بایبل پیژنده (۷)

لیکنه او څېړنه: عبد الغفار جُبیر

نوې عهد نامه/نوی تړون(New Testament) چي (۲۷) کتابونه لري هغه دادي

د نوې عهد نامې /نوی تړون کتابونه د ټولو عیسایی علماء په نزد باندی اتفاقی نه دي، اکثره په دې آند دي چي دا(۲۷) کتابونه دي خو بل لورته ځینی عیسایی علماء وایی چي دا(۲۲) دي، ځینی وایی چي دا(۲۳) کتابونه دي،خو په هر صورت دا هغه کتابونه دی چي ددوی په آند  د سیدنا حضرت عیسی علیه السلام څخه وروسته مختلفو لیکوالانو په بېلا بیلو وختو کي لیکلی دي، موږ کولای شو چي نوې عهدنامه په لنډ ډول سره پر درو برخو وویشو:

لومړۍ برخه:

څلور انجیلونه (متی، مرقوس، لوقا او یوحنا)

دوهمه برخه:

خطونه (لیکونه) د پولس،پطرس، یوحنا،یهودا او یعقوب

دريمه برخه:

مکاشفات د یوحنا

د اوسنی نوې عهدنامې (۲۷) کتابونه دادی:

پښتو    عربي    اردو    انګليسي

۱       انجیل متی       متی     انجیل متی       Matthew
۲       انجیل مرقوس     مرقس    انجیل مرقس      Mark
۳       انجیل لوقا      لوقا    انجیل لوقا      Luke
۴       انجیل یوحنا     یوحنا   انجیل یوحنا     John
۵       اعمال رسولان    اعمال الرسل     رسولوں‌‎‏ کے اعمال      The Acts
۶       د رومیانو په نوم د پولس خط      رومة    رومیو ں‌‎‏ کےنام        Romans
۷       د کورنتینانو په نوم د پولس خط (۱)       کورنثوس الاولی  ۱-قرنتیو ں‌‎‏ کے نام    1Corinthians
۸       د کورنتینانو په نوم د پولس خط (۲)       کورنثوس الثانیة ۲- قرنتیو ں‌‎‏ کے نام   2Corinthians
۹       د ګلتیانو په نوم د پولس خط      غلاطیة  غلاطیو ں‌‎‏ کے نام      Galatians
۱۰      د افسیانو په نوم د پولس خط      افسس    افسیو ں‌‎‏ کے نام       Ephesians
۱۱      د فلیپیانو په نوم د پولس خط     فیلیبی  فیلپیو ں‌‎‏ کے نام      Philippians
۱۲      د کولوسیانو په نوم د پولس خط    کولوسی  کلسیو ں‌‎‏ کے نام       Colossians
۱۳      د تسالونیکيانو په نوم د پولس خط(۱)      تسالونیکي الاولی        ۱ تسالونیکيو ں‌‎‏ کے نام        1Thessalonians
۱۴      د تسالوکيانو په نوم دپولس خط (۲)        تسالونیکي الثانیة       ۲ تسالونیکيو ں‌‎‏ کے نام        2Thessalonians
۱۵      د تیموتیوس په نوم دپولس خط (۱)  تیموثاوس الاولی ۱ تیموتاوس کے نام       1Timothy
۱۶      دتیموتیوس په نوم دپولس خط (۲)   تیموثاوس الثانیة        ۲ تیموتاوس کے نام       2Timothy
۱۷      د تیطوس په نوم دپولس خط تیطس    طیطس کے نام     Titus
۱۸      د فلیمیون په نوم د پولس خط      فیلمون  فلیمو ں‌‎‏ کے نام       Philemon
۱۹      د عبرانیانو په نوم د پولس خط    عبرانیین        عبرانیو ں‌‎‏ کے نام     Hebrews
۲۰      د یعقوب عام خط  یعقوب   ازیعقوب James
۲۱      د پطروس اول خط  بطرس الاولی     ۱- ازپطرس       1Peter
۲۲      د پطروس دوهم خط بطرس الثانیة    ۲- ازپطرس       2Peter
۲۳      د یوحنا اول خط  یوحنا الاولی    ۱- ازیوحنا      1John
۲۴      د یوحنا دوهم خط یوحناالثانیة    ۲- ازیوحنا      2John
۲۵      د یوحنا دریم خط یوحناالثالثة    ۳- ازیوحنا      3John
۲۶      د یهوداه خط     یهوذا   ازیهوده Jude
۲۷      د یوحنا
مکاشفات رؤیایوحنا       مکاشفه  Revelation

