دیني، سیرت او تاریخ

بایبل پیژنده (۱۰)

لیکنه او څېړنه: عبد الغفار جُبیر

عهدنامه عتيق ځکه د خدای کتاب نه دی!!!

تاسی به په دې ایاتو ښه پوه شوي یاست چي دا نه د خدای کلام دی او نه هم د حضرت موسی علیه السلام وینا ده، او نه حضرت موسی علیه السلام دداسی پوچو ویناوو لپاره رالېږل شوی ؤ، بلکې دا د یوه داسی سړي وینا او لیکنه ده چي د حضرت موسی علیه السلام د مرګه څخه ډېر وروسته ئې داسی ګنګوسې د خلکو څخه اورېدلی او بیائې لیکلی دي۔

۱- د پنځو کتابونو (کُتُب خمسه) اکثره برخې د حضرت موسی علیه السلام  څخه نه دې نقل شوي، دا ډېرې سرچینې سره یوځای شوی چي ځینی عیسایی علماوو او فاضلانو ددې پنځو کتابو لیکوالان ددوه درځنه څخه زیات بولی۔

۲- په پیدایښت کي راځی چي ابراهیم علیه السلام پخپلو دښمنانو پسې تر(دان) ښاره پوری ولاړی۔ دا ایات هم نه پر موسی علیه السلام نازل شوی دی، او نه هم ابراهیم علیه السلام لیکلی دی؛ دا ځکه چي د موسی علیه السلام او ابراهیم علیه السلام پر مهال ددې ښارنوم (لیس) وو، لکه چي په پیدایښت (۱۴: ۱۴) او قاضیان (۱۸: ۲۹) کي راغلی دی۔

۳- عهدنامه قدیم(زوړ تړون) د پخوانیو پوچو، بې معنا، بې مفهومه، تاریخې او نیمو تاریخو کيسواو پېښو او توهم نه ډکه یوه مجموعه ده، لکه چي (ګليډسټون برېټن) پخپل یو کتاب كي چي د(بايبل تاريخ) په نامه سره یادیږی داسی لیکي:

بایبل پر منظوم، روایتی کيسو، تاریخي ، ولسي او قومي پېښو او هغونظمو باندی مشتمل دی چي د اسرائيلو د پلرونو څخه سینه په سینه راغلی دي؛ چي په دې کيسوکي سرګردانه او غیر رېښتنې کېسې ډېرې دی، چي داسی کيسې د پیدایښت په ۲۱ او ۲۶ باب کي په ابراهیم او سحاق پوری تړل شوی روایات دي۔

۴- بایبل دداسی بی مفهومه کرښونه ډک دی چي یو انسان ئې هم نشی منلای، یو عقل ئې نشی منلای، یو ذهن ئې نشی منلای؛ او د بایبل د کيسو تطابق یوه داسی پېچلې معماده چي دا (۲۰۰۰) کاله کيږی چي بېشفان، راهبان، پادریان او پاپان په بوخت دي چي پایلې ئې په صفرکي ضرب دي، او بس۔

او په اخر کي د بایبل ډېرو مفسرینو دا منلې ده چي بایبل د تناقضاتو (ټکرونو) څخه  ډک دی۔

چي پر ټکرونو باندی پخپل ځای کي بحث کيږی ان شاء الله۔

نو ځکه دا اوسنی تورات نه د موسی علیه السلام کتاب دی او نه هم الهی کلام دی۔

۵- ټول اهل کتاب په دې اتفاق لری چي لومړی تاریخ او دوهم تاریخ د عزرا علیه السلام د حجی علیه السلام او زکریا علیه السلام په پوره مرسته سره لیکل شوی دی، او دا هغه کيسې او واقعات دی چي په یهودو کي مشهورې وې او بیا ورته د کتاب بڼه ورکول شوه۔

او که چيری بالفرض دا ومنل شی چي دا تورات عزرا لیکلی دی، نو څنګه به و منو چي دا د حضرت موسی علیه السلام کتاب دی، او یا د الله له لوری نازل شوی کلام یا کتاب دی؟ بلکي هیڅ کله نه۔

۶- ډاکټر سکندرکيدس چي یو معتبر عیسایی عالم او فاضل دی هغه د خپل یو کتاب (جديد بايبل) په سریزه کي لیکي:
چي درې خبرې و ماته په یقینی ډول سره ثابتی شویدي:

۱: اوسنی تورات د حضرت موسی علیه السلام لیکنه نه ده۔

۲: دا کتاب په کنعان او یاهم په بیت المقدس کي لیکل شویدی۔

۳: ددې تورات وخت د داود علیه السلام څخه مخکي او د حزقیال علیه السلام څخه وروسته نه دی ثابت شوی، چي ددې تورات د لیکولو وخت د حضرت سلیمان علیه السلام دوره ده، دا د حضرت عیسی عليه السلام د پیدایښت څخه تقریبا (۱۰۰۰) کاله کيږی۔

۷- لوی فاضل عالم پادری وايی:

د حضرت موسی علیه السلام په وخت کي د خط او کتابت رواج نه وو۔

چي دا یوه ډېره په زړۀ پوری او معقوله خبره ده، او پر ټول تورات ئې دا مهر وواهه  چي دا د حضرت موسی علیه السلام تورات نه دی، نه حضرت موسی علیه السلام لیکلی دی او نه هم د هغه په وخت کي لیکل رواج وو؛  چي ددې زرینې وینا څخه دا جوته ده چي دا تورات د حضرت موسی علیه السلام څخه ډېر وروسته لیکل شوی او ددې په منظور چي خلک ورته متوجه شی نو ئې و سیدنا حضرت موسی علیه السلام ته منسوب کړ۔

۸- په مجموع کي په ټوله بایبل کي غلطیانې دومرې ډېرې دي، چي په دقت سره د لوستلو څخه وروسته به دا و یوکس ته معلومه شی چي دا ټول بایبل غلط دی، که یوه موضوع په لسو کتابو کي راغلې وې، نو همدغه یوه موضوع به په ټولو کتابو کي سره بېله وي، او داسی ډېر څه  به پکښې تر سترګو کيږی چي د مؤثقو تاریخونو په حواله سره به غلط شی، او بله داچي د بایبل هره پاڼه د بلې پاڼې سره په مخالفت کي ده، چي لوستونکو ته ضرور دا په ذهن کي راځی چي په دغو دواړو لیکنو کي یوه لیکنه ضرور غلطه ده؛ چي زه ئې بېلګه وړاندی کوم:

لکه په بایبل کي چي راځي:

هيڅ حرام زاده (ولد زنا) به د خدای و ټولۍ ته داخل نشی او تر لسم پښته پوری به دده په نسل کي د خدای د ټولۍ څوک رانشی۔ (استثناء ۲۳: ۲)

دا په دې غلطه ده چي حضرت داود علیه السلام او دده ټوله کورنۍ پکښې شامله ده تر فارض پوری، او حال داچي فارض د زنا څخه پیدا شویدی، چي بیان ئې د پیدایښت په ۳۸باب (۵ـ ۱۹) بیاد (۲۷ـ ۲۹) کي  راغلی دی،دا ډېره د شرم نه ډکه کيسه  ده چي په بایبل کي ئې د فحشاء تر سرلیک لاندي وګوری،  او حال داچي حضرت داود علیه السلام د فارض په لسم پښت کي دی چي د متی او لوقا په نسب پاڼو کي شامل دی، لکه په بایبل کي چي راځي:

داؤد د یشی زوی، یشی د عوبید زوی، عوبید د بوعز زوی، بوعز د سلمون زوی، سلمون د نحشون زوی، نحشون د عمیناداب زوی، عمیناداب د رام زوی، رام د حصرون زوی، او حصرون د فارض (فرص) زوی۔ متی (۱: ۳ـ ۷)۔

و بل لور ته که موږ د بایبل دا ایاتونو ته وګورو نو د ټولی عیسایی نړي لپاره یوه حیرانوونکې پرېکړه ده او هغه دا چي که یوڅوک ولد زنا (حرامي) ؤ نو تر لسم پښته پوری به د هغه ډلي څخه څوک د خدای و ټولۍ ته داخل نشی یعنی د خدای رحمت ور څخه بند دی، او بل دا چي تر لسم پښته پوری به دا ټول (ولد زناوي)  وی ایا په عیسایی نړۍ کي داسی  څوک شته چي ددې ایاتو مطابق (حرامي/ولدزنا) نه وي، او یا داسی څوک شته چي د خدای په ټولۍ کي دی داخل وي نه هیڅکله نه؟؟؟؟ نو که دا ایات رښتیا شی نو پخپله د عیسایی نړۍ لپاره ئې پرېکړه شرموونکې او هیښوونکې ده.

