له خورشید تلویزیون سره د حزب اسلامي د مرکچي پلاوي مشر د مرکې پښتو ژباړه

عابد علمي

ژورنالست: انجنیر صاحب محمد امین کریم، د حزب اسلامي افغانستان د سولې په تړاو د مرکچي پلاوي مشر، ډېره مننه کوو چې مونږ ته مو موکه راکړه تر څو درسره مرکه وکړو؟

محمد امین کریم: له تاسو څخه هم مننه کوم چې مونږ ته مو وخت راکړ تر څو له خپلو هېوادوالو سره د زړه خواله وکړو.

ژورنالست: ښاغلی کریم کابو لس ځلې د حزب اسلامي پلاوی د افغانستان له دولت سره د سولې او خبرو اترو له پاره کابل ته راغی، خو په هر ځل له ماتې سره مخ شو، ولې؟

محمد امین کریم: بسم الله الرحمان الرحیم، و به نستعین

له تاسو نه بیا هم مننه کوم چې مونږ ته مو دا موکه برابره کړه، تر څو د هېواد په مهمو قضایاوو او دریځونو خبرې وکړو. لمړی خپلو شریفو هېوادولو ته د زړه له کومي سلامونه او نېکې هیلې وړاندې کوم. ډېره مهمه پوښتنه مو وکړه، حقیقت دا دی چې حزب اسلامي افغانستان تل ددې په هڅه کې و او دی ترڅو مونږ وکولی شو د هېواد قضیه د خبرو اترو او سولییزې لارې حل کړو. په همدې منظور یې د شپږ اوو کلونو راهیسې لدې کبله چې شرایط یې د تل پاتې سولې له پاره تر یوه بریده مساعد لیدلي؛ خپل هیئتونه په خپل نوښت په ازادانه ډول دولت ته رالېږلي دي چې په ۲۰۱۰ م کال کې یې زه هم د لمړني پلاوي غړی وم. خو له بده مرغه د وخت حکومت او چارواکو د خپل ځان له پاره د تلپاتې سولې رامنځته کېدلو شرایط مساعد نه لیدل. له بده مرغه شپږ کاله نور هم په جګړو او وینه تویولو واوښتل، خو دا ځل کم تر کمه مونږ هیله من یو چې دولت به د حزب اسلامي د سولې وړاندیز ته د هېواد د لوړو ګټو د خونديتوب په موخه مثبت ځواب ووایي. دولت دا ځل په خپله حزب اسلامي ته د سولې د خبرو پیلولو وړاندیز کړی.

ژورنالست: له حزب اسلامي سره د سولې په پروسه کې مو د حامد کرزي او ښاغلي اشرف غني ترمنځ په سیاستونو کې څه توپیر ولید؟

محمد امین کریم: له ښاغلي اشرف غني سره مو چې له مخکې هم ناستې شوې دي، په هېواد کې مو د سولې راوستو له پاره او د ملي حاکمیت د ټینګښت له پاره د حزب اسلامي راتګ ته تر یوه بریده لېواله ومونده. دا په دې معنا نه ده چې ښاغلی کرزی په دې چاره کې بیخي پاتې وبولو، بلکه د هغه سره چاپېر ځینو کورنیو او بهرنیو کړیو ددې مخه نیوله چې د سولې له پاره ګړندي او رښتیني ګامونه واخیستل شي.

ژورنالست: دقیقأ هغه حلقې چې د ښاغلي کرزي په شاوخوا کې وې، د حزب اسلامي غړي وو، لکه د هغه د دفتر رئیس، یو شمېر وزیران، او والیان؟!

محمد امین کریم: تاسو د یوه سیاسي خبریال په صفت حتمأ د حزب اسلامي مرامنامه مطالعه کړې ده، څرنګه چې حزب اسلامي د هېواد له پخوانیو ګوندونو څخه دی؛ د دغه حزب هغه غړي یا یې هغه محدوده کتله چې په انفرادي ډول په نظام کې جذب شوي دي؛ هغه افراد دي چې د خپلو ذاتي وړتیاوو او شخصي اندونو له مخې د نظام برخه ګرځېدلي دي. مونږ یې هغه کسان چې د افغانانو د ملي حاکمیت او قانونمند نظام د رامنځته کولو له پاره مبارزه کوي؛ چې ځینې د خپل فکر، قلم، او یا په نظام کې د خلکو له پاره په رښتیني خدمت کولو، او یا دا چې د ظلم، استبداد او اشغال په وړاندې یې د مبارزې له پاره اقدام کړی، د حزب اسلامي سره یې متعهد او وفادار بولو. خو ځینې هغه دي چې په هېواد کې رامنځ ته شوي ظلم او استبداد په وړاندې یې د خپل لوړ همت لرلو له مخې د نظامي مبارزې لاره خپله کړې.

مونږ هر څوک چې په هره معنا خپلو لوړو موخو ته لکه قانونمند اسلامي نظام، ازادۍ او ټولنیز عدالت ته ژمن وي او مبارزه کوي حتی که په رسمي یا غیر رسمي ډول د حزب غړیتوب وهم نلري د اسلامي نهضت غړي بولو، او هر هغه څوک چې د اشغال او ظلم د غښتلتیا له پاره کار کوي؛ که په هره جامه کې وي؛ د اسلامي نهضت، سولې او ثبات دښمن یې بولو.

ژورنالست: ښاغلی کریم، تاسو وویل، هغه چا چې لوړ همت لاره، نظامي لاره یې خپله کړې، له دې څخه ستاسو منظور څه دی؟

محمد امین کریم: منظور مې هغه څوک دي چې په هېواد او هېوادوالو باندې د ظلم او تېري په وړاندې یې په خپل ځان کې دا وړتیا لرله او لوړو همتونو یې مؤثرې مبارزې ته هڅول؛ او په پایله کې یې نظامي مقابلې ته مخه کړې.

ژورنالست: دقیقأ کوم وخت؟

محمد امین کریم: له هغه وخته چې د اسلامي شریعت، نړیوالو قوانینو، او افغاني کلتور له مخې زمونږ هېواد اشغال شوی.

ژورنالست: ستاسو منظور پخوانی شوروي اتحاد دی؟

محمد امین کریم: پخوانی شوروي اتحاد د ۱۹ مې مېلادي پېړۍ په ۹۰ او ۸۰ یمو لسیزو کې او د امریکا متحده ایالات د یویشتمې پېړۍ په لمړۍ لسیزه کې.

ژورنالست: ښاغلی کریم، د ډېرو په اند حزب اسلامي د منازعې غوښتنې په ډول په وده کې و؟

محمد امین کریم: طبیعي ده چې د افغانستان د اسلامي نهضت سیالان او دښمنان به دا ډول تورونه په دغه سپېڅلي بهیر پسې تړي، خو واقعیتونو او د ټولنې د عیني تجروبو له مخې دا د درواغو له ادعا پرته بل څه نه دي.

