افغانستان
په غزني کې يو امريکايى په اسلام مشرف شو
د غزني ولايت په ګيلان ولسوالۍ کې يو امريکايي سلاکار د اسلام په دين مشرف شوى دى.
د ګيلان ولسوالۍ اوسېدونکیو رسنيو ته ويلي، چې د “ډګرمن ګورين” په نوم يو بهرنى درې ورځې وړاندې په دې ولسوالۍ کې د اسلام سپېڅلی دين منلى دى.
خلک وایې: ياد کس د اسلام مبارک دين په اړه مطالعه کړې او په خپله خوښه مسلمان شوى دى.
د نظم عامه پوليسو د عمومي قوماندانۍ له مطبوعاتي دفتره په خپره شوې خبرپاڼه کې راغلي، چې ياد کس د ګيلان ولسوالۍ د علماوو شورا پر وړاندې د شهادت کلمه ويلې او د “علي” نوم ورته غوره شوى دى.
د سرچينې په خبره ياد سلاکار د امريکا د کاليفورنيا ايالت اوسېدونکى دى.
