«په افغانستان کې د امریکايي ځواکونو د شتون د څرنګوالي پرېکړه یوازې امریکايي چارواکي کوي»

نن ټکی اسیا (جمعه، وري۱۳مه ۱۳۹۵ل): د افغانستان د ګډ حکومت ولسمشرۍ ماڼۍ ویاندمرستیال، سیدظفرشاه رويي په افغانستان کې د طالبانو پر ضد جګړه کې د امریکايي ځواکونو شتون موثر او ګټور بولي.

ظفرشاه رويي وايي، په راتلونکي کې په افغانستان کې د امریکايي ځواکونو د شتون د څرنګوالي پرېکړه یوازې امریکايي چارواکو پوره اړه لري.

په افغانستان کې له ۲۰۰۱م کال راهیسې امریکايي ځواکونه مېشت دي. په تېرو شاوخوا پنځلسو کلونو کې جګړه او ناامني د هر کال په تېرېدو سره پراخه شوې ده.

وروستۍ سروې ګانې ښيي چې ۱۳۹۴ل کال له امنیتي نظره له ۲۰۰۱ راهیسې تر ټولو ناامنه کال ګڼل شوی.

د ولسمشر غني د ویاند مرستیال که څه هم وايي: «هغه اسناد چې د افغانستان حکومت له امریکا او ناټو سره لاسلیک کړي، په افغانستان کې د بهرنیو ځواکونو د حضور څرنګوالی ښيي؛ خو د دوی شتون د ترهګرۍ پر ضد جګړه کې ډېر ګټور و؛ ولې په راتلونکي کې د دغو پوځیانو د شتون او څرنګوالي پرېکړه یوازې امریکايي چارواکي کوي».

دا په داسې حال کې ده چې د امنیتي کارپوهانو په باور، د ۲۰۱۶م کال د اوړي جګړه ښايي ټاکونکې وي.