ژورنالست: خو فکر نه کوئ چې دا د خلکو خبرې دي؟

محمد امین کریم: نه، د خلکو خبره سوله ده، د خلکو خبره ازادي ده او د خلکو خبره د هېواد ازادي ده، او په دقیق ډول دا هغه آرمانونه او ارزښتونه دي چې حزب اسلامي ورته په بشپړ ډول ژمن دی، او زه فکر نه کوم چې د ازادي، استقلال او ملي حاکمیت غوښتنه دې منازعه طلبي وي.

ژورنالست: ښاغلی کریم، د داوود خان له حکومته نیولې تر نني پورې چې تاسو ورسره د سولې په مزاکراتو بوخت یاست؛ لس حکومتونه وو، ولسمشران یې لرل، او لس بېل بېل نظامونه یې وو؛ خو حزب اسلامي له هر یوه سره په لانجو اخته دی، ولې؟

محمد امین کریم: ستاسو د پوښتنې ځواب د حزب اسلامي افغاستان په مرامنامه کې نغښتی. هغه توپیر او تمایز چې د حزب اسلامي افغانستان او د هېواد د نورو سیاسي ډلو ترمنځ دی، دا دی چې حزب اسلامي یو هدف محور تحریک دی. زمونږ هدف، په وار وار تکراروم چې د یو قانونمند اسلامي نظام رامنځته کول دي. تاسو ددغه لسو سردمدارانو چې نومونه مو واخیستل؛ د یوه یې راته ووایئ چې په هېواد کې یې د یوه مشروع او قانوني اسلامي نظام بنسټ اېښی وي؟!

ژورنالست: خو له همدغو هر یوه پلویان له ځان سره لرل؟

محمد امین کریم: طبعتأ، هر نظام یو شمېر پلویان لري، حتی مستبدینو او اشغالګرو هم خپل پلویان لرل، چې محدود وو او متحرک هم وو. زمونږ غوښتنه د یو قانونمند نظام رامنځته کول دي چې په بشپړ ډول د اسلام د سپېڅلي دین په رڼا کې حاکمیت ولري. که څوک ادعا لري چې داسې یو نظام په افغانستان کې و او شته، مهرباني د وکړي داسې نظام او چارواکي دې راته وښیي.

ژورنالست: خو څه شی ددې باعث شوي چې د لسو ولسمشرانو لس برنامې د خلکو په باور د حزب نه دي خوښې شوې؟! ټول ورسره جوړ راشي، بس یوازې حزب اسلامي په مخالف لوري کې ودرېږي؟

محمد امین کریم: وګورئ، لمړی خو د خلق دیموکراتیک نظام چې په هېواد کې د کمونست رژیم په نامه شهرت لري؛ په ټولنیزه اجماع سره د حزب اسلامي په ګډون ټول افغان ولس یې مخالف و، چې لله الحمد حزب اسلامي په دې چاره کې یوازې نه و، له هغه نه وړاندې هم چې یو کودتایي رژیم و او مطلق استبداد حاکم و؛ طبعأ چې ددغه ولس هدفمند او سرلاري ځواکونه یې مقابلې ته راووتل.

ژورنالست: ښاغلی اشرف غني تاسو ته په کوم امتیاز قایل شوی دی؟ او څه ځانګړنه لري؟

محمد امین کریم: ښاغلی اشرف غني په هېڅ امتیاز چاته قایل شوی نه دی، او حزب اسلامي هم د امتیاز غوښتونکی نه دی، مونږ په هېواد کې د یوه قانونمند، ملي او عادلانه حکومت غوښتنه لرو.

ژورنالست: دقیقأ، د حکومت نوم یې وحدت ملي دی؟

محمد امین کریم: په نوم هو! په نوم په رښتیا هم د ملي وحدت حکومت دی.

ژورنالست: په ذات کې څه دی؟

محمد امین کریم: په ذات کې د ددو ټاکنیزو ډلو ترمنځ یو ائتلاف دی، چې تاسو یې هم د خندوونکو بنسټ شاهد یاست. که مو یاد وي دقیقأ دوه کاله وړاندې شخصأ ستا سره زما مرکه وه، کولی شې په خپل ارشیف کې یې پیدا کړې، تاسو ته مې وویل چې ټاکنې په بشپړ ډول غیر شفافې، غیر عادلانه او د امریکا د متحده ایالاتو لاسونه تر څنګلو پکې د مداخلې په نیت ننوتي وو، خو هغه کسان چې په ګردي مېز کې راسره وو، زما خبره یې نه منله، خو نن سبا هغه څوک چې په هېڅ ډول یې زمونږ خبرې نه منلې، له مجبوریته اعتراف کوي چې اوسنی حکومت د جان کیري په خوښه رامنځته شو. زه مطمئن یم چې تاسو هم په دې پوهېږئ چې ددې نظام لوړ پوړي چارواکي لاهم د ولسمشر منتخب والی او قانوني والی نه مني.

ژورنالست: هو، آیا ستاسو له نظره دقیقأ نظام نامشروع دی؟!

محمد امین کریم: هو، په نظام کې داخل خلک یې هم په نامشروعیت شاهدي وایي، نو آیا ځواب مو واضح نه دی!؟ حزب اسلامي د هېواد اوسنی حاکم نظام په ټولنه کې د یو عیني واقعیت په څېر مني، او حاضر دی چې د هېواد د لوړو ګټو ساتلو، او د یو پراخ ملي یوالي د رامنځته کېدو په موخه د اتحاد او اتفاق لاس ور اوږد کړي څو افغان ولس وکولی شي د راروانو خطرناکو ګواښونو او د بهرنیانو د پېچیده او سیمییزو لاسوهنو مخه ونیسي، او افغان مظلوم ولس چې ترټولو لویه قرباني ورکوونکی ولس دی له دغې لویې ظالمانه لوبې چې د امریکا متحده ایالاتو، روسیې، ایران، ترکیې، سعودي عربستان، او پاکستان په لاره اچولې په یوالي، همپذیرۍ او ټولنیز ګډون سره راووځي.

ژورنالست: ښاغلی کریم، د ۱۳۹۳ هـ ش کال په ټاکنو کې چې کله تاسو د ولسمشرۍ د ټاکنو یوه نوماند انجنیر قطب الدین هلال ویاند وئ، زمونږ سره مو د ګردي مېز په بحث کې ګډون هم وکړ؛ اوس ښاغلی هلال د ولسمشر سلاکار دی، او تاسو له یوه بل جریان نه راځئ او استازیتوب یې کوئ، دا په څه معنا دي؟

محمد امین کریم: ستاسو د پوښتنې د اصلاح له پاره باید عرض کړم چې په همغه ورځ مې هم چې په بحث کې درسره ګډون وکړ وویل چې زه د حزب اسلامي لخوا د یوه خپلواک کاندید په پلوۍ ګډون کوم، نه د هغه د ویاند په صفت. حزب اسلامي افغانستان په هغه وخت کې د یوه خپلواک کاندید چې ښاغلی هلال و ملاتړ کاوه.

