دیني، سیرت او تاریخ

د مشورې اهميت او اداب

حیات پکتیاوال

د هر کار تر کولو وړاندي شريعت دوه حکمونه کړي دي:

١- استشاره يعني خپل منځي مشوره

٢- له الله تعالى څخه استخاره

د مشورې په اړه الله ج په قران عظيم الشان کې فرمايلي دي: وَالَّذِينَ اسْتَجَابُوا لِرَبِّهِمْ وَأَقَامُوا الصَّلَاةَ وَأَمْرُهُمْ شُورَى بَيْنَهُمْ وَمِمَّا رَزَقْنَاهُمْ يُنْفِقُونَ (38 الشورى)

ژباړه: او د هغوى لپاره دي چې د خپل رب بلنه يې منلې، لمونځ يې درولى او خپل منځي کارونه يې په مشوره دي، او څه چې موږ ور روزي کړي د الله ج په ليار کې يې ترې مصرفوي.

رسول اکرم صلى الله عليه وسلم فرمايلي دي چې په خپله رايه هيڅ څوک هم بريالى نشو او نه له مشورې وروسته ناکام شو.(تسهيل النظر و تعجيل الظفر ١\٣٠)

د مشورې ګټې:

١- ستره ګټه يې داده چې په کورونو کې به د رسول الله صلى الله عليه وسلم سنت راژوندي شي، او چېرته چې سنت ژوندي شي هلته الله ج خپل رحمت نازلوي.

٢- د کورنۍ د وګړو او خپلوانو تر منځ به مينه پيدا شي، هر کس به دا ګڼي چې دى هم يو مقام ګټي، له همدې امله ورڅخه مشوره غوښتل کېږي او د ټولو زړونه به سره نژدې شي.

٣- پرېکړه به د يوه کس نه وي بلکي ټوليزه به وي.

 د مشورې په مهال بايد لاندي اداب مراعت شي:

١- د مشورې دي يو امير وټاکل شي چې له هر کس څخه په خپل وار مشوره واخلي او د ټولو له رايي سره سمه پرېکړه وکړي، کله چې امير فيصله وکړي نو ټولو ته ښايي چې ويې مني.

٢- هر کس دي په خپل وار مشوره ورکړي، تر هغه چې مشوره غوښتل شوې نه وي مه يې ورکوئ، کله چې وغوښتل شي، نو ښه فکر وکړئ، او په ډېر وقار سره خپله رايه وړاندي کړئ.

٣- د چا رايه مه غورځوئ او دخپلي رايي ګټه او حکمت بيان کړئ، د چا د رايي په ويلو دا مه واياست چې دا صحيح نه دى.

٤- هر کس دي خپله رايه، رايه وګڼي نه فيصله او که د چا په رايه فيصله وشي، هغه دي الله ج ددې کار د اصلاح دعا وکړي او استغفار دي کوي او د چا په رايه چې فيصله ونشي هغه دي غوره وګڼي نورو ته نه ښايي چې د هغه کس په رايه طعن او تشنيع وکړي.

٥- کله چې ازمويښت وشي، دا مه واياست چې ما مخکې درته ويلي وو، ګورئ تاسو که زما خبره منلې واى، داسي به نه واى شوي، ځکه په حديث شريف کې راغلي دي: د “که” لفظ دروازه پرانیزي.

د مشورې پينځه دعاوي:

١- اللهم الهمنى رشدي و اعذنى من شر نفسى.

ژباړه: الهي! زما مقدري ښې ګڼي مې په زړه کې واچوې، ما د خپل نفس له بدي وساتې. (ترمذي، الدعوات ٢\١٨٦)

٢- اللهم استهديک لارشد امري

ژباړه: اې الله! زه له تا څخه په خپله معامله کې د برياليتوب د لارو هدايت غواړم.(مسند احمد، ٤\٥٩٧)

٣- رب اغفر و ارحم و اهدنى السبيل الاقوم

ژباړه: اې الله! ومې بښې، رحم وکړې او سمه نېغه لار راوښيې. ( مسند احمد، ٦\٣١٦)

٤- اللهم قنى شر نفسى و اعظم لى على ارشد امرى.

ژباړه: اې الله! ما د خپل نفس له شر څخه وژغورې او ماته زما د هدايت د چارو کولو همت راکړې. (مسند احمد، ٤\٤٤٤)

٥- اللهم ان قلوبنا و نواصينا و جوارحنا بيدک لم تملکنا منها شيا فاذا فعلت ذالک بنا فکن  انت ولينا وهديناالى سواءالسبيل.

ژباړه: اې الله! زموږ زړونه، تندي او ټول غړي ستا په لاس کې دي له هغوى څخه دي په يوه هم مالک نه يو ګرځولي نو دا چې تا موږ داسي کمزوري کړي يو ته مو کار جوړوونکى شي او موږ ته د نېغي لاري هدايت وکړې. ( الحزب الاعظم، المنزل الرابع ٩٣ شمېره ٤٩)

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x