د نوي عهد نامې کتابونه ،د هغو ليکوالان او د اختلافاتو څپې

۱: انجيل متی:

په څلورو انجیلو کي د متی انجیل ړومبی مقام لري،و بل لور ته ددې انجیل حالت ډیر ویجاړ دی؛ دا ځکه چي متی حواری دا انجیل په عبراني ژبه سره لیکلی دی، لاکن عیسایی متاخرین علماء دا نه منی، یو نوم ورکي کس دعبراني ژبې څخه و یوناني ژبې ته ژباړلی دی، او اصل عبراني انجیل اوس شتون نلری، اپی فينيس دا ثابته کړیده چي په اصل کي د متی انجیل په عبراني ژبه سره ؤ او په یوناني ژبه سره نه ؤ،ريو صاحب هم پخپل کتاب (تاریخ انجیل) کي لیکي چي دا په عبراني ژبه سره ؤ، يوسی بېس هم پخپل کتاب کي لیکلی دی چي دا په عبراني ژبه سره ؤ،لارډنر پخپل تفسیر(کلیات) ټوک ۲ مخ ۱۱۹ کي لیکي چي د متی انجیل په عبراني ژبه سره ؤ،او اکثره عیسایی علماء او څېړونکي په دې آند دي لکه هورن صاحب چي پخپل تفسیر کي یې  راوړی دي د بیلګې په ډول سره بلرمن،کروټیس، کسابن، بشپ والټن، بشپ ټاملائن، ډاکټرکيو، همډ ،دمل ،هارورډ،اوډن، دیکن بل،رایی سلارک،سائمن،ټلی منټ، اوډوین، کامټ میکالس، اری نیس، اریجن، سرل، اپی فینس، کریزاسټیم، جیروم اونور… دا چي اصلي انجیل نشته او و یوناني ژبې ته ژباړل شوی دی او ژباړڼ ئې هم نامعلوم کس دی نو ځکه موږ ویلای شوچي دا هغه د حواری متی انجیل نه دی او وبل لور ته موږ پر دې انجیل باندی د عیسایی علماء قولونه لرو.

فاسټس چي د څلورمې میلادي پېړۍ یو لوړعالم دی وایی چي کوم انجیل چي و متی ته منسوب دی دا د هغه انجیل نه دی ،پروفيسر بائر جرمنی بیا وایی چي دا انجیل ټول درواغ او غلط دی،د ډاکټر ارليمن په آند د متی د انجیل اول او دوهم بابونه الحاقی بولی.

۲: انجيل مرقوس:

مرقوس خپله حواری نه ؤ بلکې د حضرت عیسی علیه السلام د حواری پطرس شاګرد ؤ.

کاډتس او ملرملاټن په دې آند دي چي په اصل کي د مرقوس انجیل په لاطینې ژبه سره ؤ وروسته دا و یوناني ژبې ته و ژباړل شو،او غټ شواهد یی دادي چي دوينس په کتب خانه کي د مرقوس انجیل څه برخه موجوده وه چي په لاطیني ژبه سره وه،په دې کتب خانه کي یوبل د مرقس انجیل هم شتون لری چي په سریاني ژبه سره دی، او پر هغه باندی په ښکاره ټکو سره لیکلی دی چي د مرقوس انجیل په اصل کي په لاطیني ژبه سره دی،و بل لور ته جمهور عیسایی علماء په دې عقیده دي چي داسی نه ده بلکې د مرقوس انجیل په یوناني ژبه سره دی.

وارډ صاحب پخپل اغلاطنامه کي ویلی دی چي جیروم پخپل یو خط کي لیکلی وه چي زیات متقدمین عیسایی علماء ددې انجیل اخري باب نه مني.

۳: انجيل لوقا:

لوقا هم حواری نه ؤ بلکې یو طبیب ؤچي د پولس سره په سفرونو کي ملګری ؤ،بولټن او کونلی وایی چي لوقا په شروع کي هیڅ مذهب ته قایل نه ؤ وروسته بیا یهودي شو.