ژورنالست: آیا حزب اسلامي اوس هم د ښاغلي هلال ملاتړ کوي؟

محمد امین کریم: د ښاغلي هلال د نوماندۍ ملاتړ یې کاوه.

ژورنالست: اوس ښاغلی هلال د ولسمشر سلاکار دی؟

محمد امین کریم: ښاغلی قطب الدین هلال یو فرد دی. یو مدبر، عالم او مجاهد شخصیت دی، یو ګوند له یوه فرد دفاع نه کوي. مونږه هلته هم په صراحت سره په ډاګه کړې ده چې له ښاغلي هلال څخه د حزب اسلامي ملاتړ په دوو اصولو ولاړ دی. یو دا چې د ټاکنو اصل بنسټیز کړو او ووایو چې له دې سره سره چې حزب اسلامي د نظام مخالف دی باید په هېواد کې د ټاکنو په بنسټیزوالي کې برخه واخلي، ترڅنګ یې په دغه مهم اصل کې د امریکا د متحده ایالاتو لاسوهنې خلکو ته په ګوته کړي، مونږ همدا دنده په غاړه لرله او ترسره مو کړه.

ژورنالست: ښاغلی کریم، نن په یوه انټرنیټي ویبپاڼه کې لیکلي وو چې د هرات والي آصف رحیمي، د فراه والي آصف ننګ، د لوګر، خوست، بادغېس والیان، د زراعت وزیر، د اوبو او برېښنا وزیر، د کلیو د پراختیا او بیارغونې وزیر، د عدلیې وزیر، د اجرائیه ریاست لمړی مرستیال، د ولسمشر سلاکار ښاغلی جمعه خان همدرد، د ولسمشر سلاکار ښاغلی همایون جریر، د ولسمشر سلاکار ښاغلی عبدالهادي واحدي، چې ټول حزبیان دي، نو تاسو د څه له پاره مذاکره کوئ؟

محمد امین کریم: ښاغلی همدرد هېڅ دولتي دنده نلري. مونږ د افغان ولس د حقه حقوقو د ترلاسه کولو له پاره مذاکره کوو.

ژورنالست: مګر دوی د حزب اسلامي غړي نه دي؟

محمد امین کریم: دوی هغه اشخاص دي؛ چې په اغلب ګمان سره چې یقین ته نیږدې دی ان شاالله د خپل موقعیت او مقام نه ددې بهیر له پاره مبارزه کوي.

ژورنالست: تاسو په داسې حال کې چې امریکایان اشغالګر بولئ خو دغو افرادو ته مو امریکایان تنخواوې ورکوي؟

محمد امین کریم: تاسو ته مې وړاندې عرض وکړ چې دغه افراد د حزب د پالیسۍ له مخې په دغه نظام کې کار نه کوي، بلکه د هغو شخصي وړتیاوو په آساس چې دوی یې له ځانه سره لري په نظام کې جذب شوي دي، چې د همدې مقام له لارې هم د افغانستان د خلکو د ګټو د تأمین له پاره کار کوي. د حزب اسلامي او د افغانستان د خلکو ګټې په یوه کرښه کې قرار لري.

ژورنالست: خو فکر نه کوئ چې د حزب اسلامي ګټې یو څه دي او د هېواد د خلکو ګټې بل څه؟

محمد امین کریم: نه، ابدأ داسې نه ده. د تاسو به پام شوی وي چې مونږ څو ورځې وړاندې په ډاګه وویل چې مونږ د افغانستان د خلکو د ملي حاکمیت اعاده غواړو. آیا د افغانستان خلک د ملي حاکمیت د ټینګښت سره مخالفت لري؟

ژورنالست: نه!

محمد امین کریم: مونږ ادعا وکړه چې حزب اسلامي افغانستان په هېواد کې د یوه قانونمند اسلامي نظام د ټینګښت له پاره مبارزه کوي، آیا د افغانستان خلک د یوه قانونمند اسلامي نظام د ټینګښت سره مخالفت لري؟!

ژورنالست: آيا فکر نه کوئ چې ملي حاکمیت د حزب اسلامي له لیدلوري یو شی دی، او د عامو خلکو په باور بل څه دی؟

محمد امین کریم: دا ستاسو خپل تعبیر دی.

ژورنالست: لکه چې لویه جرګه دایره شوه، او د خلکو استازو پکې له امریکا سره امنیتي او دفاعي تړون ته رایه ورکړه، دا بحث ولسي جرګې او مشرانو جرګې ته ولاړ هلته هم د خلکو استازو پرې مثبته رایه ورکړه او ولسمشر توشیح هم کړ، خو حزب اسلامي یې مخالفت وکړ؟!

محمد امین کریم: هغه لویه جرګه یې چې جوړه کړې وه په خپله د هغه اساسي قانون د موازینو سره مخالفه وه چې په دغه هېواد کې جوړ شوی دی. بنأ هر څوک په دغه هېواد کې کولی شي چې حتی له یو ملیون کمو ډالرو په زرګونو زره خلک راغونډ کړي او د لویې جرګې نوم پرې کېږدي. د افغانستان اساسي قانون د لویې جرګې ځانګړی تعریف لري، او څه چې په هغه لویه جرګه کې واقع شول په ښکاره ډول د اساسي قانون خلاف ول. په هغه وخت کې دا مطلب هغو خلکو هم چې نن سبا په دولت کې لوړ پوړي چارواکي دي په صراحت سره واضح کړی دی.

ژورنالست: ښاغلی کریم، حزب اسلامي د افغانستان د حکومت د یو سیاسي مخالف په صفت غواړي له حکومت سره مزاکره وکړي، که نه د افغان حکومت او بهرنیو ځواکونو سره د یو نظامي مخالف جهت په صفت؟

محمد امین کریم: حزب اسلامي افغانستان د خپلې نظامي مبارزې له پيل نه په ښکاره ډول او په وار وار په ډاګه کړې چې د هېواد د امنیتي او انتظامي ځواکونو سره د جګړې ستراتیژي نلري، مګر په هغه صورت کې چې د حزب اسلامي نظامي ځواکونه د یادو ځواکونو تر مستقیم هدف لاندې ونیول شي، چې حزب دا په تېره پنځلس کلنه نظامي مبارزه کې په اثبات هم رسولې ده. نو مطلب ډېر واضح دی چې مونږ د دغه نظام سره په جګړه کې نه یو، البته مونږ د نظام له کړنو سره ژور سیاسي اختلافات لرو، د دغه فساد او مافیا سره چې هر څه یې تر خپلې ولکې لاندې راوستي؛ مونږ سخت مخالف یو، خو دا مخالفتونه کېدای شي او باید چې د سیاسي مبارزې له لارې، له منځه ولاړ شي. زمونږ نظامي مخالفت د اشغال د پای ته رسولو له پاره دی چې هغه بیا یو جلا بحث دی.

