خوب «ازاد نظم»

طالب جان

زه بیګا غوږ غوږ سترګې سترګې ومه

ما په دا غبرګو ګنهګارو لیدل

چې د بیګا شپې په تیاره کوډل کې څه تیرېدل

هو، ما هر څه ولیدل

شپه چې د تورې تروږمۍ پړونی

یي و اغوستی د تیارو وزر یې

په هره خوا باندې خواره واره و

او ما ماښام هم ولید

لا یي له لاسو د شهید مازدیګر

سپیڅلي وینې څڅېدې څڅېدې

لا یي په سترګو کې د قهر لمبې

لکه د سره شفق وهلې وريځې

او تاوېدې تاوېدې

د شپې د تورې او تیاره کوډل تر مخ

په هرکلي ولاړ و

***********

شیبه لا تېره نه وه

چې مست توپان پر خښمیدلي مزل

چې یي تر پښو لاندې د شنو چینارو

د شنو نښترو او شینکیو شناختو

د ماتېدو خرپاری اوریدو مې

په غورځنګي ګامو یې

د شپې په تور لخکي پل کیښودو

او بیا سیلۍ وه چې د شنو پوړنو ، دنګو شملو

او د قبرونو د جنډو په څیريدو یي تنده نه وه ماته

د ویر وحشت او د ماتم سندره

یي هم په خوله وه

د تیارو کور ته راورسېده

څه شېبه وروسته بړبوکۍ مې لېده

په خړ ځولۍ ځولۍ کمیس کې زنګېده زنګېده

او د پیریانو او دیبانو مستانه ډول ته اتڼ یي واهه

له ډیره نازه یي بد ذوقه ځواني

مستانه ډول ته په هر بند بند ماتېده ماتېده

او په ګډا ګډا یي

د تورې شپې کره ځان ورساوو

***************

زه بیګا غوږ غوږ سترګې سترګې ومه

هو، ما هرڅه ولیدل

شپه چې د تورې تروږمۍ پړونی

یې و اغوستی د تیارو وزر یې

په هره خوا باندې خواره واره و

خپلو راغلو میلمنو ته یي همدا ویل چې

زما ملګرو! ګورئ هاغه وینئ !

هاغه ډیوه هاغه نیم ژواندې ډیوه

زمونږه ټولو دښمني بس له هغې سره ده

ځکه ،

( رڼا خپروي)

ټولو په یوه اواز همدا وویل

هو !

او بیا توپان له نازه وششنېدو

او په مغرور اواز یي وویل چې:

تاسو بیغمه اوسئ!

سیلۍ په تونده ژبه

داسې ټټر وواهه :

زه به یي واړه پتنګان له کوه قاف څخه هم واړومه

بړبوکۍ پورته شوه، ولاړه شوه، کږه وږه شوه ویي ویل:

زه به یي تش کالبد هم پرېنږدم د ځمکې پر مخ

اووم اسمان ته به یي پورته کړمه

او بیا په دې شعار دعایي وکړه

(موږ د رڼا په خلاف یو موټی یو )

**********

زه بیګا غوږ غوږ سترګې سترګې ومه

ما په دا غبرګو ګنهګارو لیدل

چې د بیګا شپې په تیاره کوډل کې څه تیرېدل

هو ما هرڅه ولیدل

چې زموږ غریبې ډیوه ګۍ ته ټول همجنس او ناهمجنس دښمنان

سره یو لاس شول یو لاس

د رڼاګانو ربه !

نور خپله ښه پوهیږې !

هو،

ما هرڅه ولیدل

زه بیګا خوب وړی وم