د کلاسيک شاعر «علي محمد مخلص» ديوان چاپ شو

نن ټکی اسیا (شنبه، وري ۲۱مه، ۱۳۹۵ل): د افغانستان د اطلاعاتو او کلتور وزارت د پښتو ژبې د پياوړي کلاسيک شاعر علي محمد مخلص ديوان چاپ کړ.

دغه ديوان چې د اطلاعاتو او کلتور وزارت په امر د بيهقي خپرونو رياست  له لوري  په ۷۳۷ مخونو کې چاپ شوی دی، د سريزې، لمنليکونو او لغاتو د معناوو چارې يې محمد هارون خپل ترسره کړي دي.

د اطلاعاتو او کلتور وزير عبدالباري جهاني او محمد معصوم هوتک په ياد ديوان ليکنې کړي دي او د ديوان منځپانګه او د محمد هارون خپل زيار يې ستايلی دی.

دغه ديوان که څه هم ډېر پخوا چاپ ته تيار شوی و او اطلاعاتو او کلتور وزرات ته د چاپ له پاره سپارل شوی و خو د يو لړ ستونزو له امله يې د چاپ چارې ځنډېدلې وې.

تر دې وړاندې د دغه ديوان ترتيب کوونکي محمد هارون خپل په يوه مقاله کې ويلي و چې «
په دې نفيس او غني شعري ديوان کي زموږ د عارف شاعر، علي محمد مخلص،  ژورو عرفاني او فلسفي بحثو، د هغه په  زړه  پوري عارفانه بيان، د ديوان  ژبنييو ځانگړتياوو، ستري  لغوي زېرمي او ډېرو نورو ارزښتونو دا عاجز دې ته اړکړ، چي د خطي نسخې د اکاډيميک متن وبرابرولو ته  ملاوتړي» .

د اطلاعاتو او کلتور وزارت په خبرپاڼه کې راغلي چې دغه کتاب د ياد وزارت د کتاب چاپونې د لړۍ ۱۵۹م هغه دی او تر دې وړاندې يې په بېلابېلو موضوعاتو کتابونه چاپ کړي دي.

علي محمد مخلص د مشهور روښاني ارزاني ورور و او د پلار نوم يې برهان او د خېشكي د قبيلې څخه و.
دی په خپله هم د روښاني مسلك پوه عالم شاعر و، مضامين يې ډېر ښكلي او عالمانه او د روښان د تصوفي فلسفې ښكارندوى دي.

avatar
1 د تبصرو شمېر
0 د ځوابونو شمېر
0 ار ایس ایس کې ګډونوال - څارونکي
 
ډېر غبرګون شوې تبصره
تر ټولو ګرمه موضوع
  ګډون وکړئ  
نویو زړو ډیرو خوښو شویو
خبرتیا غوښتل د
shaker
میلمه
shaker

دکتآب لستلو دپاره