ژورنالست: آیا حزب اسلامي نظامي غبرګون لري؟

محمد امین کریم: حزب اسلامي چې څه لرل او لري یې ټول یې د نظامي اشغال سره د مبارزې له پاره په کار اچولي.

ژورنالست: دقیقأ د څو سرتېرو حملو مسؤلیت حزب اسلامي په غاړه واخیست، په ۱۳۸۹ هـ ش کې د وزیر اکبر خان په یوه پلورنځي کې، په ۱۳۹۲ هـ ش کې په شاه شهید کې، او په ۱۳۹۳ هـ ش کې د کابل هوایي میدان په سرک باندې؟

محمد امین کریم: مونږ د هر هغه برید چې د بې ګنا خلکو د وژلو سبب شي، د خپل اعتقادي باور مخالف بولو او محکوموو یې. خو دا محکومیت یو اړخیز نه پرېږدو. که بې ګناه انسانان د سیاسي موخو له پاره وژل کېږي او د زورواکو لخوا د عام وژنې هدف ګرځي دا عمل هم محکوموو او ترورستي عمل یې بولو چې اصلأ د ترورېزم تعریف همدا دی، نو که بې ګناه انسانان د توپ، ټانک، الوتکو، بمونو او یونیفورم لرونکو ځواکونو لخوا هم وژل کېږي له ترورېزم نه یې هېڅ کم نه بولو، چې په همدې بنسټ زمونږه مظلوم ولس د ترورېزم سخت قرباني دی، په لسګونو زره، حتی سلګونو زره بې ګناه هېوادوال مو د دغه ډول ترورېزم قرباني شوي دي.

ژورنالست: ځینې حزبیان چې حزبي سابقه لري او حزب اسلامي ته متعهد هم دي د شوراګانو تحریک یې جوړ کړی دی، یو شمېر نور د حکومت چارواکي دي او تاسو چې د مذاکراتو بهیر په مخ وړئ. خلک کومه ډله د حزب اسلامي اصلي استازي وبولي؟! هغه چې په اپوزیسیون کې دي، هغوی چې په دولت کې دي او که تاسو چې غواړئ د سولې مذاکرات وکړي؟

محمد امین کریم: له دوو لورو درته عرض کوم:

لمړی عملي: حزب اسلامي افغانستان یو برحاله امیر لري، مجاهد ورور انجنیر صاحب حکمتیار یې امیر دی چې په کور دننه او بهر کې ټول پرې خبر دي، په افغانستان کې هېچا هم د مجاهد ورور حکمتیار صاحب له امارت نه انکار نه دی کړی، حتی هغه هم چې تاسو یې نومونه واخیستل، لکه شورا ګانې او نور، په دې اړه د نظر اجماع ده، ځکه نشي کېدی چې بل څه وي.
بل د تیوري له مخې: هغه څوک تاسو کولی شئ حزب اسلامي ته متعهد وبولئ او یا کم تر کمه په حزب اسلامي پورې تړلي وبولئ چې د حزب اسلامي مرامنامې او اهدافو ته ژمن وي. دلته غواړم یوه خبره ذکر کړم چې هېڅوک نشي کولی له حزب څخه څوک وباسي یا یې بیرون وبولي؛ مګر دا چې د دغه حزب مرکزي شورا یې په اړه پرېکړه وکړي. نو هغوی د انتخاب حق لري چې ځان د حزب اسلامي غړي وبولي، په ژمنه یې پابند پاتې شي او دلته خپلو فعالیتونو ته دوام ورکړي.

ژورنالست: په اپوزسیون که په حکومت کې؟

محمد امین کریم: په هر ځای او مقام کې چې وي، ما د هغو اشخاصو په اړه چې په نظام کې دي، درته پوره توضیحات درکړل. کله چې دوی له سیاسي لارې د حزب مرامنامې او اهدافو ته د رسېدو له پاره مبارزه وکړي؛ هېڅ باک نلري او دا طبیعي او د تائید وړ دي.

ژورنالست: د کومو اشخاصو چې ما یې نومونه ذکر کړل، آیا دا د حکومت له اړخه د حزب اسلامي له پاره یو ځانګړی امتیاز نه دی؟

محمد امین کریم: نه، هېڅکله نه! اول خو ځینې کسان یې د ائتلاف له مخې د حکومت په چوکاټ کې راغلل، ځینې یې له ډاکتر عبدالله عبدالله سره او ځینې یې له ډاکتر اشرف غني سره، چې دا چاره له حزب اسلامي افغانستان سره هېڅ ډول تړاو نه لري.

ژورنالست: آیا ښاغلی حکمتیار د خپلو افرادو له پاره قدرت غواړي؟

محمد امین کریم: نه، هېڅکله نه! ما مخکې هم درته عرض وکړ چې د حزب اسلامي افغانستان توپیر او تمایز له نورو سیاسي ډلو او احزابو سره په دې کې دی چې حزب اسلامي هدف محور دی. مونږ د خپلو سپېڅلو اسلامي او ملي موخو له پاره مبارزه کوو، نه د قدرت لپاره. که د حزب اسلامي افغانستان هدف قدرت ترلاسه کول وای د امریکا متحده ایالاتو تر ټولو ډېر او لمړی حزب اسلامي ته مراجعه کړې ده.

ژورنالست: په څه معنا؟

محمد امین کریم: په دقیق ډول د ۲۰۰۱ م کال د سپتمبر په ۱۳ مه نېټه یعنې په امریکا کې د سپتمبر د یوولسمې له پېښې دوه ورځې وروسته لمړۍ مرجع چې امریکا یې دروازه وټکوله حزب اسلامي افغانستان و، او هغوی پر دې باورمن وو چې یوازې حزب اسلامي کولی شي له روانې وضعې سره مقابله وکړي او قدرت په لاس کې واخلي.

ژورنالست: په دغه وخت کې خو حزب اسلامي په مقاومت کې نه و؟

محمد امین کریم: له چا سره په مقاومت کې؟

ژورنالست: د طالبانو په وړاندې په روان مقاومت کې حزب برخمن نه و!؟

محمد امین کریم: په دغه وخت کې چې په افغانستان کې کومه جګړه روانه وه د حزب اسلامي په باور هغه د ګاونډیانو جګړییزه سیالي او نیابتي جګړه وه، چې دوام یې په بشپړ ډول د حزب اسلامي له لوري مردود و.

ژورنالست: نو کوم نظام هغه وخت حاکم و؟ د طالبانو نظام؟

محمد امین کریم: د جګړې، وېرې او تاوتریخوالي نظام.

ژورنالست: اما د حزب اسلامي په باور؟

محمد امین کریم: تړلی او وابسته.

