مه خفه کېږه! (۴۹) – انتظار وکړه، چې سختۍ له منځه لاړې شی!

لیکوال: دوکتور عائض بن عبدالله القرني
ژباړن: رحمت الله مومن ﴿مارزک﴾

۞ انتظار وکړه، چې سختۍ له منځه لاړې شی!

امام ترمذی رحمه الله حدیث را نقل کړی، چې: ” غوره عبادت خوښۍ ته انتظار ویستل دی. ”

﴿ أَلَيْسَ الصُّبْحُ بِقَرِيبٍ ﴾
” ایا سهار نېږدې نه دی؟ ”

د مصیبت ځپلو او اندېښمنو سباوون ډېر نېږدې دی، یوازې انتظار ورته وکړه، او له الله تعالی څخه د مرستې تمه ولره.
عربی متل دی:
” رسۍ چې کله ډېره کلکه شی، نو شلېږی. ”
په دې مانا چې کله معامله ډېره خرابه شی، نو ترې د ژر خلاصېدو یقین هم راپیدا شی.
الله سبحانه و تعالی وایې:

﴿ وَمَن يَّتَّقِ اللَّهَ يَجْعَل لَّهُ مَخْرَجاً ﴾
” څوک چې له الله نه په وېرېدو کار وکړی، الله به د هغه لپاره له ستونزو نه د وتلو کومه لاره پیدا کړی. ”

﴿ وَمَن يَّتَّقِ اللَّهَ يُكَفِّرْ عَنْهُ سَيِّئَاتِهِ وَيُعْظِمْ لَهُ أَجْراً ﴾
” څوک چې له الله نه ووېرېږی، الله به د هغه بدۍ له هغه نه ایسته کړی، او هغه ته به لوی اجر ور کړی. ”

﴿ وَمَن يَتَّقِ اللَّهَ يَجْعَل لَّهُ مِنْ أَمْرِهِ يُسْراً ﴾
” څوک چې له الله نه ووېرېږی، د هغه په کار کې هغه اسانتیا پیدا کوی. ”

عربو ویلې دی:

الغَمَراتُ ثمَّ يَنْجلِينَّهْ
ثم يذهبْنَ ولا يجنَّهْ
” د ستونزو تورې ورېځې خورې شی، او بیا داسې له منځه لاړې شی، چې هېڅکله بیا راستنې نشی. ”

همدارنګه یو شاعر ویلې:

كمْ فرجٍ بَعْدَ إياسٍ قد أتى
وكمْ سرورٍ قد أتى بَعْدَ الأسى
من يحسنِ الظنَّ بذي العرشِ جنى
حُلْوَ الجنَى الرائقَ من شَوْكِ السَّفا
” ډېرې اسانۍ تر ناامیدۍ وروسته ترلاسه کېږی، څوک چې د عرش پر څښتن باوری وی، نو هغه د یوې اغزنې ونې څخه هم ګلان راشو کوی. ”

په یوه قدسی حدیث کې راغلی، الله تعالی وایې:
” زه د خپل بنده له ګومان سره یم، څنګه ګومان چې زما په اړه ولری، ما به هماغسې ومومې. ”

الله تعالی وایې:

﴿ حَتَّى إِذَا اسْتَيْأَسَ الرُّسُلُ وَظَنُّواْ أَنَّهُمْ قَدْ كُذِبُواْ جَاءَهُمْ نَصْرُنَا فَنُجِّيَ مَن نَّشَاءُ ﴾
” ان تر دې چې کله پیغمبران له خلکو څخه ناامیده شول، او خلکو هم دا فکر وکړ، چې د عذاب په اړه هغو ته دروغ ویل شوی وو، نو په ناڅاپې ډول پیغمبرانو ته زموږ مرسته ورسېدله. ”

﴿ فَإِنَّ مَعَ الْعُسْرِ يُسْراً{5} إِنَّ مَعَ الْعُسْرِ يُسْراً ﴾
” حقیقت دا دی، چې له سختۍ سره اسانی هم ده، بېشکه له سختۍ سره اسانی هم ده. ”

ځینې مفسرینو ویلی دی:
(( لنْ يغلبَ عُسْرٌ يُسْرَيْن ))
” یوه سختۍ پر دوو اسانتیاوو نشی برلاسې کېدای. ”

ځینې خلک بیا پورتنۍ وینا د حدیث په توګه بیانوی.
همدارنګه الله تعالی په بل ځای کې وایې:

﴿ لَعَلَّ اللَّهَ يُحْدِثُ بَعْدَ ذَلِكَ أَمْراً ﴾
” کېدای شی له هغه وروسته الله ( د توافق ) څه لاره پیدا کړی. ”

﴿أَلا إِنَّ نَصْرَ اللّهِ قَرِيبٌ﴾
” خبر اوسئ! د الله مرسته نېږدې ده. ”

﴿ إِنَّ رَحْمَتَ اللّهِ قَرِيبٌ مِّنَ الْمُحْسِنِينَ﴾
” په یقینی توګه د الله رحمت نېکانو ته نېږدې دی. ”

په حدیث کې راغلی چې:
” د الله مرسته په صبر ترلاسه کېږی، او هر مصیبت د خلاصون لاره لری. ”

شاعر ویلې:

إذا تضايقَ أمرٌ فانتظرْ فَرَحاً
فأقربُ الأمرِ أدناهُ إلى الفَرجِ
” که په کومه معامله کې له سختۍ سره مخ شې، نو د ستونزې حل ته سترګې په لار شه، او د حل کېدو تمه یې ولره، چې همدا یې د حل تر ټولو غوره لاره ده. ”

یو بل ویلې:

سهرتْ أعينٌ ونامتْ عيونُ
في شؤونٍ تكونُ أو لا تكونُ
فدعِ الهمَّ ما استطعتَ فحِمْـ
ـلانُك الهمومَ جُنونُ
إن ربّاً كفاكَ ما كانَ بالأمـ
ـسِ سيكفيكَ في غدٍ ما يكونُ
” ډېرې سترګې ویښې او ډېرې ویدې شوې، ډېرې داسې معاملې شته، چې د کېدو او نه کېدو امکانات لری، له دې امله خپله وسه وکړه، چې له خفګانه ځان وساتې غم او خفګان پالل یو ډول لېونتوب دی، ځکه څه چې تېر شو، هغه کې هم ستا رب درسره ملګری وو، او په راتلونکی کې به هم درسره ملګری وی. ”

همدارنګه یو بل شاعر وایې:

دعِ المقاديرَ تجري في أعنَّتِها
ولا تنامنَّ إلا خالي البالِ
ما بينَ غمضةِ عيْنٍ وانتباهتِها
يغيّرُ اللهُ مِن حالٍ إلى حالِ
” څه چې په تقدیر کې لیکلې شوی، هغه به هرومرو ترسره کېږی، له دې امله ته خالی ذهن ویده شه، الله تعالی د سترګو په رپ کې حالات بدلوی. “

د نن ټکی اسیا یوټیوب چېنل
avatar
  ګډون وکړئ  
خبرتیا غوښتل د