داسی ویل کيږی چي دا انجیل به لوقا لیکلی وي،ځینی عیسایی علماء ددې انجیل په۲۲ باب کي شک لري،د مارسیونی فرقې په انجیل کي دا باب نشته،د پروتستانو د ډلې مؤسس او د عیسایانو مشهورعالم مارټن لوتهر صاحب په دې آند ؤچي دا درې سره انجیلونه مشکوک دي، او ویل یی چي دا درې سره الهامي نه دي،او دی وایی : چي په ټوله عهدنامه جدید کي د پطرس خط له ټولو څخه درست او صحیح دی او همدا پاک انجیل دی.

۴: انجيل يوحنا:

کاتولیک هیرالډ مطبوعه ۱۸۴۴ میلادی ټوک۷ مخ ۲۰۵ کي لیکلی دی چي اسټارلن پخپل کتاب کي لیکلی دی چي بېله شکه او شبهې د یوحنا انجیل د اسکندریې د مدرسې یو طالب العلم لیکلی دی،هورن صاحب پخپل تفسیر۱۸۲۲ میلادی ټوک ۴: ۲ کي لیکي چي په دوهمه میلادي پیړۍ کي یوه عیسایی ډله د(الوجین) په نامه سره وه چي ددې انجیل څخه منکره وه،همدا رنګه ئې د یوحنا د ټولو لیکنو څخه انکار کاوه، مشهور څېړونکي عالم برطشيندر وایی چي د یوحنا انجیل او و یوحنا ته منسوب لیکونه د یوحنا لیکنه نه ده بلکې په دوهمه عیسایی پېړۍ کي یو کس لیکلی دی او بیایی  وده ته منسوب کړیدی،و بل لور ته جمهورو عیسایی علماء ددې انجیل د۷  باب د ځینو ایاتو څخه انکار کړیدی، وتلی مشهور محقق عالم کروټيس وایی چي په دې انجیل کي ۲۰ بابه وه، او د افسس کلیسا۲۱ باب ورسره یوځای کړ د یوحنا د و فات څخه وروسته.

د څلورو انجيلونو د ليکلو نېټې:

هورن صاحب پخپل تفسیر کي لیکي چي د انجیلونو چي کومې نیټې دي هغه هم غیر معتمدې او غیر معینې دي،نو ځکه سړی ویلای شی چي دا انجیلونه الهامي نه دي، د بیلګې په ډول سره:

لومړی انجيل په ۳۷ میلادي کال کي، یا۱۸ م،یا۴۱ م، یا۴۸م، یا۶۱م، یا۶۲م، یا۶۳م او یا هم په ۶۴ میلادی کال کي لیکل شویدی.

دوهم انجيل په ۵۶م،یا په ۶۵م،یا په ۶۰م، او یا هم په ۶۵ میلادی کال کي لیکل شویدی.

دريم انجيل په په ۵۳م، یا په ۶۳م، یا۶۴ میلادي کال کي لیکل شویدی.

څلورم انجيل په ۶۸م،یا۷۰م، او یا هم په ۹۸ میلادي کال کي لیکل شویدی.

۵: د رسولانو اعمال:

دا لوقا و خپل شاګرد تهیفلس ته لیکلې ده،چي په دې کي د حضرت عیسی علیه السلام د ځینو حواریینو احوال پکښې دي. د عیسایي نړۍ وتلو علماء لکه دولن ای اغنیسی ،مارسیونی، سویرینس او مانی کيز ډلو ددې کتاب څخه انکار کړیدی.

۶: د پولس ليکونه:

د پولس د لیکونو په نېټه او صحت کي هم ژور اختلاف دی،ځینی عیسایی علماء ځینی لیکونه تسلیموی او ځینی یی بیانه منی، د لیکونو نېټه هم توپیر لري لکه د پولس خط د رومیانو په نوم په ۵۵ م کال کي،یا۵۷ م،یا۵۸ م، یا۶۰م، یاد۵۹میلادی کال په پیل کي لیکل شویدی، د تیموتیوس په نوم د پولس خط په ۵۶ م،۵۸ م،۶۴ م ،یا په ۶۵ میلادي کال کي لیکل شویدی،او ځیني علماء وایی چي ددې لیک و خت معلوم نه دی چي د تیموتیوس په نوم لیک کله لیکل شویدی؟ کله چي پولس په لومړ ي ځل و روم ته ولاړی او که په دوهم ځل کي؟ د تیطوس په نوم د پولس خط په ۵۲ م کال کي لیکل شویدی، یا۵۷م، یا۶۴ م،او یا هم په ۶۵ میلادي کال کي.
د پولس په ټولو لیکونو کي ژور اختلاف شته، ځینی عیسایی علماء یی نه منی او ور څخه منکردي.

