بغلان: د طالبانو مقاومت مراد علي مراد د جګړې ډګر ته اړ کړ

نن ټکی اسیا (یکشنبه، سلواغې ۱۱مه، ۱۳۹۴ل): د لوی درستیز مرستیال مراد علي مراد د بغلان د جګړې د کابو کولو په نیت د جګړې ډګر ته تللی.

تېره اوونۍ دولتي سرچينو د بغلان په بېلابېلو ساحو کې د طالبانو پر ضد د عملیاتو خبر ورکړ.

په یاده جګړه کې چې لا هم دوام لري دواړه لوري د درندو تلفاتو دعوې کوي.

د بغلان والي عبدالستار بارز وايي چې ۵۵ طالبانو ته يې مرګ ـ ژوبله اړولې خو لا هم نه دي توانيدلي چې د دوی تر لاس لاندې ساحې پخپل واک کې راولي.

طالبانو هم د بغلان په جګړه کې یوازې په پلخمري کې نږدې ۳۰ تنو ته د مرګ ـ ژوبلې اړولو خبر ورکړی دی.

ياده دې په دې جګړه کې کابل ته د غځېدلې برېښنا مزي هم شلیدلي او یوه پايه نړېدلې ده، چې طالبان يې د اردو د عسکرو د درنو وسلو له امله بولي خو دولتي سر چينې يې د طالبانو کار بولي.

طالبانو د برښنا شرکت پر کارکوونکو غږ کړی چې که د دې پايي د بیا ودرولو نیت لري دوی يې د امنیتي خوندیتوب لپاره هڅې نه سپموي.

تر اوسه نه ده معلومه چې مراد علي مراد له کوم پلان سره د جګړې ډګر ته تللی دی، خو تردې وړاندې په شمالي سیمو کې د ولسمشر لومړی مرستیال هم بې وسه کابل ته راستون شو.