اوسنی انجيل (نوې عهدنامه/نوی تړون) يا زېری د خدای کتاب نه دی!!!

په دې څلورو انجیلونو کي د سیدنا حضرت عیسی علیه السلام د پیدایښت څخه نېولې، دده د ژوند حالات، و ده ته منسوبې ویناوې او دده مزعومه مرګ هم پکښې شامل دی، او پاته دی نه وی چي وده ته ئې (۶۶) په اصطلاح پلرونه اونیکونه هم پیداکړی دي،حال دا چي هغه پلارنه درلودی، او دده دوې مختلفې نسب پاڼې هم پکښې دي؛ او دا و هرچا ته جوته ده چي دا هغه وحی نه دی چي د خدای جل جلاله له لوری پر سیدنا حضرت عیسی علیه السلام باندی نازلې شوې وې، بر عکس دا ځینو خلکو د خپلو ځانو څخه لیکلی دي، چي ددې دواړو شجرو (نسب پاڼو) ټکرونه ئې پردې دلالت کوی چي دا د خدای کلام نه دی۔ ۔

د لوقا انجيل د خدای کلام نه دی

د لوقا انجیل په پیل کي لیکي:

ای خوږه یتوفیلوسه! ډېرو خلکو په دې لاس پوری کړیدی چي د هغه واقعاتو ترتیب وار بیان وکړی کوم چي زموږ په مینځ کي تېرې شوې، بلکې هغوی موږ ته خبرې حواله کړیدي او چا دا واقعات د سر نه پخپلو سترګو لیدلی وو او د زېرې خاوندان وو، نو زه هم په خپل وار ای خوږه یتوفیلوسه! ستا د پاره د پوره تحقیق نه پس دا ټولې خبرې په ترتیب سره نقل کوم دا ددې لپاره چي تاته د هغو خبرو په هکله صحیح معلومات در کړم د کومو نه چي ته خبرکړشوی ئې۔ (لوقا ۱: ۱ـ۵)

که چيری اوس موږ ددې ایاتو څه تجزیه او څېړنه وکړو نو دا به په لاس راشی چي دا کيسې په هغه وخت کي هرچا لیکلې، پر هر پنډله او کلی کي هر څوک لیکوال وو، او چي هرچا هرڅه ور سره یوځای کولای نو هیڅ پروائې نه درلوده، دلته لوقا په سپینو خبرو پیل کوی، او دا و موږ ته ښکاره کوی چي زما دا ټول انجیل زما په اند ما ترتیب کړیدی، او زما په شان ډېرو خلکو داسی د ځانه انجیلونه لیکلی دي؛ بله خبره داده چي لوقا دلته دا نه وایی چي یا و ماته وحی شوی دي، او یاهم زه دا انجیل د روح القدس (جبرائيل علیه السلام )په واسطه یا مرسته لیکم، برعکس دی دا وایی چي زه هم د نورو عامو خلکو په شان یو څوک یم ، او بل دا چي لوقا د خپل ځان بهتروالی هم نه ښکاره کوی، چي زما رتبه څومره ده۔

نه لوقا دلته دا څرګندوی چي دا حکم و ماته سیدناحضرت عیسی علیه السلام کړیدی چي زه باید دا ولیکم، او یاهم ده امر راته کړیدی چي زه باید لیکل وکړم بلکې کيسه ډېره وختی تېره شوې ده، او اوس یو څوک د لوقا په نامه راولاړېږی او یوڅه لیکي، دا ځکه چي که کيسه ژر تیره شوی وی نو بیا ضرور و هرچا ته ئې رښتیا او درواغ معلومیږی ، نو ځکه دا په هیڅ صورت د خدای کلام نشی کيدلای۔

نوې عهدنامه هم د زړې عهدنامې په شان د غلطیانو، ټکرونو، مبهمو او غیرواقعې کيسو یو خورجین دی۔

په اوسني انجيل کي غيرواقعې کرښې

د بېلګې په ډول سره:

عیسی چي د روح القُدُس نه معمور د اردُن سیند نه واپس شو او روح القُدس هغه بیابان ته بوتلو او تر څلوېښتو ورځو پوری په بیابان کي د ابلیس په لمسون کښې وو۔ (لوقا ۴: ۱ـ۳)، متی۴: ۱ـ ۱۱، مرقوس ۱: ۱۲ـ ۱۳)