۷: د پطرس ليکونه،د يوحنا ليکونه، د يعقوب رساله، د يهودا رساله او د يوحنا مکاشفه:

یوسی بیوس پخپل کتاب تاریخ کلیساکي (کتاب ۳ باب ۳) لیکلی دی چي د پطرس لومړی لیک درست دی او دوهم لیک ئې هیڅکله هم په مقدسو کتابونو کي نه ؤ داخل،ددې کتاب به ۲۵ باب کي لیکي:

په دې کي د خلکواختلاف دی،چي د یعقوب لیک،د یهودا لیک، د پطرس دوهم لیک،او د یوحنا دوهم او دریم لیکونه به د انجیل لیکوالانو لیکلی وی؟ او یا به نورو کسانو لیکلی وی او وروسته به ئې و دوی ته  منسوب کړی وي، او د پولس اعمال،مکاشفه، د پطرس لیکونه دا ټول جعلي او فرضي دي، په اصل کي حقیقت نلري.

دعبرانیانو په نوم د پولس لیک په هکله ارنيس بشپ ليس چي په ۱۷۸ م کال کي تیر شویدی، هپ پوليټس چي په ۲۲۰ م کي ؤ،د روم لوی پادری نوتيس چي په ۲۵۱م کي ؤ،هغوی ټولو ددې لیک څخه انکارکړیدی،و بل لور ته سریانی کلیسا تر اوسه پوری د پطرس د دوهم لیک، د یوحنا ددوهم او دریم لیک څخه انکار کوي او نه یی تسلیموی،او اسکالچر بیا وایی چي هرچا چي د پطرس دوهم لیک لیکلی دی هغه خپل وخت خوشی ضایع کړیدی؛ لارډنر پخپل تفسیر ټوک ۴ مخ۱۷۵ کي لیکي: چي سرل او د بیت المقدس کلیساؤ مکاشفه نه قبلوله،او له دې سره ئې کتاب باروک او د یرمیاه رساله یوځای کوله،ځینی عیسایی علماء په دې اند دي چي د یوحنا مکاشفه نه حواری لیکلې ده او نه هم درست کس لیکلې ده،دا بې معنا جهالت او غلط کاردی. او دا باید له مقدسو کتابونو څخه خارجه شي. يوسی بېس پخپل کتاب تاریخ کلیساکي لیکي: چي د یعقوب لیک یو جعلي او فرضي لیک دی ،زیات متقدمین علماء په دې اند دي چي د یهودا رساله هیڅ حقیقت نلری،ميک ډی برحن سينټيورسټس وایی چي د یعقوب لیک د حواریینو د تعلیماتو څخه خلاف دی،د پروتستانو یو وتلی لوی عالم راجرس لاندنی کتابونه د مقدسو کتابونو له لړ څخه وایستل:

د پولس لیک دعبرانیانو په نوم،د یعقوب لیک،د یوحنا دوهم او دریم لیک، د یهودا لیک او د یوحنا مکاشفه.

نوی عهدنامه (نوی تړون) له څه شی څخه بحث کوی؟

۱- انجيل متی:

د حضرت عیسی علیه السلام پیدایښت،نسب نامه،ازمایښت، دده وعظ، معجزې، وړاندوینې، دده صلیب کيدل،او داسی نور.

۲- انجيل مرقوس:

د حضرت عیسی علیه السلام معجزې،دده ازمایښت، دده مرګ،دده و اسمان ته ختل او داسی نور…

۳- انجيل لوقا:

د حضرت عیسی علیه السلام پیدایښت، د حضرت یحی علیه السلام بپتسمه،د حضرت عیسی علیه السلام نسب نامه،معجزې،دده مرګ او بیاژوند ی کيدل او داسی نور.

