طالبانو د موټر چلوونکو څخه د شکایاتو لپاره اړیکشمېرې اعلان کړې

نن ټکی اسیا (دوشنبه، غويي ۲۰مه ۱۳۹۵ل): طالبانو یو ځل بیا د ترانسپورتي او باروړونکو شرکتونو نمایندګیو ته خبر ورکړی چې په لویو لارو د سفر پر مهال ټول ترافیکي قوانین په پام کې ولري او عملي کړي.

همدا راز یې په عامو خلکو غږ کړی چې که د سفر په جریان کې موټر چلونکي له ترافیکي قوانینو سرغړونه کوي او هیوادوالو ته ستونزې ایجادوي، باید د طالبانو اړوندې ادارې ته یې په اړه خبر ورکړي.

د طالبانو د «ملکي تلفاتو د مخنیوي ادارې» د یوې اعلامیې په خپرولو سره هغه اړيکشمېرې اعلان کړي چې په مټ یې د لویو لارو مسافرین کولای شي له دوی سره نېغ په نېغه تماس ونیسي او د موټرچلوونکو په اړه طالبانو ته شکایت ورسوي.

طالبان وايي چې دا ګام یې وروسته له هغه اخیستی چې د بېلابېلو سیمو د قومي مخورو، مشرانو او عامو ولسي وګړو لخوا د ترانسپورتي او باروړونکو وسایطو د چلوونکو په اړه ورته شکایتونه رسیدلي.

طالبان زیاتوي چې د «هیوادوالو د تحفظ او خوندیتوب» په غرض به له هر هغه ترانسپورتي شرکت او موټرچلوونکي سره «شرعي او قانوني» چلند کوي چې د مسافرینو له ژوند سره بې احتیاطي کوي.

د طالبانو د ملکي تلفاتو د مخنیوي ادارې لخوا اعلان شوې اړیکشمېرې په لاندې دي:

بریښنالیک: molkietalafat_m@yahoo.com
مرکزي شمیره: ۰۷۰۷۹۱۸۳۸۴
میدان وردګ: ۰۷۸۱۸۱۱۵۷۷
زابل: ۰۷۰۳۴۳۶۵۳۱
هلمند: ۰۷۹۳۶۵۵۶۸۵ / ۰۷۹۵۶۲۶۶۴

طالبانو دا اعلان وروسته له هغه کړی چې تېره ورځ د غزني – کندهار په لویه لار د یوې خونړۍ ترافیکي پېښې په پایله کې لږ تر لږه ۵۰ کسان مړه او تر ۶۰ پورې نور ټپیان شول.