همدردي: ګل پاچا الفت

ګل پاچا الفت

ژاړي په غمونو کې خواخوږی د هر چا سره
سل پتنګان سوزي د يوې شمې ژړا سره

ډک زړګۍ له اوښکو ګرځي ورېځې په آسمان کې بيا
څه ژړا ملګرې ده د ژوند يوې برېښنا سره

ټول باغ ژړېدلی ځکه اوښکې دي د ګل په مخ
ډېر لکه لاله داغلي زړونه شته صحرا سره

نه ښايي انسان ته چې د بل په غم غمجن نشي
لويه بدبختي ده که څوک نه ژاړي  له چا سره

داسې بې غمي دې خدای په هېڅ کور کې پيدا نکړي
يو کور کې چې وير وي او بل خاندې له ليلا سره