۴- انجيل يوحنا:

د حضرت عیسی علیه السلام معجزې،د یهودو انکار له مسیح څخه، دده مرګ، بیا ژوندی کيدل او داسی نور…

۵- اعمال د رسولانو:

د یهودا ځای ناستی، روح القدس،پطرس او یوحنا، وعظ،د یعقوب قتل او د پطرس نیول،پولس او برناباس،د پولس نیول،د پولس ایمان راوړل پر عیسی علیه السلام باندی، د پولس سفر،او داسی نور…

۶- د روميانو په نوم د پولس رسول خط:

د پولس سفر،د یهودانو شریعت، ادم او مسیح، اسرائیل، د پولس تبلیغ او داسی نور..

۷- د کورنتيانو په نوم د پولس رسول اول خط:

د مسیح پیغام،د رسولانو خدمت، عشاء ربانی، د مسیح  بیا ژوندی کيدل.

۸- د کورنيتانو په نوم د پولس رسول دوهم خط:

د پولس شکر،اندیښنه ،تیطوس او د هغه ملګري،د پولس خدمت.

۹- د ګلتيانو په نوم د پولس رسول خط:

د پولس رسول کيدل، د پطرس رټل،اخری خبرداری او برکت.

۱۰- د افسيانو په نوم د پولس رسول خط:

دپولس دعا،دپولس خدمت،دمسیح مینه،ماشومان مور اوپلار ،اخری سلام.

۱۱- دفيليپيانوپه نوم دپولس رسول خط:

د فیلیپیانو لپاره د پولس دعا، تیموتیوس او ایفرودیتوس ،نصیحتونه، اخری سلام.

۱۲- د کولوسيانو په نوم د پولس رسول خط:

د خدای شکر،د پولس خدمت،نصیحتونه، اخری سلام.

۱۳-د تساونيکيانو په نوم د پولس رسول اول خط:

ددې خلکو ایمانونه،د پولس خدمت،نصیحتونه.

۱۴- د تسالونيکيا په نوم د پولس رسول دوهم خط:

د مسیح بیا راتلل،دعا، برکت.

۱۵- د تيموتيوس په نوم د پولس رسول اول خط:

نصیحتونه،د مسیح خادم، د ایمان جنګ.

۱۶- د تيموتيوس په نوم د پولس رسول دوهم خط:

د مسیح ښه سپاهی، نصیحتونه، سلام.

۱۷- د تيطوس په نوم د پولس رسول خط:

تعلیم، شخصی نصیحتونه او سلامونه.

۱۸- د فيليمون په نوم د پولس رسول خط:

د پولس سفارش،اخری سلامونه.

۱۹- د عبرانيانو په نوم خط:

لوی خلاصون،عیسی له موسی نه لوی دی،د ملک صدق د کهانت طریقه،عبادت، د مسیح په قربانی ګناه لیری کيږی ،نصیحت ،ایمان ،برکت او اخری سلام.

۲۰-د يعقوب عام خط:

ازمایښت او لمسون،ددنیا سره دوستی کوی،صبر او دعا.

۲۱- د پطروس رسول اول خط:

ژوندی امید،د مسیح مصیبتونه،ښځې او خاوندان،اخری سلامونه.

۲۲- د پطروس رسول دوهم خط:

د درواغو نبیان ،د مالک د راتلو لوظ.

۲۳- د يوحنا رسول اول خط:

خدای نوردی،خردجال،د خدای بچی، د خدای روح او د خردجال روح.

۲۴- د يوحنا رسول دوهم خط:

حقیقت او مینه، اخری سلام.

۲۵- د يوحنارسول دريم خط:

مرسته او مخالفت کول،اخری سلام.

۲۶- د يهوداه خط:

د درواغجنو استاذانو په خلاف عدالت ،خبرداری.

۲۷- د يوحنا مکاشفات:

د مسیح په هکله خوب، پیغامونه،په اسرائیلو مهر لګیدل ،د سرنا اواز ،فرشته او کتاب، ښځه او لوی مار،د بابل بربادی ،زر کاله،نوی اسمان او نوې ځمکه،.

نور بیا…

avatar
  ګډون وکړئ  
خبرتیا غوښتل د