اوس که موږ دا ایات د انصاف په تله کي وتلو نو دا به ښه روښانه شی، چي د خدای جل جلاله یو لوی پېغمبر به څنګه (۴۰) ورځی د ابلیس په ازموینه کي پاته کيږی، او ابلیس به تربیت ورکوی العیاذبالله، ابلیس څوک دی چي د خدای یو لوی پېغمبر امتحانوی، او هغه ته تربیت ورکوی؟

ایا د سیدنا حضرت عیسی علیه السلام څخه مخکي و نورو پېغمبرانو ته هم ابلیس درس او تربیت ورکړیدی؟

او حال دا چي د نړۍ په ټولو مذهبونو او مفکورو کي شیطان د انسان دښمن دی، او شیطان د تل په شان یو انسان وهلاکت، ضلالت، او د دوږخ و کندې ته  چي وس ئې کيږی غور ځوی۔

چي ددې ایات څخه دا پایله اخیستل کيږی چي دا نه د خدای کلام دی، نه د یوه نبی کلام دی، نه د یوه حواری (دعیسی علیه السلام د مرید) کلام دی بلکې دا د یوه بې عقله، بې وقوفه، او په هر څه ناخبره د یوه داسی سړی لیکنه او تخیل دی  چي و هغه ته تور او سپین یوشان ښکاره کېدل۔

بله هيښونکې په بايبل کي:

بیا ابلیس هغه پر یوه لوړه وخېژاوه او د نړۍ ټولې پاچاهۍ ئې د سترګو په رپ کي ورته ښکاره کړی۔ (متی ۴: ۵)

ایا هلته په بیت المقدس او یا د بیت المقدس په شاوخوا کي داسی لوړ ځای شته چي ټوله د مځکې کُره ور څخه ولیدل شی؟

ایا داسی لوړ ځای شته چي د نړۍ دوې یادرې پاچهۍ ور څخه ولیدل شی؟

نه هیڅکله نه!!!!

د نړۍ تر ټولو لوی غر د همالیا د غرونو په لړۍ کي د ایوریسټ غر دی چي لوړه څوکه ئې په ټوله نړۍ کي هسکه ده او حال داچي که یو څوک پر هغه ودرېږی، او اوسنی عصری دوربین هم ورسره وی، لا امکان نلری چي نیمه نړۍ دي ووینی؛ نو ابلیس په هغه وخت دا ټوله نړۍ څنګه ورته ښکاره کړل؟

بياوايی:

زه به دا ټولې پاچایانې و تاته در کړم دا ځکه چي ددې اختیار و ماته راکړل شویدی۔ (متی ۴: ۶)

داټولې پاچایانې چا و ابلیس ته ورکړې دي؟

ایا شیطان کولای شی چي د انسانانو پاچاهۍ اشغال کړی؟

ایا اوس هم واتیکان په دې باور دی چي دا ټوله نړۍ د ابلیس پاچایانې دي؟

داسی پوچي ، د حقیقت نه لیرې کيسې او دروغ څوک منلای شی چي دادی العیاذبالله د الله جل جلاله کتاب وی، د انه د خدای کلام دی، نه د خدای د استازی کلام دی ، نه د صحابی کلام دی او نه هم د یوه هوښیار او مصلح سړي کلام او لیکنه ده۔

د پولس ليکونه ناقص دي:

په نوی عهدنامه کي د پولس لیکونه هم شتون لری، چي پولس به پخپل ځای کي در و پېژنو، د پولس د لیکونو په هکله لیکي:

پولس خپل لیکونه په ناقصه یوناني ژبه سره لیکل، دالیکونه ئې په چټکۍ سره لیکل؛ له همدې کبله دده لیکونه غیر واضح، نیمګړي او بې ترتیبه وو او دده لیکونه د ډېرو جذباتو له کبله غیر معتدله او مبهم وو او ده ته دا جوته نه وه چي دده دا ناقص لیکونه به بیا د نوې عهدنامې یوه برخه ګرځی، کيدای شی ټوله نوې عهدنامه همداسی وي هر لیکوال چي لیکله دائې نه ګڼله چي دا به د خدای کلام شي، چي وروسته کلیسا ټوله د خدای په کلام کي داخل کړل۔

