شکیلا ابراهیم خیل او د کوچني میسي کورنۍ ترکيې او پاکستان ته کډوالې شوي

نن ټکی اسیا (دوشنبه، غويي ۱۳مه ۱۳۹۵ل): د طلوع تلویزون مشهورې خبریالې شکیلا ابراهیم خیل او افغان کوچني میسي کورنۍ افغانستان پريښی او ترکیې او پاکستان ته کډوال شوي دي.

پاکستاني رسنۍ وايي چې پنځه کلن مرتضی احمدي چې په کوچني میسي هم مشهور دی، پاکستان ته ورغلي او د کوټې په هزاره ټاون کې مېشت شوي دي.

مرتضی تر هغه وروسته شهرت وموند چې له پلاستیک څخه یې جرسي یا زیرپراهني جوړه کړې وه، تر شا یې د میسي نوم لیکلی و او عکسونه يې په ټولنیزو رسنیو کې خپاره شول.

جیو تلویزون د مرتضی د پلار له خولې لیکلي چې پاکستان کې د ښه ژوند تېرولو په موخه هلته ورغلي دي. د مرتضی پلار د پاکستان او افغانستان له حکومته غوښتي چې د زوی او میسي کتنې لپاره زمینه مساعده کړي.

اوسمهال ډيری هزاره‌ګان په کوټه کې اوسیږي او د دغه هېواد تابعیت یې هم اخېستی دی. ښايي د مرتضی پلار هم د افغاني تابعیت سربېره پاکستانی تابعیت ولري.

بل لوري ته د طلوع تلویزون مشهورې خبریالې شکیلا ابراهیم خیل کورنۍ هم ترکیې ته کډواله شوې ده.

د راپورونو له مخې ابراهیم خیل د امنیتي ستونزو له کبله افغانستان پريښې او اوس له خپلې کورنۍ سره په ترکیه کې اوسیږي. هغه کوښښ کوي چې له کورنۍ سره اروپا ته ولاړه شي او هلته پناه واخلي.

تر دې وړاندې هم لسګونو خبریالانو د امنیتي ستونزو په پلمه افغانستان پريښی او اروپا ته تښتیدلي دي.