ژورنالست: د حزب اسلامي له لیدلوري باید هغه وخت کوم ډول نظام حاکم وای؟

محمد امین کریم: په هغه وخت کې، په اوسني وخت کې او هم په راتلونکي کې باید داسې نظام حاکم شي چې د خلکو له رایو راټوکېدلی وي، له دې نه چې وایو د خلکو په خوښه نظام رامنځته شي زمونږ مطلب دا دی چې د افغانانو په خوښه د رڼو او عادلانه ټاکنو په بنسټ او د بهرنیو لاسوهنو او فشارونو پرته د خلکو د آرمانونو او غوښتنو په بنسټ یو نظام رامنځته شي.

ژورنالست: د ملي امنیت پخواني رئیس ښاغلي امرالله صالح ویلي چې له حزب اسلامي سره مزاکره په معنا د سوځېدلو مهرو سره مزاکره ده؟

محمد امین کریم: که چیرې همداسې وي نو بیا ښاغلی امرالله صالح په دې خبره ولې تم کېږي، هرکله چې له حزب اسلامي سره د مزاکراتو خبره کېږي، ښاغلی صالح په ډېره چټکۍ سره خپل غبرګون ښیي؟! د څه شي نه په وېره کې دی؟! د سولې د منځ ته راتللو سره په افغانستان کې په یوې ځانګړې ډلې پورې تړلو عناصرو او افرادو دښمني، دې سولې څخه د هغوی د وېرې او په وحشت کې لوېدلو نښه ده.

ژورنالست: په ځواب کې یې تاسو څه وایئ؟

محمد امین کریم: د قدرت د انحصارولو له هڅو نه د بالاخره لاس واخلي، پرې د ږدي چې افغان ولس نور په سوله او آرامۍ کې ژوند وکړي، پرې د ږدي چې د یو بین الافغاني تفاهم له مخې، په ګډون د هغې ډلې چې دی یې استازیتوب کوي، یا یې د یوې څانګې استازیتوب کوي، د یوه بین الافغاني تفاهم په ترڅ کې، نه د ائتلاف له مخې؛ د ټولو افغانانو له پاره د هېواد لوړې ملي ګټې تعریف کړو او د خوندیتوب او دفاع له پاره یې په یوه مثبته، سالمه او سیاسي سیالۍ کې روان شو.

ژورنالست: ایا تاسو د افغانستان حکومت یا هېواد د امریکایانو لخوا اشغال شوی بولئ؟

محمد امین کریم: له دریو سوو زرو زیاتو رسمي او غیررسمي بهرنیو او اجنبي ځواکونو موجودیت په پرتله د شاوخوا لسو زرو دا ډول ځواکونو حضور، نه یوازې د شمېر له مخې لوی توپیر دی بلکې یو مشهود کیفي توپیر هم لري. مونږ نه تنها باورمن یو چې د بهرنیانو وروستی پوځي هم باید زمونږ له پاکې خاورې ووځي، بلکه دا د دې ملت حق دی. اما غواړو چې په ملي پیوستون، یوالي او د نظام د ټینګښت په بنسټ هغه مزل ته ورسېږو چې بهرنیو پوځونو ته هېڅ ډول اړتیا پاتې نه شي. مونږ د هېواد د بشپړې خپلواکۍ ترلاسه کولو له پاره پر خپل دریځ د پخوا په څېر ټینګ ولاړ یو، او دا هغه چاره ده چې په هېڅ ډول ترې مخ نه اړوو.

ژورنالست: نو ترڅو چې دا ډول شرایط رامنځته کېږي، باید بهرني پوځونه دلته حضور ولري؟!

محمد امین کریم: باید د افغانستان د خلکو ملي حاکمیت ته احترام وشي، او د یوه معقول مهالوېش له مخې په داسې ډول چې هم بهرني پوځونه وکولی شي ووځي او هم د افغانستان نظام په بشپړ ډول ددې جوګه شي چې د خپل استحکام او په خپلو پښو درېدو له پاره ګړندي ګامونه واخلي. زمونږ هڅې په دې راټولې دي او له دې زیاتې نه دي.

ژورنالست: دا موضوع مو د سولې عالي شورا او افغان ولسمشر ښاغلي اشرف غني سره هم مطرح کړې ده چې په هر ډول شرایطو چې وي تاسو د بهرنیانو له نظامي حضور سره مخالف یاست؟

محمد امین کریم: ایا په نړې کې به داسې څوک وي، یوازې په افغانستان کې نه وایم؛ چې د حزب اسلامي افغانستان ددغه دریځ نه بې خبره وي!؟ البته نه!

ژورنالست: خو امریکایان د نړۍ په ۱۳۹ هېوادونو کې نظامي اډې لري، حتی په سعودي عربستان کې هم چې ویل کیږي د اسلامي نړۍ رهبري نن سبا په غاړه لري، امریکایان په کې نظامي حضور او اډې لري، ایا دا څرنګه ده چې سعودي عربستان اشغال نه دی، ترکیه اشغال نه ده، پاکستان اشغال نه دی؛ افغانستان اشغال دی؟ ایا مونږ باید په افغانستان کې د اسلامي نړۍ د جهادیانو استازي واوسو؟

محمد امین کریم: نه خیر! تاسو نړیوال شرایط ناسم تعبیروئ! ترکومه بریده چې زه معلومات لرم په سعودي عربستان کې امریکایي الوتکې د خلکو په بمباردونو نه دي بوختې، په ترکیه کې امریکایي عسکر له خپلې اډې څخه په نظامي جامه کې د راوتلو حق نلري، په افغانستان کې خلک د امریکایي الوتکو د بمونو له کبله وسوځېدل او سوځي.

ژورنالست: نو که افغانستان اشغال دی، پاکستان هم دی؟ د شمسي په اډه کې امریکایي نظامیان پراته وو!

محمد امین کریم: د پاکستان په اړه خبر نه یم، ما تاسو ته وویل چې پاکستان د امریکا نیږدې ملاتړی دی.

ژورنالست: پاکستان د حزب اسلامي سره څنګه دی؟

محمد امین کریم: پاکستان له حزب اسلامي سره په تېره یوه لسیزه کې حتی یوه کوچنۍ مرسته هم نه ده کړې، که یې کړې وای، شونې وه چې حزب اسلامي به په نظامي او لوجستیکي برخو کې اوس په ډېر لوړ مقام کې وو.

ژورنالست: د ایرانیانو سره څنګه یاست؟

محمد امین کریم: مونږ له ایرانیانو سره هېڅ ډول تعلق او اړیکې نلرو.

ژورنالست: نو د کومو هېوادونو سره اړیکې لرئ؟

محمد امین کریم: مونږ له مختلفو هېوادونو سره سیاسي او دیپلوماتیکې اړیکې لرو، خو له هېڅ یوه هېواد څخه مو مادي او تسلیحاتي ملاتړ نه دی شوی، او غوښتنه مو هم نه ده کړې، په داسې حال کې چې د افغان ولس دا حق و چې د ښکاره تیري او اشغال په مقابل کې یې ملاتړ شوی وای.

