ترکیه کې دوه پولیس وژل سوي او ۳۵ تنه نور ټپيان دي

نن ټکی اسیا (جمعه، کب ۱۴مه، ۱۳۹۴ ل): د ترکیې په سویل ختیځ ماردین ولایت کې د چاودنو او بریدونو له امله دوه تنه پولیس وژل سوي او د پولیسو په ګډون ۳۵ تنه نور ټپیان سوي دي.

نن سهار لومړۍ چاودني د ماردین ولایت په نصیبین ښار کې د پولیسو د اوسیدلو ځایونه په نښه کړل، په چاودنه کې ځیني پولیس ټپیان سوي چې د څلورو تنو روغتیایې وضعیت نازک ښودل سوی دی.

نصیبین ښار د سوريې سره پر پوله پروت دی او زیاتره اوسیدونکي یې کردان دي.

د ترکیې خبري اژانس «اناضول» د ځایې خلکو په حواله ویلي چې د چاودني له امله د پولیسو د اوسیدلو ځایونه تر ډیره حده ویجاړ سوي او برید د کردانو د کارګر ګوند «پی کی کی» له لوري سوی دی.

تر لومړۍ چاودني وروسته په سیمه کې د پولیسو یو بل مرکز په توغندیو ویشتل سوی، د توغندیز برید په پایله کې دوه پولیس افسران وژل سوي او د ولسي وګړو په ګډون ځیني نور پولیس ژوبل سوي دي.

په دې وروستیو کې د ترکیې پوځ د «پی کی کی» ځیني اهداف په هوایې بمباریو کې په نښه کړي او ادعا کوي چې ددوی ډیر مرکزونه یې ویجاړ کړي او خپله ولکه یې پري ټینګه کړي ده.

د نن ټکی اسیا موبایل اپلیکیشن
avatar
  ګډون وکړئ  
خبرتیا غوښتل د