د غزلو کېږدۍ

ګل ښکاري ګله ستا دګلو کېږدۍ

ړنګه دې مشه دبلبلو کېږدۍ

جنتي وږم يې خمار خمار کړم

وي دې سمسوره د سنځلو کېږدۍ

وې دروه زما د زړه پر دښته

ډکه له مينې دبخملو کېږدۍ

نيت مې دی کړی يوه شپه پکې کړم

خوند راکوي د نازولو کېږدۍ

د غره لمنه پرې ښايسته ښکاريږي

څه د پردو دي څه د خپلو کېږدۍ

راشه چې سترګې دې درتورې کړمه

دا مخامخ ده دکجلو کېږدۍ

د عرفاني پر کېږدۍ ليک دي اشعار

له نظر مشه د غزلو کېږدۍ