ژورنالست: وایي چې د حزب اسلامي اغېزمنتیا د تاریخ پاڼو ته غورځېدلې ده، ایا حقیقت لري؟

محمد امین کریم: دا ډول خبرې د حزب اسلامي دښمنان کوي، تاسو یې حتمأ د هغوی له خولې رانقلوئ! وګورئ، د یوه سیاسي جریان قدرت اصلأ په څه کې دی!؟ ایا د یو مسلمان په حیث په دې باور لرې، چې بریا له حق سره ده؟

ژورنالست: الحمدلله

محمد امین کریم: سمه ده، که د حزب اسلامي افغانستان دریځ حق وي او د حق په دفاع کې ولاړ وي!؟ پوه شئ چې د الٰهي ژمنې سره سم حق بریالی کېږي، او زمونږ تر ټولو لوی قوت د افغانستان د خلکو د حقوقو څخه په حقیقي دفاع کې دی.

ژورنالست: پوهېږو چې حق تل برحق وي، خو آیا حزب اسلامي برحق دی؟

محمد امین کریم: تاسو له ما نه مه اورئ، تاسو د حزب اسلامي مرامنامه، اهداف او کړنې مطالعه کړئ او بیا قضاوت وکړئ!

ژورنالست: تر ډېره، حق، مرامنامه نه وي، کړنې هم ارزول کېږي؟

محمد امین کریم: ما تاسو ته د حزب اسلامي د کړنو د مطالعې هم وویل، مرامنامه او کړنې دواړه ترڅېړنې لاندې ونیسئ.

ژورنالست: د بېلګې په ډول د حزب اسلامي کومه کړنه تر مطالعې لاندې ونیسو؟

محمد امین کریم: حزب اسلامي افغانستان د تاریخ او افغان ولس د شاهدۍ پر بنسټ د شلمې پېړۍ په اتیایمو کلونو کې د جهاد، هجرت او شهادت راژوندي کوونکی دی، او د نړۍ تر ټولو لوی نظامي ځواک یې د الله عزوجل په مرسته او د افغان مجاهد ولس په شهامت او شهادتونو رامنځته او رهبري کړ او د بریالیتوب تر پولې یې ورساوه. هو، نورو ډلو هم پکې برخه لرله، خو پرته له دې چې زه د حزب اسلامي د یو غړي په صفت تاسو ته ووایم، بلکه له کوم شک او مبالغې پرته حزب اسلامي د پخواني

شوري اتحاد په ماتولو کې تر ټولو لوی او اغېزمن رول لوبولی دی. نو آیا دا دریځ یې برحق نه و؟!

ژورنالست: خو کله چې حزب اسلامي تر بحث لاندې نیول کېږي، صحیح ده چې د دغه حزب پلویان شته، خو ډېری خلک ددغه حزب په اړه د کورنۍ جګړې، راکټ توغول، مهاجرتونه او بې ځایه کېدل یې ذهن ته ورځي او دا څېزونه یې د خاطرو په ډول وایي، آیا تاسو ورسره موافق یاست؟

محمد امین کریم: زه دغه واقعیت درک کوم، ځکه یې درک کوم چې له دریو لسیزو راپه دېخوا او که کمونستي رژیم چې د خپلو مارکسستي افکارو له مخې یې حزب اسلامي خپل لمړنی سیال ګاڼه هم ورسره وشمېرو نو تر دریو لسیزو اوړي چې له هغه وخت نه تر نن ورځې مطبوعات د حزب اسلامي د دښمنانو په لاس کې دي. دېرش، پنځ دېرش کاله منفي تبلیغ بلاخره یو ذهنیت رامنځته کوي. خو مونږ مطمین یو چې یو وخت به حتمأ راځي چې واقعیتونه خلکو ته څرګند شي، او ځوان نسل چې د ۲۰ مې مېلادي پېړۍ په ۹۰ یمو کلونو کې ماشومان وو د عیني واقعیتونو او مستندو شواهدو له مخې خبر شي.

ژورنالست: ښاغلی کریم، په مزاکراتو او جوړجاړي کې دوه اصولي موارد وي، چې څه به ورکوې او څه به اخلې، تاسو څه غواړئ او د څه ورکولو ته حاضر یاست؟

محمد امین کریم: مونږ په هغه صورت کې په نظام کې یو ځای کېږو چې مطمین شو د هغه ظلم، استبداد او فساد سره په لوړو کیفیت مبارزه وکړی شو چې ددې هېواد په مظلوم ولس حاکم دي، او د مبارزې له پاره یې ټاکونکی او اغېزمن رول ولرو.

ژورنالست: د مثال په ډول کوم ظلم؟

محمد امین کریم: آیا هغه فساد چې افغانستان یې د نړۍ د مفسدو هېوادونو د لست په سر کې ودرولی دی، ددې مظلوم ولس په وړاندې ظلم نه دي؟! آیا ددې مظلوم ولس د دوه میلیونه انسانان په مخدره توکو روږدي کول د دغه ولس د ځوان نسل په وړاندې ظلم نه بولئ؟! آیا دا جګړه او تاوتریخوالی چې په خلکو حاکم دی، ددې ولس سره جفا او ظلم نه دی؟! زمونږ مبارزه د دې او دې ته ورته نورو ټولو مظالمو، جنایتونو او خیانتونو په وړاندې ده چې دلته د جګړې په بانه او نامه په دغه مظلوم ولس حاکمیت لري.

ژورنالست: تاسو وویل چې غواړو ټاکونکی رول ولرو، کوم ټاکونکی رول او څرنګه؟

محمد امین کریم: که په سیاسي مخالفت کې وي او یا هم د نظام په داخل کې حزب اسلامي دې ته ژمن دی چې د ټولو مفسدینو، جنایتکارانو او ظالمانو په وړاندې مبارزه وکړي، که مونږه نظام ته دننه کېږو، له دغه ټکو پرته بل هدف نلرو.

ژورنالست: آیا د دولت په چوکاټ کې به مبارزه کوئ؟

محمد امین کریم: په ټولو ممکنه بنسټونو کې، په مدني خوځښتونو، کليو، ښارونو، پلازمېنه، ولایتونو، هم په حکومت کې دننه او هم بهر به د فساد، جنایت، ظلم او استبداد په وړاندې په خپل ټول قوت سره مبارزه کوو.

ژورنالست: آیا د خلکو د قبلولو یا محبوبیت کچه مو درک کړې ده؟

محمد امین کریم: د خلکو د قبلونې او محبوبیت کچه رڼې ټاکنې دي. پرېږدئ چې په هېواد کې عادلانه، شفافې، سرتاسري او د پردیو له مداخلو پاکې ټاکنې وشي او وګورو چې د حزب اسلامي محبوبیت څومره دی، پایله یې چې هر څه وه، حزب اسلامي به یې په سر سترګو ومني.

