افغانستان

د هېواد جنوب: تېرو لسو مياشتو کې ۷۵۰ ملکيانو ته مرګ ژوبله اوښتې

نن ټکی اسیا (سه شنبه، مرغومي ۲۲مه، ۱۳۹۴ ل): د کندهار د بشري حقونو سيمه ييز دفتر وايي چې په جګړه کې د ښکېلو غاړو د نه پاملرنې له امله د ملکي تلفاتو شمېره زياته شوې ده.

په کندهار کې د بشري حقونو دفتر وايي چې د هېواد په جنوبي ولايتونو کې په جګړو کې د تېر کال په پرتله سږ کال د ملکي وګړو تلفاتو کې زياتوالی راغلي چې د تېر کال د ملکي تلفاتو څخه نولس سلنه زيات ښودل شوي دي.

د کندهار د بشري حقونو د سيمه ييز دفتر وياند عبدالعزيز اکرمي وويل چې د روان لمريز کال په تېرو لسو مياشتو کې ۴۹۲ تنه ملکي وګړي وژل شوي او تر ۲۵۵ نور زیات ټپيان شوي دي.

د کندهار د بشري حقونو دفتر وايي چې دوی ډېر ځله له امنيتي ځواکونو غوښتي چې په جګړو کې دې د ملکي وګړو ژوند ته پام وکړي خو په وينا يې د دوی غوښتنې نه دي منل شوي او وايي چې امنيتي ځواکونه زيات وخت ولسي اباديو ته څېرمه خپل سنګرونه جوړوي.

د يادونې وړ ده چې تر دې وړاندې هم هر کال په جګړو کې د ملکي وګړو د تلفاتو په اړه راپورنه خپريږي، چې په کې زيات وخت طالبان د ملکي وګړو د مرګ ژوبلې عاملين بلل کيږي خو طالبان وايي چې دوی په جګړو کې د ملکي وګړو د ژوند له پاره فکر کوي او هڅه کوي چې په جګړو کې ملکي وګړو ته زيان ونه رسيږي.

په افغانستان کې د ناټو ځواکونو د هوايي بريدونو له امله هم تر اوسه په زرګونو تنه بې ګناه ولسي خلک وژل شوي دي.

بايد وويل شي چې نږدې يوه مياشت وړاندې د ملي ځواکونو يوه هوان مرمۍ د ميدان وردګو په ولايت کې په يوه کور لګېدلې وه چې له امله يې د ښځو او ماشومانو په ګډون ۹ تنه وژل شوي وو.

تېره اوونۍ هم د پکتيا د زرمت ولسوالۍ اوسېدونکو د نن ټکي اسیا سيمه ييز همکار ته ويلي و چې د ملي ځواکونو د عملياتو په ترڅ کې په څو کلو کې ۱۱ تنو ته مرګ ژوبله اوښتې وه چې يوه په کې سپين سرې مېرمن هم وژل شوې وه.

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x