ډاکټرموريس بوکائی د نوی عهدنامې په هکله وايی:

په دې لیکنو کي ډېر لږ د وحی اثر تر سترګو کيږی، او نن سبا چي کوم کتابونه و موږ ته پاته دي دا د انسانانو د لاس کسب او دوی موږ ته پرې ایښی دي او وحی ئې ټولې دړې وړې کړې دي او هیڅ حقیقت ئې نه دی پکښې پرې ایښی۔

فاسټس چي د(مانی کيز)د يوې عيسايی ډلې يو عالم دی وايی چي:

دا و هر چاته تر لمر سپینه ده چي نوې عهدنامه نه حضرت عیسی علیه السلام لیکلې ده، او نه هم حواریینو لیکلې ده بلکي دا نوم ورکو خلکو لیکې ده ، او دده(حضرت عیسی علیه السلام) حواریینوته ئې منسوبه کړیده؛ چي خلک ورته اعتبار ورکړی او حال دا چي دوی و هغو خلکو ته چي حضرت عیسی علیه السلام ئی مانه ډېر تکلیفونه و رسول هغه له دې کبله چي په نوې عهدنامه کي داسی غلطیانې او ټکرونه شتون لری چي تر عقل لوړ دي۔

چي موخه ئې داده چي عقل هم ورته حيران دی

اسټاولن پخپل يو کتاب کي وايی:

ټوله انجیل د مصر د اسکندريې د ښار د یوې مدرسې د یوه طالب العلم لیکنه ده۔

د یوحنا انجیل (۲۰) بابه دی او(۲۱) بابه ئې افسیوس (Ephesus) د یوحنا د وفات څخه وروسته لیکلي دي۔

په دوهمه میلادی پېړۍ کي د عیسایانو یوې ډلې چي د (وجين) په نامه سره یادېده د یوحنا د ټوله انجیل څخه ئې انکار وکړ۔

د انجیلونو د لیکلو زمانه ناقصه او نامعلومه ده، چي هیڅوک و یو درست مسیر ته نشی تللای او تیرو مشایخو ددې ناقصو او مبهمو روایاتو تصدیق کړیدی او راتلونکو نسلو بیا د تعظیم له کبله قبول کړیدی؛ چي دا د درواغونه ډک روایات د یوه کاتب څخه و بل کاتب ته رسېدلې دي۔

د انجیلو لیکوالانو هیڅ یوه هم دا نه دي ویلی چي دا د خدای کتاب دی، او یا خدای و موږ ته وحی کړیدی، او یا دا و موږ ته روح القدس ویلی دی۔ چي په اصل او بنسټ کي دا د حواریینو کتابونه هم نه دي؛ دا په دې مفهوم چي متی د متی کتاب نه دی، یوحنا د یوحنا کتاب نه دی، لوقا د لوقا کتاب نه دی، او همدارنګه مرقوس د مرقوس کتاب نه دی، لکه په لاندي کرښو کي۔

د متی انجيل د متی کتاب نه دی؟

په بایبل کي په نوې عهدنامه کي د متی په انجیل کي راځي:

څنګه چي عیسی له دې ځای څخه وړاندی تېر شو نو عیسی یو سړی چي د محصولچي پر چوکۍ ناست ولید او هغه ته ئې وویل چي زما پسې راځه! متی پاڅیدو او په هغه پسې روان شو۔ (متی ۹: ۹)

که چيری دا د متی په لاس لیکل شوی وای نو ده ولی د خپل ځان لپاره د غایب (دریم سړی) صیغه کارولې ده؟ او که دا دده لیکنه وای نو پورتنی ایات داسی پکار وو:

څنګه چي عيسی له دې ځايه تېر شو زه ئې پر چوکۍ ناست وليدمه، او راته ئې وويل چي په ماپسې راځه ! زه پاڅېدم او پسې روان شوم۔

له دې څخه دامعلومه شوه چي دا کتاب یوه نوم ورکي سړی لیکلی او بیائې و متی ته منسوب کړیدی، چي ددې ایات څخه ښه ښکاری؛ او که چیری ئې و دې کتابو ته د متی، یوحنا، لوقا او مراقس نومونه نه وای ورکړی نو زرکاله مخکي به ئې لا یو حرف نه وای۔
د يوحنا انجيل د يوحنا کتاب نه دی!!!