ژورنالست: ښاغلی کریم، سره لدې چې د افغانستان نافذه قوانینو هر واجدالشرایط افغان ته هم د نوماندۍ او هم د رایه ورکونې حق ورکړی، حزب اسلامي ولې په تېرو څو ټاکننزو سیالیو کې ټاکونکی نقش نه لاره؟

محمد امین کریم: دلایل مې یې مخکې درته وویل، تر اوسه هره ټاکنیزه سیالي غیر عادلانه، غیر شفافه، او د امریکا د متحده ایالاتو په ښکاره مهندسۍ رامنځته شوې ده، چې هېڅوک له دې ادعا څخه انکار نه شي کولی.

ژورنالست: دقیقأ ۹ میاشتې ورسته به ټاکنې وشي، آیا حزب اسلامي به په کې برخه واخلي؟

محمد امین کریم: په دې هیله او هڅو چې دا ځل به ټاکنې عادلانه، رڼې او د بهرنیانو له مداخلې پاکې وي، حزب اسلامي به په پوره لېوالتیا پکې برخه واخلي.

ژورنالست: ښاغلی کریم، تاسو د امریکا او نورو بهرنیانو په وړاندې ډېر ضدیت لرئ او جدي یاست، آیا که امریکا او نور متحدین یې چې ناټو هېوادونه دي، د دولت د نظامي برخې د یوې ورځې لګښتونه ورنه کړي، نظام ړنګېږي، که د حکومت د نورو ادارو د یوې ورځې لګښت ورنه کړي ړنګېدو ته نیږدې کیږي، او کابو له ۷۰ سلنې زیاته دولتي بودیجه بهرنیان تمویلوي!؟

محمد امین کریم: دقیقأ ستاسو خبرې په ځای دي، خو عامل ددې شرایطو څوک دي؟! آیا افغانستان شل کاله وړاندې، دېرش کاله وړاندې، څلوېښت کاله وړاندې او یا پنځوس کاله وړاندې د نني وخت په پرتله ډیر په نورو پورې تړلی وه او که اوس ډیر ټړلی یا وابسته دی؟! آیا د هېواد د تاریخ په اوږدو کې بل داسې رژیم یا نظام راښودلی شئ چې تر اوسني نظام زیات په نورو پورې تړلی؟! دا حالت هغو کسانو رامنځته کړی چې په افغانستان کې د جګړې اصلي عامل دي.

ژورنالست: له داخلي کړۍ څخه مو مطلب څه او څوک دي؟

محمد امین کریم: داخلي کړیو استفاده وکړه او له دغو شرایطو یې شخصي او ډلییزې ګټې واخیستې. که د دغه نظام له پیل د اردو بنسټ د عسکري خدمت په چوکاټ کې رامنځته شوی وای، اوس به یې اجیره اردو نه لرله. مونږ غواړو داسې شرایط جوړ کړو چې د هېواد امنیتي او انتظامي ځواکونه له سلو زرو کم وي، او وکولی شو د عسکري خدمت پر مټ یې په پښو ودروو او ۹۰ سلنه وابستګي په لمړیو دوو دریو کلونو کې له منځه یوسو، او په همدې ډول نورو خپلواکیو ته هم لاره پیدا کړو.

د امریکا متحده ایالاتو په افغانستان کې خپل سیاست داسې جوړ کړی دی چې ورځ تر بلې به ددې هېواد تړلتیا یا وابستګي زیاتېږي، او حتیٰ وینو چې د خیرات غوښتنې یو فرهنګ یې دود کړی. د مثال په ډول د افغانستان برېښنا پیسې باید امریکا ورکړي، که یې زړه نه و پرې کوي یې، دا رنګه د معاشاتو سیستم چې امریکا یې د تمویل لمړنۍ مرجع ده، په همدې ډول د اردو او د نظام د هرې برخې ژوره وابستګي د سقوط له جدي ګواښونو سره مخ دي. دا باید تاسو له هغو خلکو وپوښتئ چې امریکا یې د افغانستان لمړنی او اصلي دوست باله. حزب اسلامي له هېڅ هېواد سره د امریکا په ګډون ذاتي دښمني نه لري، بلکه مونږ د خپلو خلکو د رښتیني استقلال له پاره مبارزه کوو.

ژورنالست: نو تاسو دا څرنګه مشروع بولئ چې غواړئ له یوه لاسپوڅي نظام او حکومت سره مزاکرات وکړئ؟ یعنې ستاسو له نظره نظام لاسپوڅی دی!؟

محمد امین کریم: د لاسپوڅي کلیمه ما نه ده کارولې.

ژورنالست: تاسو وویل چې ددې نظام ټاکنې امریکایانو مدیریت کړې؟

محمد امین کریم: په دې کې تاسو شک ګڼئ؟ آیا تاسو په دې کې کوم شک لرئ چې امریکا په ټاکنو کې ښکاره دخالت لاره؟

ژورنالست: دقیقأ! آیا د افغانستان نظام ستاسو له نظره نامشروع یا لاسپوڅی دی؟

محمد امین کریم: د مشروعیت او لاسپوڅي والي ترمنځ توپیر شته، بالاخره په هېواد کې سره له ډېرو درغلیو ټاکنې وشوې یو کس پکې بریالی شو، پایلې یې د امریکا په خوښه اعلان نه شوې، او تاسو په جریان کې یاست چې څه موده وړاندې وروسته له دوو کلونو اعلان شوې. آیا دا عجیبه نه ده چې د یو هېواد د ولسمشرزو ټاکنو پایلې دې دوه کاله وروسته اعلان شي؟! په داسې حال کې چې همدا پایلې په همغه ورځ موجودې وې. یقینأ چې یو تاریخي او سیاسي طنز دی. آیا دا د امریکا د متحده ایالاتو ښکاره مهندسي نه ده، نو تاسو څنګه له واقعیتونو انکار کوئ!؟

ژورنالست: زه غواړم له تاسو وپوښتم چې د حزب اسلامي او طالبانو تر منځ شباهت څه دی او تقابل مو په څه کې دی؟

محمد امین کریم: شباهت مو په یوه ادعا یا غوښتنه کې دی چې د افغانستان بشپړه ازادي ده، او د بهرنیو پوځونو وتل دي. که دغه شباهت یوې خواته کېږدو، حزب اسلامي د طالبانو له تحریک سره په لیدلوري، انګیرنه، د مبارزې بڼه، او ټولنیزه ټوکیدنه کې ښکاره توپیرونه لري. په پوره باور سره وایم چې د نظام په داخل کې داسې کسان شته چې د جهاد له ادرس څخه په طالبانو ځان ښه بولي، هغوی ملامتوي او غندنه یې کوي خو د کړنو له مخې د طالبانو له تحریک سره عیني او عملي ورته والی لري. هغه کسان هم چې ځانونه د دولت ساتندویان او ملاتړي ګڼي، خو په ښکاره ډول د طالبانو سره ورته والی لري.

