افغانستان

د کندهار هوایي ډګر په برید کي د ۷ تورنو کسانو محاکمه بې پایلو پای ته رسیدلي

نن ټکی اسیا (پنجشنبه، وري ۱۲مه، ۱۳۹۵ ل): په کندهار کي د هوایي ډګر په برید کي د ۷ تورنو برید کوونکو محاکمه په علني توګه ترسره سوه خو بې پایلو پای ته ورسیدل.

تېر کال د لېندۍ میاشتي پر ۱۷مه نېټه د طالبانو د خاص ځواک ۹ تنه بریدکوونکي د کندهار هوایي ډګر ته په خفیه توګه ننوتل او هلته یې پر کورنیو او بهرنیو ځواکونو بریدونه وکړل، بریدونو چي شاوخوا ۳۲ ساعته یې دوام وکړ د امنیتي سرتیرو په ګډون لسګونه بهرنیو سرتیرو ته یې مرګ ژوبله واړول.

طالبانو په هوايي ډګر کي د ۲۰۵ اتل قول اردو د قومندان دفتر، د هوايي ډګر بازارګی، د بهرنیو ځواکونو قومنداني او په سیمه کي نژدې نور دولتي تأسیسات خپل هدف وګرځول او درنه جګړه یې ورباندي وکړل.

تر برید وروسته امنیتي ارګانونو د پېښي په تور ۷ تنه شکمن ونیول چي په هغوی کي یو تن د هوايي ډګر د قراول قومندان او شپږ تنه د هوایي ډګر دننه د بازارګي دوکانداران دي، پر دوی تور پوري سوی چي هوايي ډګر ته د بریدکوونکو په داخلولو کي یې مرسته کړي ده.

د محاکمې په پيل کي موظف څارنوال صورت دعوا ولوسته او ويي ويل چي د هوايي ډګر د قراول د قومندان حاجي خان په ګډون اووه تنه په دې قضيه کي ښکېل دي او هوايي ډګر ته د ننه يې د وسله والو او د هغوى د وسلو د تېرولو په برخه کي مرسته کړې ده.

څارنوال وویل چي تورنو کسانو پر خپل جرم اعتراف کړی او منلې یې ده چي دوی د بریدکوونکو سره د وسلو په وړلو او هغوی دننه هوايي ډګر ته په تېرولو کي مرسته کړي ده.

د نیول سوو کسانو مدافع وکیلانو وویل چي د شکمنو دوسیې د اعترافاتو پر بنسټ جوړي سوي او اړوند نور شواهد او اسناد پکښي نسته، دوی همدارنګه وویل چي د اعتراف اخیستلو پر مهال د نیول سوو کسانو نوکان ویستل سوي او سختي شنجکې ورکړل سوي دي.

مدافع وکیلانو همدارنګه وویل چي د برید پر مهال نور چارواکي او سرتیري هم پر دنده موظف وه نو یوازي د قراول قومندان حاجي خان ولي نیول سوی او د نورو څخه پوښتنه نه ده سوي.

د غونډي په پای کي د کندهار د ښاري محکمې ريس قاضي عبدالحليم مسلم ددي علني محکمي پر مهال وويل چې د تورنو کسانو په اړه شواهد او اسناد کره نه دي او امر يې وکړ چې د کندهار والي، امنيه قومندان، د ملي امنيت ريس، د ٤٠٤ ميوند زون قومندان، د ٢٠٥ اتل قول اردو قومندان، د سرحدي زون قومندان، د کندهار د هوايې ډګر دګارنيزون قومندان، د هوايې ډګر د سرحدي پوليسو قومندان او اړوند نور چارواکي به په بله غونډه کې برخه واخلي او ددي موضوع او نيول سويو تورنو کسانو او پيښي په اړوند به وضاحت ورکړي.

ورته لیکنې

ګډون وکړئ
خبرتیا غوښتل د
guest
0 Comments
Inline Feedbacks
ټولې تبصرې کتل
Back to top button
0
Would love your thoughts, please comment.x
()
x