یو څو بېلګې ئې وړاندی کوم:

۱: دا هم دغه مرید دی چي دلته چي څه لیکلی شویدی د هغې ګواه دی، دا په حقیقت کښې هغه دې چي دائې ولیکل او موږ ته دا معلومه ده چي د هغه ګواهې رېښتنې ده۔ (یوحنا ۲۱: ۲۴)

که چیری دا د یوحنا لیکنه وای نو بیا دلته د بیاولی (ددریم سړی ) په شان دی، ا و ولی ئې دا ول سړی (متکلم) ضمیر نه دی ورته استعمال کړی۔ چي و ټولو ته دا پېغام ورکوی چي دا نه د یوحنا کتاب دی، نه د عیسی علیه السلام او نه کوم الهامی بڼه لری۔

۲: دا د سترګو لیدلې ګواهې ده  چي پخه ده، او هغه پوهیږی چي هغه رښتیا وایی، چي تاسو هم پرې ایمان راوړی۔ (یوحنا ۱۹: ۲۵)
که دا د یوحنا کلام وای نو باید د(هغه) پرځای (زه ) راغلی وای، چي دا تر لمر سپینه ده چي دا د یوحنا په لاس نه دی لیکل شوی او بس۔ او همدارنګه د بایبل نور کتابونه…

د اليګزيدر اعتراف

هنری واسکاټ پخپل تفسیر کي په اخری ټوک کي د الیګزیدر په وینا لیکي:

دا ضروري نه ده چي هره خبره دی نبی کړې وي نو هغه دی الهامي او قانوني وي او د سلیمان په ځینو کتابونو کي چي دوی دی الهامي وي دا اړینه نه ده،چي هرڅه ئې لیکلی وي هغه دی الهامي وي او دا په یاد وساتی چي و انبیاءاو حواریینو ته په خاص خاص حالتونو کي الهام کيږی.

د انسايکلو پيډيا بريتا نيکا اعتراف

پردې خبره باندی جګړه ده چي هر څه په مقدسو کتابونو کي لیکل شوی وي هغه الهامي دي که نه دي؟ جیروم، کروټیس،پروکوبیس او نور علماء وایی چي د مقدسو کتابو هر قول الهامي نه دی.

هغه خلک چي وایی چي د بایبل هره خبره الهامي ده دوی ئې د کره شواهدو له مخی نشی ثابتولای.
(ټوک ۱۱ مخ ۲۷۴)، (ټوک ۱۹ مخ ۲۰)

د واټس اعتراف

واټس یو کتاب لیکلی دی چي د(الالهام) په نامه سره دی، په دې کي ئې یوه رساله لیکلې ده چي پر دې بحث کوي چي ایا بایبل الهامی دی که یا؟ دی وایی چي د لوقا انجیل الهامي نه دی،دی وایی چي عیسایی  علماء دا لیکنی داسی کړیدي لکه یو څوک چي یوڅه لیکي،لکه څرنګه چي غیر حواریینویو څه لیکل همداسی دوی هم لیکل.

د هورن صاحب د تفسيراعتراف

د هورن صاحب د تفسیرټوک ۲ مخ ۷۹۸ کي داسی وایی:

اکهارن د جرمني د علماء څخه دی هغه وایی چي و حضرت موسی علیه السلام ته الهام نه دی شوی.

بیا په مخ ۸۱۸ کي داسی وايي:

شلز، وات، روزن ملر او ډاکتر جدس وایی، چي و حضرت موسی علیه السلام ته هیڅ الهام نه دی شوی او هغه پنځه کتابونه چي دي هغه د هغه وخت دروایاتو ټولګه ده.او نن سبا د جرمني په علماء کي دا فکر په تیزۍ سره روان دی.

د لوتهرصاحب اعتراف

لوتهر پخپل کتاب په ټوک ۳ پاڼه ۴۰ کي لیکي چي زه نه د موسی خبره اورم او نه هم و هغه ته ګورم دا ځکه چي هغه د یهودو لپاره ؤ او زه د هغه سره هیڅ اړیکه نلرم.

لوتهرصاحب په بل کتاب کي وایی چي زه نه موسی منم او نه ئې تورات منم دا ځکه چي دی د حضرت عیسی علیه السلام دښمن دی.

نور بیا…

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x