ژورنالست: زه غواړم د څو افغان رهبرانو په اړه پوه شم، ځینې دي چې نه غواړم نومونه یې واخلم، د طالبانو په ضد شعارونه ورکوي، دقیقأ د امریکایانو سره نیژدې اړیکې هم لري، په ټاکنو کې یې ګډون هم کړی، او وایي مونږه د جهاد او مقاومت رهبري پر غاړه لرله. حزب اسلامي یې په اړه څه نظر لري؟

محمد امین کریم: ښه ده چې تاسو وویل چې دوی وایي رهبري مو په غاړه لرله، نه دا چې لري یې. ځینې خلک مدعي دي چې د افغانستان په جهاد کې مو ونډه لږ یا ډېره لرله کولی شو د پخوانیو مجاهدینو په ډله کې یې وشمېرو، خو له کلیمو سره لوبې جفا ده. جهاد نوم نه دی بلکه یو صفت دی، څوک چې جهاد کوي مجاهد دی، څوک یې چې نه کوي مجاهد نه دی. یا دا چې جهاد کومه ټاپه نه ده چې د چا په تندي وه مجاهد دی او که نه وه نه دی، شاید ځینو یې پخوا جهاد کړی وي خو اوس مجاهدین ورته نه شو ویلی، او په عقلي او منطقي لحاظ ددې حق نه لري چې ځان ته مجاهد ووایي.

ژورنالست: زما له پاره ګېچ کوونکې ده، د ښاغلي غني له هغه حکومت سره مزاکره کوئ چې ستاسو له نظره د خلکو د رایو پر بنسټ نه دی رامنځته شوی.

محمد امین کریم: تاسو زما خبرې غلطې مه تعبیروئ! ما درته وویل چې له ټولو ستونزو سره سره ټاکنې وشوې، او پایلې یې ټولو ته ښکاره وې چې څه دي، خو د امریکا متحده ایالات یې مانع شول چې پایلې اعلان شي، نو د لاسپوڅي او نامشروع کلیمې تاسو ورته کاروئ، زه درته په ټاکنو کې د امریکا څرګندو لاسوهنو او په ټولنه کې د رامنځته شوو ستونزو یادونه کوم.

ژورنالست: د حزب اسلامي او حکومت ترمنځ د مزاکراتو په وړاندې خنډونه څه دي؟ او څومره هیله مند یاست چې هغه هدف چې تاسو ځانته ټاکلی دی ورسېږئ؟

محمد امین کریم: مونږ الحمدلله د اسلامي نهضت له پیل نه تر اوسه خپل هدف ته ژمن یو، خپل هدف ته د رسېدو له پاره له هېڅ ډول قربانۍ نه په شا کېږو، او د حزب اسلامي د کړنو تاریخ دا په ثبوت رسولې ده. تاسو حتمأ پوهېږئ چې د حزب اسلامي د شهیدانو شمېره د اوسنیو سیاسي ګوندونو د لوی ترین ګوند د غړو له شمېرې څخه لوړه ده. په ځوانانو کې، یا هم په افغان کورنیو کې به داسې کور نه وي چې یو کس یا ټول کور یې د حزب غړیتوب نه وي ترلاسه کړی. نو دا یو افغانستان شموله حزب دی، او د پاکو شهیدانو په وینو به د پخوا په څېر خپل منزل ته لاره لنډوي. دا چې مبارزه به یې څه ډول بیروني انعکاس ولري، دا بیا د زماني او مکاني شرایطو له مخې ټاکل کېږي.

ژورنالست: د طالبانو د تحریک له ړنګېدو وروسته حزب اسلامي څه وخت د افغانستان په عدلیې وزارت کې ثبت شوی دی؟

محمد امین کریم: ما اورېدلي دي چې یو شمېرو وروڼو په عدلیې وزارت کې د حزب اسلامي په نامه ګوند ثبت کړی دی، په داسې حال کې چې ټول نړیوال او په ځانګړي ډول افغانان خبر دي چې حزب اسلامي له پخوا نه موجود دی، او همدا نن سبا وینئ چې د افغانستان دولت د حزب اسلامي افغانستان سره په خبرو بوخت دی. هغو وروڼو چې د حزب اسلامي په نامه کوم څه ثبت کړي دي، خپل مجبوریتونه یې وو، خو یقینأ چې ددغه لوی، سرتاسري او افغانستان شموله ګوند چې حزب اسلامي افغانستان دی د تضعیف په موخه یې یوه سیاسي پرېکړه او هڅه وه.

ژورنالست: آیا د ښاغلي حکمتیار او ولسمشر اشرف غني ترمنځ تلیفوني اړیکې شته؟

محمد امین کریم: نه، هېڅګله نه! مجاهد ورور حکمتیار له هغه وخته چې په افغانستان کې حضور لري، له هېچا سره هېڅ ډول تلیفوني اړیکې نه دي لرلې.

ژورنالست: تاسو چې د ښاغلي حکمتیار له اړخه د مرکچي پلاوي مشر یاست، څه غواړئ ترڅو خلکو ته څرګند شي؟

محمد امین کریم: زه د حزب اسلامي افغانستان له لوري د مجاهد ورور حکمتیار تر امارت لاندې د سولې د مرکچي پلاوي مشر یم. زمونږ پلاوی له دولت سره د افغانستان د خلکو د حقه حقوقو د ترلاسه کولو له پاره په مزاکره بوخت دی.

ژورنالست: د وروستۍ پوښتنې له پاره مو غواړم وپوښتم چې ستاسو د مرکو او غوښتنو له مخې تاسو په هېواد کې اسلامي نظام غواړئ. د افغانستان د اساسي قانون په یوه ماده کې ویل شوي دي چې د حکومت نوم جمهوري اسلامي افغانستان دی، له دې ها خوا څه غواړئ؟

محمد امین کریم: یقینأ زمونږ غوښتنه په هېواد کې اسلامي نظام رامنځته کول دي! ستاسو د پوښتنې په ځواب کې چې له نامه ها خوا څه غواړئ، مونږ د اسلام د سپېڅلي دین اوامر او احکام عملي کول غواړو!

ژورنالست: آیا اوس اسلامي ارزښتونه نه عملي کېږي؟

محمد امین کریم: تاسو د یوه ځوان او په دغه هېواد کې د یوه اوسېدونکي په حیث، زما نه ښه قضاوت کولی شې چې دغه نظام په کوم اړخ کې او په کومه کړنه کې د اسلام د مقدس دین سره سم عمل کړی او کوي یې.

ژورنالست: مننه ښاغلی محمد امین کریم چې مونږ ته مو وخت راکړ.

محمد امین کریم: له تاسو نه هم مننه کوم چې مونږ ته مو موکه برابره کړه څو له خپلو هېوادوالو سره د زړه خواله وکړو.

پای