوسېدونکو تر دې وړاندې هم د اربکيانو له لوټ، چور، ځور او وژنو نه شکایتونه کړي و، خو دا لومړی ځل دی چې د اندړو ناموس ته د لاس لوېدو خبره کېږي.

پژواک خبري اژانس د دې ولسوالۍ د کابلو د سیمې د اوسېدونکي کابلو له خولې ليکي چې اربکيان د خلکو له کورونو یا هم د لویو لارو پر سر ځوانې پېغلې او مېړوښې ښځې له ځانو سره بیايي او په بدل کې يې درې سوه زره کلدارې غواړي.

سرچينه د خیال محمد په نوم د یو بل تن له خولې لیکي چې تر اوسه پورې څو ځلې دا پېښې شوې دي خو په اندړو کې مېشت امنیتي مسوولین د اربکيانو د وحشت په اړه څه نه وايي، هغه پژواک ته ويلي: «پلار ولاړ وي، لور يې ترینه یوسي، ایا دا وحشت نه دى؟ ظلم نه دى؟ موږ ورته انسانان نه ښکارو؟ کفر هم داسې نه کوي.»

خیال محمد وايي چې که څه هم په کورونو کې هم د خلکو ښځې د اربکيانو له منګولو خلاصې نه دي خو بیا هم خلک زړه نه شي کولی چې روغتيايي مرکزونو ته لاړ شي.

د نن ټکی اسیا یوټیوب چېنل
avatar
1 د تبصرو شمېر
0 د ځوابونو شمېر
0 ار ایس ایس کې ګډونوال - څارونکي
 
ډېر غبرګون شوې تبصره
تر ټولو ګرمه موضوع
  ګډون وکړئ  
نویو زړو ډیرو خوښو شویو
خبرتیا غوښتل د
معان الرحمن
میلمه
معان الرحمن

داسی خبرونه خو بلکل دزغم نه ده یا خو غزنی کی مجاهدین نشته او یا خو دخلکو ایمان کمزوری ده چی اربکیان دخلکو ناموس ته خدای نا خواسته لاس واچوی او بیا دی دکامل ایمان څښتن زغم ولری که حکومت دکابل دداسی خلکو او اربکیانو مخ ونه نیسی بیا خو حکومت هم بی ناموسه ده زه چی لری مسا فریم په خدای قسم چی له غو ثی می ورته طاقت ونه شو دا کار خو روسانو هم نه کا وه نو داسی به څوک وی چی دابیغیرتی وکړی الله دی دوی تبا ه کړی دا موضوع خو باید ټول چار… نور لوستل »