افغانستان

پاکستان له کرمې ايجنسۍ د ناقانونه کډوالو د ويستلو پرېکړه کړې

نن ټکی اسیا (شنبه، کب ۲۹مه، ۱۳۹۴ل):د پاکستان قبايلي سيمې کرمې ايجنسۍ پوليټيکل ايجنټ امر کړی، چې دغه ايجنسۍ کې ناقانونه اوسېدونکي افغان کډوال دې ژر تر ژره له دې سيمې ووځي.

تېره ورځ ناوخته د کرمې ايجنسۍ پوليټيکل ايجنټ د افغان کډوالو مشران ورغوښتي وو او هغوی يې د حکومت له پرېکړې خبر کړل.

په دغه ناسته کې د افغانم ملکانو او سپين ږيرو ترڅنګ د کرمې ايجنسۍ امنيتي او نور سيمه‌ييز افسران هم شريک وو.

د چارواکو په وينا د کرمې ايجنسۍ خپيانګه، خلوټ، لړمه او نورو سيمو کې، چې د افغانانو کمپونو کې ناقانونه کډوال اوسيږي، بايد ژر تر ژره له دې سيمې خپل هېواد ته ستانه شي او که هر چا سرغړونه وکړه، په زوره به وېستل کيږي.

د خيبر پښتونخوا او قبايلي سيمو په ګډون د پاکستان په ګڼو سيمو کې د ناقانونه افغان کډوالو پر خلاف د پاکستاني چارواکو هڅې له پخوا روانې دي او دا کړنې د پېښور پر پوځي ښوونځي له بريد وروسته نورې هم توندې شوې.

د خيبر پښتونخوا اعلا وزير پروېز خټک هم څو څو ځل ويلي، چې افغان کډوال بايد خپل هېواد ته ستانه شي او د دوی شتون يې د خيبرپښتونخوا د نا امنۍ لامل بللی دی.

د تېر کال تر پايه پاکستان کې د افغان کډوالو د اوسېدو قانوني موده پای ته ورسېده او پاکستان د شپږو مياشتو لپاره دغه موده نوره هم وغځوله.

کډوالو لپاره د ملګرو ملتونو ځانګړې ادارې يو ان اېچ سي ار له پاکستانه غوښتي، چې د دوو کلونو لپاره د افغان کډوالو د اوسېدو موده وغځوي، مګر پاکستان تر اوسه په دې اړه په څرګندو ټکو څه نه دي ويلي.

پاکستاني سرچينې وايي، چې د افغان کډوالو په اړه پاکستان غواړي، دغه هېواد کې د افغانانو د اوسېدو موده وغځوي او دا پرېکړه به د پارلمان له تاييد وروسته کوي.

پېښور کې د پوځ پر ښوونځي له بريد وروسته پاکستاني امنيتي ځواکونو زرګونو افغانان له نيولو او ځورولو وروسته افغانستان ته لېږلي دي.

د خيبرپښتونخوا، کشمير، قبايلي سيمو او بلوچستان پاکستاني چارواکو د ناقانونه کډوالو تر څنګ زرګونو قانوني افغان کډوال هم بنديان کړي او په زوره يې له پاکستان وېستو ته اړ کړي دي.

له کرمې ايجنسۍ د ناقانونه افغان کډوالو د وېستلو پرېکړه په داسې حال کې شوې، چې دوه اوونۍ وړاندې پاکستان کې د ولسمشر ځانګړي استازي او افغان سفير حضرت عمر زاخېلوال د خيبرپښتونخوا له اعلا وزير او نورو لوړپوړو چارواکو سره له رسمي ناستې وړوسته ډاډ څرګند کړ، چې له دې وروسته به افغان کډوال د پوليسو له لوري نه ځورول کيږي او ناقانونه کډوال به هم د قونسلګرۍ له مشورې او تاييد وروسته خوشې کيږي.

 

 

 

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x