کرزی: د سولي په بهیر دې هند، روسیه او ایران هم ورګډ شي

نن ټکی اسیا (يکشنبه، سلواغې ۱۸مه، ۱۳۹۴ ل): پخواني ولسمشر حامد کرزي غوښتنه کړې چې د سولي په بهیر دې هندوستان، روسیه او ایران هم ور ګډ کړل شي.

نوموړي دغه خبرې د ایران خبري اژانس فارس سره کړي، او زیاته کړې يې چې د افغانستان ستونزه که چیري کورنۍ وي، نو بیا باید افغانان په خپلو کې سره کښيني، او د سولي خبري مخامخ په خپلو کې سره وکړي، خو که دغه ستونزه له بهر څخه وي، نو بیا باید بهرني اړخونه دغه ستونزه هواره کړي.

باید وویل شي چې تېره ورځ د څلور اړخیز کانفرانس دریمه غونډه د پاکستان په پلازمينه اسلام اباد کې وشوه، چې په دغه غونډه کې يې د سولې په اړه د غونډو پر تداوم او همدا راز یې له طالبانو سره په مخامخ خبرو باندي هم ټینګار وکړ.

په دغه څلور اړخیزه ناسته کې امریکا، چین، پاکستان او افغانستان ګډون لري، خو پخوانی ولسمشر حامد کرزی غواړي چې روسیه، هندوستان او ایران هم باید په دغو غونډو کې ور شامل شي، ځکه چې په سیمه کې مهم هیوادونه دي.